ភ្នំពេញ៖ នារសៀលថ្ងៃទី ១៩ ខែ មីនា ឆ្នាំ២០២៣ នៅបរិវេណវិទ្យាល័យបាក់ទូក មានប្រារព្ធកម្មវិធីបិទការប្រកួត ដណ្តើមពានរង្វាន់បាល់ទាត់មិត្តភាព តំណាងយុវនិស្សិតខេត្តបន្ទាយមានជ័យ រៀននៅរាជធានីភ្នំពេញ ក្រោមអធិបតីភាព ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថ រាជធានីភ្នំពេញ និង ឧត្តមសេនីយ៍ឯក ឡាយ គឹមលី នាយខុទ្ទកាល័យ លោកឧបនាយករដ្ឋមន្ត្រី កែ គឹមយ៉ាន និងជាអគ្គលេខាធិការរង នៃអគ្គលេខាធិការដ្ឋាន អាជ្ញាធរជាតិ ប្រយុទ្ធប្រឆាំងគ្រឿងញៀន។
ជាលទ្ធផលនៃការប្រកួត ក្នុងចំណោមក្រុមកីឡាតំណាង០៩ក្រុងស្រុក នៃខេត្តបន្ទាយមានជ័យ ម្ចាស់ជ័យលាភីលេខ១ បានទៅលើក្រុមកីឡាករ ស្រុកម៉ាឡៃ, លេខ២ បានទៅលើក្រុមកីឡាករ ក្រុងសិរីសោភ័ណ និងលេខ ៣ បានទៅលើក្រុមកីឡាករ ក្រុងប៉ោយប៉ែត។
លោក ឧត្តមសេនីយ៍ឯក រ័ត្ន ស្រ៊ាង បានលើកឡើងថា ពានរង្វាន់បាល់ទាត់មិត្តភាព តំណាងយុវនិស្សិត ខេត្តបន្ទាយមានជ័យនេះ បានបង្កើតឡើងក្រោមគំនិតផ្តួចផ្តើមដ៏ខ្ពង់ខ្ពស់ពី លោក នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងមានការគាំទ្រពី នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងជា ប្រធានសហព័ន្ធ បាល់ទាត់កម្ពុជា រីឯក្នុងនាមលោកផ្ទាល់ បានធានាឧបត្ថម្ភរាល់ការចំណាយទាំងស្រុងនៅគ្រប់ការប្រកួត ដែលក្នុងឆ្នាំនេះ គឺជាកម្មវិធីលើកទី៤ហើយ ខណៈដែលបច្ចុប្បន្ន មាននិស្សិតខេត្តបន្ទាយមានជ័យ កំពុងស្នាក់នៅនិងរៀនសូត្រ នៅរាជធានី ភ្នំពេញ មានរហូតដល់ចំនួន 3.792នាក់។
លោក សូមសម្តែងការកោតសរសើរយ៉ាងក្រៃលែង ចំពោះគណកម្មការ រៀបចំការប្រកួត និងក្រុមកីឡាករ ដែលបាន ចូលរួមដំណើរការកម្មវិធីមួយនេះ រហូតបញ្ចប់ដោយជោគជ័យ និងសូម សម្តែងនូវអារម្មណ៍ មនោសញ្ចេតនាជ្រាលជ្រៅ ចាត់ទុកការរៀបចំការប្រកួតមួយនេះ គឺពិតជាមានអត្ថន័យខ្លាំងណាស់ ព្រោះវាមិនត្រឹមតែ បាននាំមកនូវ សុខភាពប៉ុណ្ណោះទេ គឺថែមទាំងនាំមកជាមួយ នូវមនោសញ្ចេតនាផ្សារភ្ជាប់ នឹកដល់ ស្រុកកំណើត ព្រមទាំង សាមគ្គីភាព មិត្តភាព ហើយក៏ជា មាគ៌ាមួយ ជួយឲ្យយុវវ័យ ជៀសឆ្ងាយអំពី អំពើអបាយមុខ គ្រប់ប្រភេទជាពិសេស ជៀសឆ្ងាយពី គ្រឿងញៀន និងជាស្ពាន ឆ្ពោះទៅរកអាជីពការងារ ប្រកបដោយកិត្តិយស ជាឱកាសបង្កើតនូវមនោសញ្ចេតនាស្និទ្ធស្នាលមួយ រវាងយុវវ័យ ដែលរៀននៅសាលាផ្សេងគ្នា ស្រុកផ្សេងគ្នា បានមកស្គាល់ រាប់អានគ្នាប្រៀបដូចជា បងប្អូនសាច់ញាតិ ផងដែរ។
