បរទេស៖អគ្គលេខាធិការរងលោក Rosemary DiCarlo បានថ្លែងប្រាប់ទៅកាន់ក្រុមប្រឹក្សាសន្តិសុខកាលពីថ្ងៃព្រហស្បតិ៍ម្សិលមិញនេះថាអង្គការសហប្រជាជាតិមានការព្រួយបារម្ភយ៉ាងខ្លាំងចំពោះការបាញ់ផ្លោង និងការវាយប្រហារដោយយន្តហោះគ្មានមនុស្សបើកលើជនស៊ីវិលរុស្ស៊ី ដែលនេះគឺជាសកម្មភាពបំពានច្បាប់អន្តរជាតិ។
យោងតាមការចេញផ្សាយរបស់ RT អស់រយៈពេល៣ខែចុងក្រោយនេះអ៊ុយក្រែនបានបង្កើនការវាយប្រហាររបស់ខ្លួនតាមរយៈកាំភ្លើងធំនិងដ្រូនផងទៅលើតំបន់ជាច្រើនក្នុងប្រទេសរុស្សិដូចជា Donetsk, Kursk និង Belgorod ទោះបីជាលទ្ធផលហាក់ដូចជាមិនទទួលបានអ្វីតាមការចង់បានរបស់ខ្លួនក្តី។
រដ្ឋាភិបាលទីក្រុងគៀវក៏បានបង្កើនការប៉ុនប៉ងដើម្បីកំណត់គោលដៅវាយប្រហារលើតំបន់ហិរញ្ញវត្ថុរបស់ទីក្រុងមូស្គូជាមួយនឹងយន្តហោះគ្មានមនុស្សបើកដែលជាក់ស្តែង យន្តហោះ ដ្រូនជាច្រើនបានហោះរំលងតំបន់ការពារអាកាសនៃរដ្ឋធានីរុស្ស៊ី បានបង្កការខូចខាតទ្រព្យសម្បត្តិតិចតួច ប៉ុន្តែរហូតមកដល់ពេលនេះមិនមានអ្នករងរបួសក្តី។
លោក DiCarlo អ្នកការទូតជនជាតិអាមេរិកដែលមើលការខុសត្រូវកិច្ចការនយោបាយ និងសន្តិភាពចាប់តាំងពីឆ្នាំ២០១៨បាននិយាយយើងក៏មានការព្រួយបារម្ភផងដែរអំពីផលប៉ះពាល់ដែលអាចកើតមានលើជនស៊ីវិលនៃការបាញ់ផ្លោងសំដៅទឹកដីនិងព្រំដែនរុស្ស៊ី ជាពិសេសការវាយប្រហារដោយយន្តហោះគ្មានមនុស្សបើកនៅខាងក្នុងប្រទេសរុស្ស៊ី រួមទាំងទីក្រុងម៉ូស្គូផងដែរ៕
ប្រែសម្រួល៖ស៊ុនលី
