ភ្នំពេញ ៖ នាយកដ្ឋានព័ត៌មានវិទ្យា នៃក្រសួងមហាផ្ទៃ បានបង្ហាញបទល្មើសបច្ចេកវិទ្យាធំៗ ចំនួន៥ ប្រចាំឆ្នាំ២០២២ បន្ទាប់ពីបច្ចេកវិទ្យាឌីជីថល និងបណ្តាញអ៊ីនធឺណិត បានក្លាយជាចលករ ដ៏មានសក្តានុពល សម្រាប់មនុស្សក្នុង សកលលោកទាំងមូល។
តាមរយៈគេហទំព័រហ្វេសប៊ុករបស់ នាយកដ្ឋានព័ត៌មានវិទ្យា នាថ្ងៃទី៣ ខែមករា ឆ្នាំ២០២៣ បានឱ្យដឹងថា «ទន្ទឹមនឹងការរីកចម្រើននៃបច្ចេកវិទ្យាឌីជីថល បញ្ហាប្រឈមក៏បានកំពុងកើតឡើងជារៀងរាល់ថ្ងៃ ដោយជនខិលខូច ឬឧក្រិដ្ឋជន បានទាញយកនូវបច្ចេកវិទ្យាជាមធ្យោបាយក្នុងប្រព្រឹត្តិអំពើល្មើស តួយ៉ាង៖ ការវាយប្រហារតាមបណ្តាញអ៊ីនធឺណិត អំពើឆបោកប្រាក់ អំពើលួចយកនូវទិន្នន័យ អំពើក្លែងអត្តសញ្ញាណ និងអំពើស៊ើបការសម្ងាត់ផ្សេងៗ»។ បទល្មើសបច្ចេកវិទ្យាធំៗ ចំនួន៥ ប្រចាំឆ្នាំ២០២២ មានដូចជា៖
ទី១-ការដាក់ធ្នាក់លួចយក នូវព័ត៌មាន (Phishing Attack)៖ ឧក្រិដ្ឋជនប្រើប្រាស់កម្មវិធីបណ្តាញសង្គម ឬអ៊ីម៉ែល ក្នុងការបញ្ឆោតជនរងគ្រោះ ចូលទៅកាន់គេហទំព័រក្លែងបន្លំនិងលួចយកនូវព័ត៌មាន។
ទី២-ការខលទូរសព្ទបញ្ឆោត លួចព័ត៌មាន (Vishing Attack)៖ ឧក្រិដ្ឋជនធ្វើការខលចូលទូរសព្ទរបស់ជនរងគ្រោះ និងបានប្រើប្រាស់បច្ចេកទេស វិស្វកម្មបណ្តាញសង្គម (Social Engineering) ដើម្បីឆោបោកជនរងគ្រោះលួចយកនូវព័ត៌មាន។
ទី៣-ការវាយប្រហារផ្អាកដំណើរការប្រព័ន្ធ (Distributed Denial of Service Attacks)៖ ឧក្រិដ្ឋជនប្រើប្រាស់ឧបករណ៍បច្ចេកវិទ្យា ដែលឆ្លងនូវមេរោគ និងបញ្ជាឧបករណ៍ទាំងនោះដើម្បីចូលរួមប្រតិបត្តិការវាយប្រហារផ្អាកដំណើរការប្រព័ន្ធ។
ទី៤-ការលួចអត្តសញ្ញាណ (Identity Theft)៖ ឧក្រិដ្ឋជនលួចយកនូវអត្តសញ្ញាណជនរងគ្រោះ ពីកម្មវិធីបណ្តាញទំនាក់ទំនងសង្គម ការជ្រៀតចូលប្រព័ន្ធ ឬឧបករណ៍ប្រើប្រាស់របស់ជនរងគ្រោះ បន្ទាប់មកយកអត្តសញ្ញាណទាំងនោះទៅប្រើប្រាស់ ឬលក់ ឬចែកចាយលើទីផ្សារងងឹត។
និងទី៥-មេរោគជម្រិតទារប្រាក់ (Ransomware Attacks)៖ ឧក្រិដ្ឋជនប្រើប្រាស់បច្ចេកទេស Phishing ឬជាការបង្កត់មេរោគក្នុងឯកសារ (File) ដែលបានបង្ហោះចែកចាយលើបណ្តាញអ៊ីនធឺណិត ដូចជាឯកសារកម្មវិធី ឬឯកសារវីដេអូ ជាដើម។
លើសពីនេះ នាយកដ្ឋានព័ត៌មានវិទ្យា ធ្វើការក្រើនរំលឹកដល់ប្រជាពលរដ្ឋ មេត្តាស្វែងយល់អំពីបច្ចេកវិទ្យាដែលខ្លួនកំពុងប្រើប្រាស់ តួយ៉ាងកម្មវិធីបណ្តាញសង្គម (Facebook, Telegram, Instagram, Messenger, WhatsApp) ឧបករណ៍បច្ចេកវិទ្យា (កុំព្យូទ័រ ទូរសព្ទ ទូរទស្សន៍ កាម៉េរ៉ាសុវត្ថិភាព។ល។) និងធ្វើការកំណត់នូវសុវត្ថិភាព (Security Settings) បន្ថែម។
យោងរបាយការណ៍របស់ ភ្នាក់ងារសន្តិសុខសាយប័រ និងហេដ្ឋារចនាសម្ព័ន្ធអាមេរិក (The US Cybersecurity and Infrastructure Security Agency) បានរាយការណ៍ថា បទល្មើសបច្ចេកវិទ្យាបានកើនឡើង ៦២% នៅឆ្នាំ២០២២ ដោយបណ្តាបទល្មើសទាំងនោះកាន់តែមានភាពសាមញ្ញជាងមុន ដូចជាការជ្រៀតចូលប្រព័ន្ធ និងការឆបោក ដោយប្រើប្រាស់បច្ចេកទេសធម្មតា ទៅលើគោលដៅនៃការវាយប្រហារ៕
