ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅរសៀលថ្ងៃទី១៩ ខែវិច្ឆិកា ឆ្នាំ២០២២នេះ បានប្រកាសថា នឹងចាប់ផ្ដើម ចេញបំពេញការងារ ទាំងជំនួបផ្ទាល់ ក៏ដូចជាកម្មពិធីផ្សេងៗ ចាប់ពីស្អែកនេះ ខណៈជំងឺកូវីដ១៩ ត្រូវបានជាសះស្បើយ។
នៅលើគណនីហ្វេសប៊ុក សម្ដេចតេជោ ហ៊ុន សែន បានសរសេរយ៉ាងដូច្នេះថា «បងប្អូនជនរួមជាតិជាទីគោរពស្រឡាញ់! មកដល់ពេលនេះមេរោគកូវីដ.១៩ត្រូវបាន ធ្វើតេស្តអវិជ្ជមានទាំងស្រុងហើយ។ គ្រូពេទ្យដែលព្យាបាលខ្ញុំចេញលិខិត បញ្ជាក់ដូចមានភ្ជាប់ជាមួយ»។
សម្ដេចគូសបញ្ជាក់ថា «ចាប់ពីថ្ងៃអាទិត្យស្អែកនេះ និងពេញមួយ សប្តាហ៍ខ្ញុំមានកម្មវិធីពេញទាំងអស់ តែច្បាស់ជាមិនហត់ពេកនោះទេ» ។
ឆ្លៀតក្នុងឱកាស សម្ដេចតេជោ ហ៊ុន សែន ក៏បានផ្ញើរសារ អរគុណដល់ បងប្អូនជនរួមជាតិ ដែលបារម្មណ៍និងបានជូនពរដល់រូបសម្ដេច ផងដែរ។
សូមរំលឹកថា សម្ដេចតេជោ ហ៊ុន សែន បានផ្អាកជំនួបការងារ និងអញ្ជើញជាអធិបតីក្នុងកម្មវិធីផ្សេងៗអស់រយៈពេលប្រមាណ៥ថ្ងៃហើយ បន្ទាប់ពីរកឃើញវិជ្ជមានជំងឺកូវីដ១៩ កាលពីថ្ងៃទី១៥ ខែវិច្ឆិកា ឆ្នាំ២០២២ ពេលអញ្ជើញទៅចូលរួមកិច្ចប្រជុំកំពូលG20 នៅកោះបាលី ប្រទេសឥណ្ឌូនេស៊ី៕
