ព័ត៌មានជាតិ

សិក្ខាសាលាថ្នាក់អាស៊ាន ២ថ្ងៃ ដែល ប.ស.ស.កម្ពុជា ធ្វើជាម្ចាស់ផ្ទះ បញ្ចប់ដោយជោគជ័យ និងឆ្លើយតបយ៉ាងមានប្រសិទ្ធភាពបំផុត ក្នុងការចែករំលែកចំណេះដឹង បទពិសោធន៍

សៀមរាប ៖ លោក អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជាអគ្គនាយក ប.ស.ស. តំណាងដ៏ខ្ពង់ខ្ពស់ លោកបណ្ឌិត អ៉ិត​ សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាសអញ្ជើញបិទសិក្ខាសាលាស្តីពី “ការចែករំលែកឧត្តមានុវត្តន៍ក្នុងការអនុវត្តរបបសន្តិសុខសង្គម ផ្នែកថែទាំសុខភាព និងផ្នែកប្រាក់សោធននសម្រាប់បុគ្គលស្វ័យនិយោជន៍” ដែល ប.ស.ស. កម្ពុជាធ្វើជាម្ចាស់ផ្ទះក្នុងការរៀបចំ នាព្រឹកថ្ងៃទី៤ ខែវិច្ឆិកា ឆ្នាំ២០២២ នេះបានថ្លែងថា៖ សិក្ខាសាលាដ៏មានសារៈសំខាន់ ក្នុងរយៈពេលចំនួន ២ថ្ងៃនេះ គឺបានបញ្ចប់ដោយជោគជ័យ និងពិតជាបានឆ្លើយតប យ៉ាងមានប្រសិទ្ធភាពបំផុត តាមរយៈវាគ្មិនកិត្តិយស នៃបណ្តារដ្ឋជាសមាជិកអាស៊ាន បានចែករំលែកនូវចំណេះដឹង បទពិសោធន៍ ព្រមទាំងមតិយោបល់ល្អៗ ជូនអង្គសិក្ខាសាលាទាំងមូល លើការអនុវត្តជាក់ស្តែង នៃការអនុវត្តរបបសន្តិសុខសង្គម ផ្នែកថែទាំសុខភាព និងផ្នែកប្រាក់សោធន សម្រាប់បុគ្គលស្វ័យនិយោជន៍ នៅក្នុងប្រទេសរបស់ខ្លួន ព្រមទាំងនិន្នាការសកល លើការពង្រីករបបសន្តិសុខសង្គម សម្រាប់បុគ្គលស្វ័យនិយោជន៍ ក្នុងដំណើរឆ្ពោះទៅមុខជាមួយគ្នា ដើម្បីឈានទៅដល់ ការគ្របដណ្តប់សុខភាពជាសកល (UHC) ព្រមទាំងការអភិវឌ្ឍ និងការធ្វើសមាហរណកម្មសង្គម-សេដ្ឋកិច្ចអាស៊ាន ឲ្យកាន់តែមានភាពល្អប្រសើរឡើង។ 

ក្នុងឱកាសជាមួយគ្នានេះ លោកប្រតិភូរាជរដ្ឋាភិបាល បានថ្លែងអំណរអរគុណ យ៉ាងជ្រាលជ្រៅបំផុត ចំពោះវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា ដែលបានរួមចំណែកឧបត្ថម្ភគាំទ្រ ផ្នែកហិរញ្ញវត្ថុដល់ការរៀបចំសិក្ខាសាលានេះ ជាពិសេសក្រសួង ស្ថាប័នពាក់ព័ន្ធ គណៈប្រតិភូជាតិ និងអន្ដរជាតិ ព្រមទាំងដៃគូអភិវឌ្ឍន៍ជាតិ និងអន្តរជាតិទាំងអស់ ដែលបានចំណាយពេលវេលាចូលរួមក្នុងសិក្ខាសាលារយ:ពេល ២ថ្ងៃ ប្រកបដោយភាពរលូន និងប្រកបដោយផ្លែផ្កាគួរជាទីមោទន ដែលឆ្លើយតបទៅនឹងសេចក្តីថ្លែងការណ៍អាស៊ាន លិខិតូបករណ៍ថ្នាក់តំបន់ ឬអន្តរជាតិដែលពាក់ព័ន្ធទៅនឹងកិច្ចគាំពារសង្គម។ 