លោក បានមានប្រសាសន៍បន្ថែមថា គាប់ជួនណាស់ យើងនៅខ្វះតែ៤៧ថ្ងៃ រាប់ថយក្រោយទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេម លើកទី៣២ និងអាស៊ាន ប៉ារ៉ា ហ្គេម លើកទី១២ ដែលកម្ពុជាធ្វើជាម្ចាស់ផ្ទះ ក្នុងឆ្នាំ២០២៣ ដូច្នេះការរៀបចំការប្រកួត របស់យើង នាឱកាសនេះ គឺអាចនិយាយបានថា ជាផ្នែកមួយជួយបង្ហាញនូវ ការគាំទ្រ ព្រឹត្តិការដ៏អស្ចារ្យ របស់ជាតិយើងនាពេលខាងមុខ ហើយក៏ជាការរួមចំណែក បង្ហាញនូវការរីកចម្រើន លើវិស័យកីឡា បាល់ទាត់កម្ពុជា បន្ទាប់ពីបានចាប់ផ្តើមឡើងដោយបាតដៃទទេ ក្រោយរបប ៣ឆ្នាំ ០៨ខែ និង២០ថ្ងៃ ដែលការរីកចម្រើនទាំងនេះ ក៏ដោយសារមានការដឹកនាំ ដ៏ឈ្លាសវៀងវៃ របស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចតេជោ ជាស្ថាបនិក នយោបាយ ឈ្នះ ឈ្នះ ជាមគ្គុទ្ទេសក៍ឯក ដែលបាន នាំមកនូវ សន្តិភាព និងការឯកភាពជាតិពេញលេញដែលកម្ពុជា ពុំធ្លាប់មានជាង៥០០ឆ្នាំ ក្រោយសម័យអង្គរ ជាមេដឹកនាំដ៏ឆ្នើម ដែលបានដឹកនាំកម្ពុជា ឲ្យមានការរីកចម្រើន លើគ្រប់វិស័យ មានកិត្តិស័ព្ទ ល្បាញល្បីលើពិភពលោក ជាពិសេសក្នុងកាលៈទេសៈប្រឈមជាមួយ សភាពការណ៍រាតត្បាត នៃជំងឺឆ្លងកូវីដ-១៩ ដែលបានកើតឡើង នាពេលថ្មីៗនេះ សម្តេចតេជោបានដាក់ចេញនូវវិធានការ អន្តរាគមន៍ជាច្រើននិងមានប្រសិទ្ធិភាព ក្នុងការប្រឆាំង កូវីដ-១៩ បានស្តារនូវ ស្ថានភាពកម្ពុជា ឲ្យវិលមករកភាពប្រក្រតី យ៉ាងឆាប់រហ័ស ទើបយើងមានឱកាស រៀបចំកម្មវិធី ជួបជុំផ្សេងៗ ជាថ្មី ឡើងវិញយ៉ាងសប្បាយរីករាយ។
ឆ្លៀតក្នុងឱកាសនេះ លោកឧត្តមសេនីយ៍ឯក រ័ត្ន ស៊្រាង ក៏បានសម្តែងនូវការគោរពដឹងគុណយ៉ាងជ្រាលជ្រៅបំផុត ប្រកបដោយគារវភក្តី ដ៏ស្មោះអស់ពីដួងចិត្ត ប្រកាសគាំទ្រ យ៉ាងពេញទំហឹង សម្តេចអគ្គមហាសេនាបតី តេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់នីតិកាល ទី៧នៃរដ្ឋសភា និងគាំទ្រ ឯកឧត្តម ហ៊ុន ម៉ាណែត ជាបេក្ខភាព នាយករដ្ឋមន្ត្រី សម្រាប់ពេលអនាគត៕
