ភ្នំពេញ៖ កម្មវិធី “វេទិកាការងារ” ដែលសហការរៀបចំដោយ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងស.ស.យ.ក. វិស័យការងារ និងបណ្តុះបណ្តាលវិជ្ជាជីវៈ បានបញ្ចប់ទៅដោយរលូន និងមានបងប្អូន យុវជន សិស្ស/និស្សិត អ្នកស្វែងរកការងារធ្វើប្រមាណ ៣០០ នាក់បានចូលរួមដាក់ពាក្យ និងសម្ភាសការងារភ្លាមៗជាមួយមន្ត្រីធនធានមនុស្សរបស់ក្រុមហ៊ុនទាំង ៦ ដែលបានចូលរួមកាលពីថ្ងៃម្សិញនេះ។ ជាលទ្ធផល អ្នកស្វែងរកការងារចំនួន ៩០ នាក់ បានសម្ភាសជាប់ ដោយក្នុងនោះ អ្នកជាប់ស្ថាពរមានចំនួន១០ នាក់ និង អ្នកជាប់បឋមចំនួន ៨០នាក់។
![](https://dap-news.com/wp-content/uploads/2023/09/2F4A9961-1024x683.jpg)
លោកស្រី មាន ស្រីស្រស់ ជាមន្ត្រីជ្រើសរើសបុគ្គលិកមីក្រូហិរញ្ញវត្ថុ ចម្រើន បានលើកឡើងថា នៅក្នុងវេទិកាការងារដែលរៀបចំដោយ NEA ពិតជាមានបេក្ខជនច្រើនណាស់ មកចូលរួមដាក់ពាក្យ និងសម្ភាសការងារ។ លោកស្រីបន្តថា៖ «ក្រុមការងាររបស់ខ្ញុំ ដែលមកចូលរួមជាមួយនឹង NEA ស្ទើរតែពុំមានពេលសម្ភាស បងប្អូនដែលមកស្វែងរកការងារ ត្បិតក្រុមការងារមានចំនួនតិច ហើយអ្នកមកចូលរួមមានចំនួនច្រើន»។
![](https://dap-news.com/wp-content/uploads/2023/09/2F4A9848-1024x683.jpg)
លោក គឹម សុបញ្ញា មន្ត្រីជាន់ខ្ពស់ផ្នែកជ្រើសរើស បុគ្គលិកធនាគារ អ៊ូរី លើកឡើងថា ទីតាំង NEA គឺជាកន្លែងជួបគ្នាដោយងាយស្រួលរវាង តំណាងក្រុមហ៊ុន និងអ្នកស្វែងរកការងារធ្វើ។ លោកបន្ថែមថា ប្រសិនបើ សិស្ស/និស្សិត ឬអ្នកមានបំណងចង់ស្វែងរកការងារធ្វើ សូមកុំភ្លេច NEA ដែលជាប្រភពនៃព័ត៌មាន ការងារយ៉ាងច្រើនសម្បូរបែប។ លោកក៏សូមថ្លែងអំណរអគុណ ដែល NEA ក៏ដូចជាក្រសួងការងារ ដែលតែងតែសម្របសម្រួលដល់ក្រុមហ៊ុន ក្នុងការជ្រើសរើសបុគ្គលិក។
![](https://dap-news.com/wp-content/uploads/2023/09/2F4A9857-1024x683.jpg)
យុវជន ចន្ធូ រតនៈ រៀននៅវិទ្យាល័យហ៊ុនសែនកោះចិន បានសម្ភាសជាប់ជាស្ថាពរ នៅក្រុមហ៊ុន Master Suki Soup ផ្នែក Services លើកឡើងថាប្អូនពិតជាសប្បាយ រីករាយណាស់ដែលទទួលបាន ការងារតាមរយៈកិច្ចសម្ភាសការងារនេះ។ ប្អូនប្រុស ក៏បានអំពាវដល់យុវជនដែល មិនទាន់មានការងារធ្វើ ឬចង់ ផ្លាស់ប្ដូរការងារថ្មី សូមយក CV មកក្រសួង ការងារ ដើម្បីដាក់ពាក្យសម្ភាសការងារនៅ NEA ជាមួយក្រុមហ៊ុនធំៗជាច្រើន ដែលកំពុង មានតម្រូវការជ្រើសរើសបុគ្គលិក។
![](https://dap-news.com/wp-content/uploads/2023/09/2F4A9876-1024x683.jpg)
សម្រាប់យុវជន សិស្ស/និស្សិត ដែលមិនបានចូលរួម ក្នុងវេទិកាការងារក្នុងថ្ងៃនេះ សូមមកចុះឈ្មោះស្វែងរកការងារជាមួយ NEA ដើម្បីអាចចូលរួមក្នុងព្រឹត្តិការណ៍ការងារ និងវគ្គបណ្តុះបណ្តាលផ្សេងៗ ជាច្រើនដោយឥតគិតកម្រៃ ដែលរៀបចំជាបន្តបន្ទាប់ទៀតដោយ NEA រួមមាន៖ វេទិកាការងារ, កិច្ចសម្ភាសន៍ការងារ, វគ្គបណ្តុះបណ្តាលអំពីការត្រៀម លក្ខណៈសម្បត្តិចូលទីផ្សារការងារ និង ជំនាញទន់ ដើម្បីអាចទទួលបាន ការងារធ្វើកាន់តែឆាប់រហ័ស។
![](https://dap-news.com/wp-content/uploads/2023/09/2F4A9953-1024x683.jpg)
ដើម្បីទទួលព័ត៌មានបន្ថែមអំពីការចូលរួម ក្នុងវេទិកាការងារនាពេលក្រោយទៀត សូមទាក់ទងមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕
![](https://dap-news.com/wp-content/uploads/2023/09/2F4A9916-1024x683.jpg)
![](https://dap-news.com/wp-content/uploads/2023/09/2F4A9937-1024x683.jpg)
![](https://dap-news.com/wp-content/uploads/2023/09/2F4A0883-1024x683.jpg)
![](https://dap-news.com/wp-content/uploads/2023/09/IMGL9779-1024x683.jpg)
![](https://dap-news.com/wp-content/uploads/2023/09/2F4A0448-1024x683.jpg)
![](https://dap-news.com/wp-content/uploads/2023/09/IMGL9912-1024x683.jpg)
![](https://dap-news.com/wp-content/uploads/2020/08/1-1.png)