លោកប្រតិភូរាជរដ្ឋាភិបាល បានថ្លែងបន្តថា៖ ភាពចាំបាច់នៃការពង្រីកវិសាលភាព នៃរបបសន្តិសុខសង្គម គឺជាការបោះជំហានទៅមុខយ៉ាងសំខាន់ និងសបញ្ជាក់ឲ្យឃើញ ពីទស្សនៈវិស័យដូចគ្នា និងគោលជំហររួមគ្នា ក្នុងការបន្តលើកកម្ពស់ និងការពារសិទ្ធិមនុស្ស  ដោយធានាឲ្យបានថាបុគ្គលគ្រប់រូប នឹងទទួលបាននូវអត្ថប្រយោជន៍ របបសន្តិសុខសង្គម ជាពិសេសក្នុងបរិការណ៍ នៃការស្តារសេដ្ឋកិច្ចក្នុងតំបន់ឡើងវិញ ប្រកបដោយចីរភាព បរិយាប័ន្ន និងភាពរឹងមាំ ក្រោយពីវិបត្តិនៃជំងឺកូវីដ-១៩។ 

ផ្ទាំងពាណិជ្ជកម្ម

លោកប្រតិភូរាជរដ្ឋាភិបាល បានបន្តទៀតថា៖ ក្នុងស្មារតីនេះ ខ្ញុំពិតជាមានសេចក្តីសោមនស្ស និងមានកម្លាំងចិត្តប្រកបដោយសុទិដ្ឋិនិយមបំផុត ទោះបីជាមានបញ្ហាប្រឈមជាច្រើនអនេក បានជះឥទ្ធិពលអវិជ្ជមានដល់វឌ្ឍនភាព នយោបាយ សង្គម និងសេដ្ឋកិច្ចក្នុងតំបន់ក្តី ក៏យើងទាំងអស់គ្នា នៅតែបន្តប្តេជ្ញាចិត្តជានិច្ច ក្នុងការសម្រេចឲ្យបាន នូវរបៀបវារៈឆ្នាំ២០៣០ សម្រាប់គោលដៅអភិវឌ្ឍន៍ប្រកបដោយចីរភាព ដែលរួមមានកិច្ចគាំពារសង្គមសម្រាប់ប្រជាជនទាំងអស់ នៅក្នុងតំបន់ផងដែរ។ 

សូមបញ្ជាក់ថា ៖ សិក្ខាសាលាថ្នាក់អាស៊ានខាងលើ ប្រព្រឹត្តទៅចំនួន ២ថ្ងៃ គឺចាប់ពីថ្ងៃទី៣ រហូតដល់ថ្ងៃទី ៤ ខែវិច្ឆិកា ឆ្នាំ២០២២ ដោយមានការអញ្ជើញចូលរួម ពីគណៈប្រតិភូអាស៊ានចំនួន ១០ប្រទេស ដែលក្នុងនោះរួមមាន តំណាងវិទ្យាស្ថានស្រាវជ្រាវសេដ្ឋកិច្ច សម្រាប់អាស៊ាន និងអាស៊ីបូព៌ា តំណាងរដ្ឋសមាជិកអាស៊ាន សហព័ន្ធនិយោជកអាស៊ាន ក្រុមប្រឹក្សាសហជីពអាស៊ាន លេខាធិការដ្ឋានអាស៊ាន អង្គការអន្តរជាតិខាងការងារ សមាគមសន្តិសុខសង្គមអាស៊ាន អង្គការស្ត្រីក្នុងការងារក្រៅប្រព័ន្ធ និងភ្ញៀវកិត្តិយសជាតិ អន្តរជាតិ និងតំណាងក្រសួង និងស្ថាប័នពាក់ព័ន្ធ សរុបប្រមាណជា ១៥០នាក់ ដែលបានប្រព្រឹត្តទៅនៅសណ្ឋាគារ អេមព្រីសអង្គរ ខេត្តសៀមរាប៕

To Top