ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានទូរសព្ទជួបផ្ទាល់ ជាមួយក្រុមគ្រួសារ នៃសពឈ្មោះ ចាន់ ឧត្តម និស្សិតសាកលវិទ្យល័យភូមិន្ទកសិកម្ម ដែលបាត់បង់ជីវិតនៅអ៊ីស្រាអែលដេីម្បីបញ្ជាក់ពីការសោកស្តាយ និងចូលរួមរំលែកទុក្ខយ៉ាងក្រៀមក្រំបំផុត ។ នេះបើយោងតាមឆានែលតេឡេក្រាមសម្តេចធិបតី នាថ្ងៃ៨តុលា ។
![](https://dap-news.com/wp-content/uploads/2023/10/19-1-1024x768.jpg)
ក្នុងនោះសម្តេចធិបតី បានសម្តែង នូវសេចក្តីសោកស្តាយចំពោះការបាត់បង់ធនធានមនុស្សរបស់កម្ពុជា ដោយនិស្សិត ចាន់ ឧត្តម និស្សិតសាកលវិទ្យាល័យភូមិន្ទកសិកម្ម បានបាត់បង់ជីវិត ក្នុងការវាយប្រយុទ្ធគ្នា រវាងកងទ័ពអ៉ីស្រាអែល និងក្រុមហាម៉ាស់ ។
ក្នុងនោះផងដែរ សម្តេចធិបតីនាយករដ្ឋមន្ត្រី បានចាត់តាំងលោក មែ ស៉ីថន តំណាងខុទ្ទកាល័យរបស់សម្តេចធិបតីនាយករដ្ឋមន្ត្រី អញ្ជេីញទៅសាកសួរសុខទុក្ខ នាំនូវសារលិខិតមរណទុក្ខ និងរំលែកទុក្ខរបស់សម្តេចធិបតី និងសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជូនដល់ក្រុមគ្រួសារនៃសព។
![](https://dap-news.com/wp-content/uploads/2023/10/20-1-1024x768.jpg)
ប្រភពបានបញ្ជាក់ថា “សម្តេចធិបតីនាយករដ្ឋមន្ត្រី បានទូរសព្ទជួបផ្ទាល់ ជាមួយក្រុមគ្រួសារនៃសពនិស្សិតដែលបាត់បង់ជីវិត ដេីម្បីបញ្ជាក់ពីការសោកស្តាយ និងចូលរួមរំលែកទុក្ខយ៉ាងក្រៀមក្រំបំផុត ព្រមទាំងចូលរួមរំលែកទុក្ខចំពោះការបាត់បង់កូនប្រុស ចៅប្រុស និងប្អូនប្រុសជាទីស្រលាញ់ និងជាធនធានមនុស្សបញ្ញវន្តដ៏មានសក្តានុពលរបស់កម្ពុជា ដែលបាន និងកំពុងបំពេញបេសកកម្មសិក្សាបង្កេីនសមត្ថភាព ដេីម្បីយកមកបម្រេីឧត្តមប្រយោជន៍ជាតិ សាសនា និងព្រះមហាក្សត្រ និងប្រជាជនកម្ពុជា ជាទីស្នេហាបំផុតរបស់យេីង”។
ព្រមជាមួយគ្នានេះ សម្តេចធិបតីនាយករដ្ឋមន្ត្រី ក៏សូមបួងសួងដល់វិញ្ញាណក្ខន្ធនិស្សិត ចាន់ ឧត្តម បានទៅកាន់សុខគតិភពកុំបីឃ្លៀងឃ្លៀតឡេីយ។
![](https://dap-news.com/wp-content/uploads/2023/10/387749674_2978042638997152_4145430017781995625_n-769x1024.jpg)
សូមបញ្ជាក់ផងដែរ ដេីម្បីជួយរំលែកបន្ទុកមួយចំណែក និងសេចក្តីសោកសង្រេង នៃការបាត់បង់និស្សិតចំពោះក្រុមគ្រួសារនៃសព សម្តេចធិបតីនាយករដ្ឋមន្ត្រី សម្រេចទទួលបន្ទុកលេីការនាំសពមាតុភូមិនិវត្តន៍ ព្រមជាមួយនឹងការចាត់ចែងរៀបចំពិធីបុណ្យសព ដោយរ៉ាប់រងការចំណាយទាំងអស់៕
![](https://dap-news.com/wp-content/uploads/2020/08/1-1.png)