ភ្នំពេញ ៖ សម្រាប់កម្មករ កម្មការិនី ដែលនឹងធ្វើដំណើរ ទៅស្រុកកំណើត ក្នុងថ្ងៃឈប់សម្រាក រយៈពេល៣ថ្ងៃ ដើម្បីចូលរួមការបោះឆ្នោត ជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ខាងមុខនេះ អាចអញ្ជើញ ទៅកាន់ទីតាំងទាំង១០កន្លែង ដែលរដ្ឋបាល រាជធានីភ្នំពេញ បានត្រៀមរៀបចំ សម្រាប់ការចេញដំណើរ នៅថ្ងៃទី២២ ខែកក្កដា ឆ្នាំ២០២៣ ដែលនឹងលម្អិត នៅខាងក្រោមនេះ ។
យោងតាមសេចក្តីជូនដំណឹង របស់រដ្ឋបាលរាជធានីភ្នំពេញ ទីតាំងទាំង១០ចេញដំណើរ ពីរាជធានីភ្នំពេញ ទៅបណ្តាខេត្តទាំង២៤ នៅថ្ងៃទី២២ ខែកក្កដា ឆ្នាំ២០២៣ ចាប់ផ្តើមពីម៉ោង ៥:៣០នាទីព្រឹក រួមមាន ៖
១ មុខបញ្ជាការដ្ឋាន កងរាជអាវុធហត្ថរាជធានីភ្នំពេញ
២ សួនឧស្សាហកម្មវឌ្ឍន
៣ សួនឧស្សាហកម្មកាណាឌីយ៉ា
៤ ផែស្ងួតសូងួន
៥ មុខអាកាសយានដ្ឋាន អន្តរជាតិភ្នំពេញ
៦ បណ្ដោយផ្លូវជាតិលេខ៤ មុខរោងចក្រហេនសឺវេន & អតីតរោងចក្រខាំបូហេនសាំ (បុរីសែនមនោរម្យ)
៧ ផ្លូវ៦០ម៉ែត្រ (អតីតស្តុបក្រុមហ៊ុនមែកសឺដេស)
៨ តំបន់សេដ្ឋកិច្ចភ្នំពេញរ៉ូយ៉ាល់
៩ រង្វង់មូលទេពមច្ឆា (ជ្រោយចង្វារ)
និង ១០ ចំណតរថយន្តក្រុង សួនច្បារឫស្សីកែវ
គួរឲ្យដឹងថា អនុវត្តតាមប្រសាសន៍ដឹកនាំ ដ៏ខ្ពង់ខ្ពស់បំផុតរបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋបាលរាជធានីភ្នំពេញ សូមជម្រាបជូនដំណឹង ដល់បងប្អូនកម្មករ-និយោជិត និង ប្រជាពលរដ្ឋទាំងអស់ ឱ្យបានជ្រាបថា ដើម្បីជួយសម្រួល ដល់ការធ្វើដំណើរ របស់បងប្អូនកម្មករ-និយោជិត និង ប្រជាពលរដ្ឋទៅស្រុកកំណើត នៅថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៧ ថ្ងៃទី២៣ ខែកក្កដា ឆ្នាំ២០២៣ និងការផ្តល់សេវាដឹកជញ្ជូន សាធារណៈប្រចាំថ្ងៃ ជូនបងប្អូនប្រជាពលរដ្ឋ នៅរាជធានីភ្នំពេញ រដ្ឋបាលរាជធានីភ្នំពេញ បានរៀបចំរថយន្តក្រុងចំនួន ៤៣០គ្រឿង សម្រាប់បម្រើសេវាដឹកជញ្ជូនសាធារណៈ ដោយចេញដំណើរពីរាជធានីភ្នំពេញ នៅថ្ងៃទី២២ ខែកក្កដា ឆ្នាំ២០២៣ និងធ្វើដំណើរត្រឡប់ពីខេត្ត មករាជធានីភ្នំពេញវិញ នៅថ្ងៃទី២៤ ខែកក្កដា ឆ្នាំ២០២៣ ដោយមិនបង់ប្រាក់ និងមិនប្រកាន់និន្នាការនយោបាយណាមួយឡើយ ។
ក្នុងនោះរដ្ឋបាលរាជធានីភ្នំពេញ បានបែងចែកជា២ ដោយទី១-សម្រាប់សេវាដឹកជញ្ជូនប្រជាពលរដ្ឋ នៅក្នុងរាជធានីភ្នំពេញ ប្រើប្រាស់រថយន្តក្រុងចំនួន ៨០គ្រឿង។ ទី២-សម្រាប់សេវាដឹកជញ្ជូន បងប្អូនកម្មករ-និយោជិត និងប្រជាពលរដ្ឋ ដែលនឹងធ្វើដំណើរ ពីរាជធានីភ្នំពេញ ទៅតាមបណ្តាខេត្ត នឹងពីបណ្តាខេត្ត ត្រឡប់មករាជធានីភ្នំពេញវិញ ប្រើប្រាស់រថយន្តក្រុងចំនួន ៣៥០គ្រឿង ។
សូមបញ្ជាក់ថា សម្រាប់ម៉ោងចេញដំណើរ ពីរាជធានីភ្នំពេញ ទៅតាមបណ្តាខេត្តមួយចំនួន មាន ០២ជើងរត់ និង០៣ជើងរត់ដូចខាងក្រោម៖
-ខេត្តព្រៃវែង ០២ជើងរត់៖ជើងទី១ ម៉ោង ៥:៣០នាទី និង ជើងទី២ ម៉ោង ១៤:០០នាទី
-ខេត្តតាកែវ ០២ជើងរត់៖ជើងទី១ ម៉ោង ៥:៣០នាទី និង ជើងទី២ ម៉ោង ១៤:០០នាទី
-ខេត្តកំពង់ឆ្នាំង ០២ជើងរត់៖ជើងទី១ ម៉ោង ៥:៣០នាទី និង ជើងទី២ ម៉ោង ១៤:០០នាទី
-ខេត្តកំពង់ចាម ០២ជើងរត់៖ជើងទី១ ម៉ោង ៥:៣០នាទី និង ជើងទី២ ម៉ោង ១៤:០០នាទី
-ខេត្តកំពង់ស្ពឺ ០៣ជើងរត់៖ជើងទី១ ម៉ោង ៥:៣០នាទី និង ជើងទី២ ម៉ោង ១០:០០នាទី និងជើងទី៣ ម៉ោង ១៤:០០នាទី៕
