ភ្នំពេញ៖ កងពលតូចលេខ៧០ នាថ្ងៃទី២៩ ខែធ្នូ ឆ្នាំ២០២២ បានចូលរួមរៀបចំស្តង់ពិព័រណ៍ ដាក់បង្ហាញនូវរូបថត ឧបករណ៍សង្គ្រោះរបស់កងប្រតិបត្តិការរុករក និងសង្គ្រោះគ្រោះមហន្តរាយ៧១១ ឧបករណ៍ពន្លត់អគ្គិភ័យ ក្នុងពិធីពិព័រណ៍ អបអរសាទរខួប២៤ឆ្នាំ នៃការបញ្ចប់សង្គ្រាមស៊ីវិលនៅកម្ពុជា ក្រោមនយោបាយឈ្នះ-ឈ្នះ ២៩ ធ្នូ ១៩៩៨ – ២៩ ធ្នូ ២០២២។
សូមបញ្ជាក់ថា មានរយៈពេល២៤ឆ្នាំហើយ ដែលកម្ពុជា រកបាននូវសុខសន្តិភាពពេញលេញ និងមានការឯកភាពជាតិទាំងស្រុង ជាប្រវត្តិសាស្ត្រ។ ការបិទបញ្ចប់សង្គ្រាមហែកហួរ និងការបែកបាក់ជាតិនេះ បានកើតមានឡើង តាមរយៈនយោបាយឈ្នះ-ឈ្នះ របស់សម្តេចតេជោ ហ៊ុន សែន។
នយោបាយឈ្នះ-ឈ្នះ គឺជាយុទ្ធសាស្ត្រគោលការណ៍ទាំងឡាយណា ដែលនឹងនាំមកនូវការធានាដល់សន្តិសុខសង្គម ការបង្រួបបង្រួមជាតិ ឯកភាពជាតិ សនិ្តភាព ការធានាដល់បូរណភាពដែនដី អធិបតេយ្យ និងការអភិវឌ្ឍសេដ្ឋកិច្ច នយោបាយសង្គមប្រកបដោយចិរីភាព។
សូមជម្រាបផងដែរថា ពិធីពិព័រណ៍ អបអរសាទរ ខួប២៤ឆ្នាំ នៃការបញ្ចប់សង្គ្រាមស៊ីវិលនៅកម្ពុជា ក្រោមនយោបាយឈ្នះ-ឈ្នះ គឺបើអោយប្រជាពលរដ្ឋចូលរួម ទស្សនាដោយសេរី ដែលពិធីប្រារព្វឡើងចាប់ពីថ្ងៃទី២៩ រហូតដល់ថ្ងៃទី៣១ ខែធ្នូ ឆ្នាំ២០២២ ទីតាំងនៅវិមាន ឈ្នះ-ឈ្នះ៕
