រដ្ឋសភា បើកសម័យប្រជុំពេញអង្គ ប្រកាសសុពលភាព តំណាងរាស្រ្តថ្មី ២៩រូប និងបោះឆ្នោតឆ្នោត ជ្រើសតាំងសមាជិក ក្រុមប្រឹក្សាធម្មនុញ្ញ

ភ្នំពេញ ៖ ​រដ្ឋសភា នៃព្រះរាជាណាចក្រកម្ពុជា បានបន្តបើកសម័យប្រជុំ ពេញអង្គរ ដើម្បីប្រកាសសុពលភាព តំណាងរាស្រ្តថ្មី ២៩រូប និងបោះឆ្នោតឆ្នោតជ្រើស តាំងសមាជិកក្រុមប្រឹក្សាធម្មនុញ្ញ ។

សម័យប្រជុំរដ្ឋសភាលើកទី១ នីតិកាលទី៧ធ្វើឡើងនាព្រឹកថ្ងៃព្រហស្បតិ៍ ទី៣១ ខែសីហា ឆ្នាំ២០២៣ ក្រោមអធិបតីភាព លោកស្រីឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដោយមានវត្តមានសមាជិកសមាជិការដ្ឋសភា ពេលចាប់ផ្តើមសម័យប្រជុំ ចំនួន ៨៧រូប ។ របៀបវារៈ នៃការបន្តសម័យប្រជុំលើកទី១ នីតិកាលទី៧ នាឱកាសនេះ មានចំនួន២ គឺ៖ ១- ការសម្រេចអំពីសុពលភាព នៃអាណត្តិរបស់បេក្ខជនជាប់ឆ្នោត តំណាងរាស្ត្រ នីតិកាលទី៧ នៃរដ្ឋសភា ចំនួន ២៩រូប ជំនួសតំណាងរាស្ត្រ ដែលបានសុំលាលែង និង២- ការបោះឆ្នោតជ្រើសតាំង លោក ​យក់ ង៉ុយ ជាសមាជិកក្រុមប្រឹក្សាធម្មនុញ្ញ ជំនួស លោក សំ ព្រហ្មនា សមាជិកក្រុមប្រឹក្សាធម្មនុញ្ញ ដែលបានទទួលមរណភាព ជ្រើសតាំងដោយរដ្ឋសភា នីតិកាលទី៧ ៕