ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ផាម មិញជិញ នាយករដ្ឋមន្ត្រីវៀតណាម បានប្តេជ្ញាបន្តពង្រឹងបន្ថែមទៀត នូវកិច្ចសហប្រតិបត្តិការ សេដ្ឋកិច្ចទ្វេភាគី ដែលនឹងរួម ចំណែកដល់ការគាំទ្រ គ្នាទៅវិញទៅមក ក្នុងការកសាងសេដ្ឋកិច្ចមួយ ដែលឯករាជ្យ និងពឹងផ្អែកលើខ្លួនឯង ខណៈដែលធានាឱ្យបាននូវ សមាហរណកម្មអន្តរជាតិយ៉ាងទូលំទូលាយ និងប្រកបដោយប្រសិទ្ធភាព ។
យោងតាមសេចក្ដីថ្លែងការណ៍រួម នៅថ្ងៃទី៩ វិច្ឆិកា បានឲ្យដឹងថា នាយករដ្ឋមន្ត្រីកម្ពុជា-វៀតណាម ក៏បានសង្កត់ធ្ងន់ អំពីភាពចាំបាច់ ក្នុងការពង្រឹងការតភ្ជាប់ រវាងប្រទេសទាំងពីរ ទាំងផ្នែក ហេដ្ឋារចនាសម្ព័ន្ធរូបវន្ត ក៏ដូចជាស្ថាប័ន និងគោលនយោបាយ ដែលរួមបញ្ចូល ទាំងការពន្លឿន ការបញ្ចប់ ផែនការមេ ស្តីពីការតភ្ជាប់សេដ្ឋកិច្ចកម្ពុជា-វៀតណាម ឆ្នាំ ២០៣០ ។
ដោយទំហំ ពាណិជ្ជកម្ម រវាងប្រទេសទាំងពីរ មានកំណើនយ៉ាងខ្លាំងនាពេលថ្មីៗនេះ ដោយមាន សមតុល្យ និងមានភាពបំពេញ ឱ្យគ្នាទៅវិញទៅមក កាន់តែច្រើន នាយករដ្ឋមន្ត្រីកម្ពុជា-វៀតណាម បានប្តេជ្ញាបន្តជំរុញបន្ថែមទៀត និងសម្រួលដល់ពាណិជ្ជកម្មទ្វេភាគី ជាពិសេសពាណិជ្ជកម្ម តាមព្រំដែន តាមរយៈការអនុវត្តប្រកបដោយ ប្រសិទ្ធភាពនូវកិច្ចព្រមព្រៀងពាណិជ្ជកម្មតាមព្រំដែន ដែលត្រូវបានចុះហត្ថលេខាថ្មីៗនេះ និងអនុស្សរណៈ នៃការយោគយល់គ្នា ស្តីពីការអភិវឌ្ឍ និងការតភ្ជាប់ហេដ្ឋារចនាសម្ព័ន្ធ ពាណិជ្ជកម្មតាមព្រំដែន ។ ដោយឈរ លើមូលដ្ឋាននេះ ភាគីទាំងពីរប្តេជ្ញា ពង្រឹងទំនាក់ទំនងសេដ្ឋកិច្ច ឱ្យកាន់តែស៊ីជម្រៅរវាងខេត្តជាប់ព្រំដែន ។
សម្ដេចតេជោ ហ៊ុន សែន និងលោក ផាម មិញជិញ ក៏បានប្តេជ្ញាលើកកម្ពស់ការ តភ្ជាប់ខ្សែច្រវ៉ាក់ផ្គត់ផ្គង់ និងផលិតកម្ម រវាងប្រទេសទាំងពីរដោយ ឥតឈប់ឈរ ជាមួយនឹងការចុះហត្ថលេខា និងអនុវត្តកិច្ចអនុវត្តរួមគ្នា រវាងរដ្ឋាភិបាលទាំងពីរស្តីពីការ កំណត់ដើមកំណើត នៃសម្ភារៈកង់ និងគ្រឿងបន្លាស់ដែលអាចទទួលបាននូវប្រព័ន្ធអនុគ្រោះទូទៅ (GSP) របស់សហភាពអឺរ៉ុប និងចក្រភពអង់គ្លេស ។
ដោយយល់ច្បាស់អំពីសារៈសំខាន់ នៃការបង្កើតបរិយាកាស អំណោយផល និងអនុគ្រោះបន្ថែមទៀត សម្រាប់ពាណិជ្ជកម្ម និងការវិនិយោគទៅវិញទៅមក និងធ្វើឱ្យ ប្រសើរឡើង នូវភាពងាយស្រួលក្នុងការធ្វើធុរកិច្ច ថ្នាក់ដឹកនាំទាំងពីរ បានឯកភាពគ្នាផ្ដល់កិច្ច សម្របសម្រួល ដ៏មានប្រសិទ្ធភាពដល់វិនិយោគិន និងសហគ្រាសពីប្រទេសមួយទៅធ្វើប្រតិបត្តិការ នៅប្រទេសម្ខាងទៀត ក៏ដូចជាធានា ការអនុវត្តប្រកប ដោយប្រសិទ្ធភាពនូវកិច្ចព្រមព្រៀងជំរុញ និងការពារការវិនិយោគ ព្រមទាំង កិច្ចព្រមព្រៀង ស្តីពីការចៀសវាងការយកពន្ធត្រួតគ្នា ៕
