កំពង់ចាម ៖ ក្នុងកិច្ចប្រជុំបូក សរុបការងារភូមិមួយ ផលិតផលមួយ ឆ្នាំ២០២២ និងលើកទិសដៅ ឆ្នាំ២០២៣ នៅសាលាខេត្តកំពង់ចាម នាព្រឹកថ្ងៃទី២៦ ខែមករា ឆ្នាំ២០២៣ នេះ អភិបាលខេត្តកំពង់ចាម លោក អ៊ុន ចាន់ដា ណែនាំឲ្យភាគីពាក់ព័ន្ធ និងវិស័យឯកជន ជម្រុញការងារចលនា ភូមិមួយផលិតផលមួយ ឱ្យមានដំណើរការ កាន់តែល្អប្រសើរឡើង ។
![](https://dap-news.com/wp-content/uploads/2023/01/photo_2023-01-26_12-45-15-671x1024.jpg)
លោកអភិបាលខេត្ត បានមានប្រសាសន៍ថា ការជួបជុំគ្នាក្នុងពេលនេះ គោលបំណងរួមគឺចង់ឱ្យភាគី ពាក់ព័ន្ធទាំងអស់ចូលរួមគាំទ្រ និងជម្រុញការងារចលនា ភូមិមួយផលិតផលមួយឱ្យមានដំណើរការ កាន់តែល្អប្រសើរ ហើយបើពិនិត្យជារួមឃើញថាសមាសភាពភាគច្រើនមកចូលរួមនាព្រឹក នេះ គឺជាវិស័យឯកជន ដែលមានមា្ចស់សិប្បកម្ម សេវាកម្ម សហគ្រាស អាជីវករ ផលិតករ អាជិវករ ជាពិសេស ម្ចាស់ផលិតផលប្រមាណជិត ៤០រូប ដែលជាសមាជិកចលនាភូមិមួយ ផលិតផលមួយ នៃគណៈកម្មាធិការជម្រុញចលនាភូមិមួយផលិតផលមួយខេត្តកំពង់ចាម ។
លោកអភិបាលខេត្តបានបន្តថា ជាការពិត វិស័យឯកជនជាផ្នែកមួយយ៉ាងសំខាន់ ហើយត្រូវចាត់ទុកជាឆ្អឹងខ្នងដ៏រឹងមាំក្នុងការទ្រទ្រង់សេដ្ឋកិច្ចជាតិ ។ តាមខ្លឹមសារនៃគោលនយោបាយជាតិ ចលនាភូមិមួយផលិតផលមួយ គឺជាការអភិវឌ្ឍសេដ្ឋកិច្ចជនបទ និងការអភិវឌ្ឍចម្រុះ នៅតាមសហគមន៍ ដែលសកម្មភាពនេះ គឺជា កម្លាំងចលករដ៏សំខាន់ និងមានប្រសិទ្ធភាព ក្នុងការចូលរួមចំណែកជួយពន្លឿនសេដ្ឋកិច្ចជាតិ។ ប៉ុន្តែទោះជាយ៉ាងណា ដើម្បីធ្វើឱ្យដំណើរ ការអនុវត្តចលនាភូមិមួយ ផលិតផល មួយមានស្ថេរភាព និងរីកចម្រើនបាន ទាំងអស់គ្នា ត្រូវប្រកាន់ខ្ជាប់ អនុវត្តតាមគោលការណ៍ គ្រឹះសំខាន់ ៣គឺ ៖
![](https://dap-news.com/wp-content/uploads/2023/01/photo_2023-01-26_12-45-20-1024x682.jpg)
ទី១ គិតជាសកល ដោយធ្វើតាមមូលដ្ឋាន គឺសំដៅទៅលើគំនិតដែលស្ថិតនៅជាប់ជាមួយនឹងវប្បធម៌ ប្រពៃណីដែលមាននៅតាមមូលដ្ឋាន ហើយពួកគេបង្កើត ផលិតផលទាំងឡាយ ដែលអាចរកទីផ្សារបាន ។
ទី២ ការពឹងផ្អែកលើខ្លួនឯង និងការឆ្នៃប្រឌិតរស់រវើក មានន័យថា ប្រជាជនក្នុងមូលដ្ឋាន អាចសម្រេចចិត្តផលិតនូវផលិតផលនានា ទាំងទំនិញ និងសេវាកម្ម សម្រាប់ចលនាភូមិមួយ ផលិតផលមួយ ដែលនៅក្នុងមូលដ្ឋានយើង ហើយរដ្ឋបាលមូលដ្ឋាននោះ ត្រូវមានភារកិច្ចសម្របសម្រួល ផ្នែកបច្ចេកទេស និងទីផ្សារ ។
![](https://dap-news.com/wp-content/uploads/2023/01/photo_2023-01-26_12-45-24-1024x637.jpg)
ទី៣ កត្តាជោគជ័យ របស់ភូមិមួយផលិតផលមួយ គឺការអភិវឌ្ឍធនធានមនុស្ស ហើយចលនានេះ នឹងពុំអាចទទួលជោគជ័យបាន ប្រសិនបើគ្មានការប្រមើល មើលទៅថ្ងៃមុខ នូវអ្នកដឹកនាំតាមមូលដ្ឋានទាំងនោះ ។ ដូច្នេះ ជាការចាំបាច់ត្រូវអភិវឌ្ឍសហគមន៍មួយដោយត្រូវឆ្លើយតបប្រកបដោយច្នៃប្រឌិតរស់រវើក ក្នុងខណៈពេលដែលមានការប្រឈមមុខនឹង ការលំបាក ឬហានិភ័យផ្សេងៗ ។
លោកអភិបាលខេត្ត បានបញ្ជាក់ថា ពាក់ព័ន្ធនឹងគោលការណ៍នេះ សម្រាប់ខេត្តកំពង់ចាមពិតជាមានសក្តានុពលគ្រប់គ្រាន់ ក្នុងការឆ្លើយតបទៅនឹង គោលនយោបាយជាតិ ចលនាភូមិមួយ ផលិតផលមួយ ជាក់ស្តែងគិតត្រឹមឆ្នាំ២០២៣ នេះ ថ្នាក់ជាតិបានទទួលស្គាល់ បញ្ចូលជាសមាជិកចលនា ភូមិមួយផលិតមួយបានចំនួន ៣៥ មុខផលិតផលរួចមកហើយ ។ ប៉ុន្តែយើងនៅមានផលិតផល ដែលមានសក្តានុពលជាច្រើនទៀត ដែលនឹងត្រូវជ្រើសរើសចាត់បញ្ចូលជាសមាជិក ។ ហេតុដូចនេះហើយ ប្រសិនបើមូលដ្ឋានយើងមានការគិតគូរ ផ្លាស់ប្តូរឥរិយាបទ មានឆន្ទៈមោះមុត អនុវត្តឱ្យបាន តាមគោលការណ៍គ្រឹះសំខាន់ទាំង ៣ខាងលើ នោះមូលដ្ឋានយើង នឹងទទួលបានផលប្រយោជន៍ជាច្រើន ដូចជា បានបង្កើនការងារ នៅក្នុងសហគមន៍ ហើយធ្វើឱ្យមានការកាត់បន្ថយភាពគ្មានការងារធ្វើ និងការធ្វើចំណាកស្រុក ការបង្កើនបរិមាណផលិតផលក្នុងស្រុក ហើយគុណភាពត្រូវបានលើកកំពស់ និងទទួលបាននូវការជឿ ទុកចិត្តផងដែរ ៕
![](https://dap-news.com/wp-content/uploads/2020/08/1-1.png)