កំពង់ចាម៖ លោក អ៊ុង សំអាត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក អ៊ុន ចាន់ដា អភិបាលខេត្តកំពង់ចាម រួមជាមួយប្រតិភូជាច្រើនអ្នកទៀត នៅព្រឹកថ្ងៃទី ២៥ ខែតុលា ឆ្នាំ ២០២២នេះ បានអញ្ជើញធ្វើពិធីសំណេះសំណាល និងនាំអំណោយស្រូវពូជ របស់រាជរដ្ឋាភិបាល ចែកជូនប្រជាកសិករ ដែលរងផលប៉ះពាល់ធ្វើឲ្យខូចដំណាំស្រូវ ដោយសារជំនន់ទឹកភ្លៀង និងទឹកទន្លេមេគង្គ ចំនួន ១,៧៧៥ គ្រួសារ ក្នុងឃុំ ចំនួន ៩ នៃស្រុកកងមាស ។
អភិបាលខេត្តកំពង់ចាម លោក អ៊ុន ចាន់ដា បានមានប្រសាសន៍ឲ្យដឹងថា តាមរយៈប្រព័ន្ធស្បៀងបម្រុងកម្ពុជា ដែលមានសម្តេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ជាប្រធាន បានផ្គល់ពូជស្រូវសម្រាប់ បងប្អូនកសិករធ្វើការស្ដារឡើងវិញ ក្រោយពីប៉ះពាល់ដោយសារជំនន់ទន្លេមេគង្គ និងជំនន់ទឹកភ្លៀង ។សម្រាប់ស្រុកកងមាស ថ្ងៃនេះ មានចំនួន ១.៧៧៥ គ្រួសារ ស្មើនឹង ១១៤តោន ៧០០គីឡូ ដែលត្រូវចែកជូន ២កន្លែង ក្នុងនោះ សម្រាប់ទីតាំង ១ នៅវត្តនិគ្រោត ឃុំពាមជីកង ៖ មាន៣ឃុំ គឺព្រែកក្របៅ, រការគយ, និងឃុំសូគង មានផ្ទៃដីខូចខាត ២៦២,៨០ ហិកតា មាន ៧៥០ គ្រួសារ ក្នុង ១គ្រួសារ ទទួលបានស្រូវពូជ ១០០ គីឡូក្រាម ដូចៗគ្នា ។
សម្រាប់ទីតាំង ២ ចែកនៅវត្តកងតាណឹង ឃុំកងតាណឹង ៖ មាន០៦ឃុំ គឺកងតាណ៏ង, ខ្ចៅ, ព្រែកកុយ, រាយប៉ាយ, រការអា, និងឃុំស្តៅ មានផ្ទៃដីខូចខាត ៧៧៤,៦៤០ហិកតា ប្រជាពលរដ្ឋ ១.០២៧គ្រួសារ ស្មើនឹងពូជស្រូវ ៧០ តោន ៥០គីឡូ ផងដែរ ។
រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក អ៊ុង សំអាត បានមានប្រសាសន៍ ផ្តាំផ្ញើដល់ប្រជាកសិករថា ក្រោយពីទទួលបានស្រូវពូជ សូមឱ្យកសិករយើង មានការត្រៀមលក្ខណៈ ពោលគឺនៅពេលដែលទឹកស្រក ត្រូវប្រើទូកដើម្បីពង្រោះស្រូវភ្លាម ។
លោករដ្ឋលេខាធិការបន្តថា ក្រសួងកសិកម្មរុក្ខាប្រមាញ់ និងនេសាទ តែងតែណែនាំ ដល់មន្ត្រីនៃមន្ទីរកសិកម្មខេត្ត សូមឲ្យមានការទំនាក់ទំនង ផ្សារភ្ជាប់ជាមួយប្រជាកសិករ និងចេះស្គាល់អំពីសុខនិងទុក្ខ របស់កសិករយើង ពីព្រោះបងប្អូនប្រជាពលរដ្ឋយើងនេះហើយ ជាអ្នកកំណត់បាន នូវជោគវាសនាប្រទេសជាតិ ក៏ដូចជាអ្នកជំរុញចលករ កម្លាំងសេដ្ឋកិច្ចឲ្យទៅមុខផងដែរ ៕
