ភ្នំពេញ៖ លោក សយ សុភាព អគ្គនាយកមជ្ឈមណ្ឌលព័ត៌មានដើមអម្ពិល និងជា ប្រធានសមាគមអ្នកសារព័ត៌មាន កម្ពុជា-ចិន បានលើកឡើងថា គោលនយោបាយ ផ្លូវនិងខ្សែក្រវ៉ាត់ ដែលហៅកាត់ថា «BRI »របស់ចិន បានធ្វើឱ្យប្រទេសនានា លើពិភពលោកចាប់ផ្តើមទំនាក់ទំនងគ្នា កាន់តែស្និទ្ធ។
ស្ថិតក្នុងវេទិកា «ផ្លូវនិងខ្សែក្រវ៉ាត់»លើកទី៣ ដែលបានរៀបចំឡើង នៅទីក្រុងប៉េកាំង ប្រទេសចិន នៅថ្ងៃទី១៨ ខែតុលា ឆ្នាំ២០២៣នេះ លោក សយ សុភាព បានបង្ហាញនូវចំណាប់អារម្មណ៍របស់ខ្លួន ក្រោយឃើញ ជនជាតិអាហ្រ្វិក ចាប់ផ្តើមចេះប្រើសំលៀកបំពាក់របស់ចិន ហើយថែមទាំងចេះនិយាយភាសាចិនទៀតផងដែរ។
លោក សយ សុភាព បញ្ជាក់ថា «BRI បានធ្វើឱ្យប្រទេសនានា លើពិភពលោកចាប់ផ្តើមមានទំនាក់ទំនងគ្នា កាន់តែស្និទ្ធ។ ពិសេស ប្រទេសតតីលោក ស្គាល់ការអភិវឌ្ឍន៏ ដ៏ពិតប្រាកដ និងមិនប្រកាន់ពូជសាសន៏ លិទ្ធិឡើយ»។
លោកបន្ថែមថា ប្រតិភូក្នុងវេទិកា បានកោតសរសើរ និងវាយតំលៃខ្ពស់ នូវគោលនយោបាយ ផ្លូវនិង ខ្សែក្រវ៉ាត់ ដែលផ្តួចផ្តើមឡើង ដោយប្រទេសចិន រយៈកាល១០ឆ្នាំមកនេះ ពិតជាបានជួយប្រទេសក្រីក្រ ពិតប្រាកដមែន៕
