ភ្នំពេញ៖ ជាមួយនឹងការសាទរ ចំពោះទំនាក់ទំនងល្អ រវាងកងទ័ពទាំងពីរ កម្ពុជា-ចិន ដែលកំពុងមាន និងកិច្ចសហប្រតិបត្តិការល្អប្រកបដោយផ្លែផ្កា លោក វ៉ី ហ្វុងហឺ (Wei Fenghe) រដ្ឋមន្ត្រីការពារជាតិ នៃសាធារណរដ្ឋប្រជាមានិតចិន បានប្រកាសថា នឹងបន្តជួយដល់កម្ពុជា បន្ថែមទៀត។ នេះបើយោងតាមហ្វេសប៊ុក សម្ដេចតេជោ ហ៊ុន សែន។
ការប្រកាសនេះ ធ្វើឡើង ក្នុងជំនួបពិភាក្សាការងារ រវាងសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាមួយនឹងលោក វ៉ី ហ្វុងហឺ (Wei Fenghe) រដ្ឋមន្ត្រីការពារជាតិ នៃសាធារណរដ្ឋប្រជាមានិតចិន ខណៈលោកបានមកចូលរួមកិច្ចប្រជុំ រដ្ឋមន្ត្រីការពារជាតិអាស៊ាន និងកិច្ចប្រជុំរដ្ឋមន្ត្រីការពារជាតិបូក ដែលនឹងប្រព្រឹត្ត ទៅនៅខេត្តសៀមរាប នាថ្ងៃទី២៣ វិច្ឆិកា ខាងមុខ។
លោក អ៊ាង សុផល្លែត ជំនួយការផ្ទាល់ សម្តេចតេជោ ហ៊ុន សែន បានឱ្យដឹងថា នៅក្នុងជំនួបនេះ លោក វ៉ី ហ្វុងហឺ បានគោរពវាយតម្លៃខ្ពស់ និងសម្ដែងនូវការអបអរសាទរជូនសម្ដេចតេជោ ចំពោះការអភិវឌ្ឍន៍យ៉ាងឆាប់រហ័ស របស់កម្ពុជា ជាមួយនឹងការដឹកនាំ កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ទទួលបានលទ្ធផល យ៉ាងជោគជ័យ។
លោក វ៉ី ហ្វូងហឺ ក៏បានសម្ដែងនូវការរីករាយ ចំពោះទំនាក់ទំនងរវាងប្រទេសទាំងពីរ ជាពិសេសរវាងកងទ័ព និងកងទ័ពដែលកំពុងមានទំនាក់ទំនងល្អ និងកិច្ចសហប្រតិបត្តិការល្អប្រកបដោយផ្លែផ្កា។ ឆ្លៀតក្នុងឱកាសនោះដែរ លោកក៏បានជម្រាបជូនសម្ដេចតេជោ ថា ចិន នឹងបន្តជួយដល់កម្ពុជា ថែមទៀត។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះ លោក វ៉ី ហ្វុងហឺ ដែលបានមកចូលរួម កិច្ចប្រជុំរដ្ឋមន្ត្រីការពារជាតិ អាស៊ានបូក ដោយផ្ទាល់ ហើយក៏បានថ្លែងអំណរគុណ ជូនលោកផងដែរ ចំពោះការវាយតម្លៃ អំពីការរីកចម្រើនរបស់កម្ពុជា និងការដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធកន្លងទៅ រួមជាមួយនឹង ការថ្លែងអំណរគុណ ដល់ជំនួយរបស់មិត្តចិន ដែលបានចូលរួមចំណែក ក្នុងការអភិវឌ្ឍន៍ ទាំងធនធានមនុស្ស និងការអភិវឌ្ឍន៍របស់កម្ពុជា ៕
