ភ្នំពេញ ៖ ក្រសួងមហាផ្ទៃ បានស្នើឲ្យតំណាងស្ថាបនិក គណបក្សកម្លាំងជាតិ ត្រូវធ្វើការកែសម្រួលឡើងវិញ នូវសញ្ញាសម្គាល់របស់គណបក្ស ដោយសារតែរូបសញ្ញា «ផ្ការំដួល» ជាផ្កានិមិត្តរូប នៃព្រះរាជាណាចក្រកម្ពុជា ។
យោងតាមលិខិតរបស់ក្រសួងមហាផ្ទៃប្រាប់ លោក ស៊ុន ចន្ធី តំណាងស្ថាបនិក គណបក្សកម្លាំងជាតិ នាថ្ងៃទី២៥ កក្កដា ក្រសួងមហាផ្ទៃ បានទទួលរួចហើយ នូវលិខិតជូនដំណឹង អំពីការបំពេញតាមលក្ខខណ្ឌកំណត់ ក្នុងបទប្បញ្ញត្តិ នៃច្បាប់ស្តី ពីគណបក្សនយោបាយ។
ពាក់ព័ន្ធនឹងករណីនេះ ក្រសួងមហាផ្ទៃ គូសបញ្ជាក់ថា «ស្នើឲ្យតំណាងស្ថាបនិកគណបក្ស ត្រូវធ្វើការកែសម្រួលឡើងវិញ នូវសញ្ញាសម្គាល់របស់គណបក្ស ដោយសារតែរូបសញ្ញា ផ្ការំដួល ជាផ្កានិមិត្តរូប នៃព្រះរាជាណាចក្រកម្ពុជា ត្រូវបានកំណត់ក្នុងព្រះរាជក្រឹត្យ ស្តីពីការកំណត់ប្រភេទសត្វ និងរុក្ខជាតិសម្រាប់ ជានិមិត្តរូប នៃព្រះរាជាណាចក្រកម្ពុជា» ៕
