ភ្នំពេញ ៖ លោក ថោ ជេដ្ឋា រដ្ឋមន្ត្រី ក្រសួងធនធានទឹក និងឧតុនិយម បានស្នើដល់ធនាគារអភិវឌ្ឍន៍អាស៊ី(ADB) ពិចារណាពង្រីកទុនវិនិយោគបន្ថែមទៀត លើវិស័យគ្រប់គ្រងធនធានទឹក និងឧតុនិយម ដើម្បីទប់ទល់នឹងការប្រែប្រួលអាកាសធាតុ និងហានិភ័យនៃគ្រោះធម្មជាតិនានា។
![](https://dap-news.com/wp-content/uploads/2023/10/photo_2023-10-26_14-23-12-818x1024.jpg)
នាឱកាសអញ្ជើញទទួលជួបពិភាក្សាការងារ លើវិស័យធនធានទឹកជាមួយ ប្រតិភូធនាគារអភិវឌ្ឍន៍អាស៊ី (ADB) ដឹកនាំដោយលោកស្រី Jyotsana Varma នាយិកាស្ថានតំណាងធនាគារអភិវឌ្ឍន៍អាស៊ី ប្រចាំកម្ពុជា នាថ្ងៃទី២៦ ខែតុលា ឆ្នាំ២០២៣ លោករដ្ឋមន្ត្រី ថោ ជេដ្ឋា បានថ្លែងអំណរគុណ ចំពោះការរួមចំណែកយ៉ាងធំធេង ប្រកបដោយប្រសិទ្ធភាពខ្ពស់របស់ ADB ក្នុងការអភិវឌ្ឍនិងការរីកចម្រើន នៃសង្គមសេដ្ឋកិច្ចកម្ពុជា ជាពិសេសកិច្ចសហប្រតិបត្តិការលើវិស័យធនធានទឹក និងឧតុនិយម ដែលធនាគារ ADB បានចូលរួមក្នុងការធ្វើទំនើបកម្មវិស្វកម្ម លើវិស័យហេដ្ឋារចនាសម្ព័ន្ធទឹក ដើម្បីទប់ទល់នឹងការប្រែប្រួលអាកាសធាតុ និងការឡើងកម្តៅនៃភពផែនដី។
![](https://dap-news.com/wp-content/uploads/2023/10/photo_2023-10-26_14-23-15-1024x818.jpg)
លោករដ្ឋមន្ដ្រីគូសបញ្ជាក់ថា «ស្នើដល់ធនាគារអភិវឌ្ឍន៍អាស៊ី (ADB) ពិចារណាពង្រីកទុនវិនិយោគបន្ថែមទៀត លើវិស័យគ្រប់គ្រងធនធានទឹក និងឧតុនិយម ដើម្បីទប់ទល់នឹងការប្រែប្រួលអាកាសធាតុ និងហានិភ័យនៃគ្រោះធម្មជាតិនានា»។
ជាមួយគ្នានោះ លោករដ្ឋមន្ត្រី បានជំរុញឲ្យបង្កើនកិច្ចសហប្រតិបត្តិការ ជាមួយធនាគារអភិវឌ្ឍន៍អាស៊ីធ្វើការកែលម្អ ផែនការរយៈពេលវែងលើកិច្ចការ វិនិយោគក្នុងវិស័យធនធានទឹក និងឧតុនិយមពីឆ្នាំ២០២៤ ដល់ឆ្នាំ២០៣៩ ឈានទៅកាត់បន្ថយ បានជាអតិបរមានូវជំនន់គ្រប់ប្រភេទ និងហានិភ័យនៃគ្រោះរាំងស្ងួត បង្កើនជាអតិបរមានូវបរិស្ថានបៃតង និងអេកូទេសចរណ៍។
![](https://dap-news.com/wp-content/uploads/2023/10/photo_2023-10-26_14-23-17-1024x818.jpg)
នាឱកាសនោះ លោកស្រី និងសហការីបានវាយតម្លៃខ្ពស់ ចំពោះកិច្ចសហប្រតិបត្តិការនាពេលកន្លងមក និងសន្យាបន្ថែមទុនវិនិយោគ ជាមួយក្រសួងធនធានទឹក និងឧតុនិយម និងជាពិសេសទុនវិនិយោគលើការងារ ជួសជុលថែរទាំប្រព័ន្ធធារាសាស្រ្ត (O&M) ដើម្បីរួមចំណែកទ្រទ្រង់ដល់ ការអភិវឌ្ឍសេដ្ឋកិច្ចកម្ពុជា។
![](https://dap-news.com/wp-content/uploads/2023/10/photo_2023-10-26_14-23-19-819x1024.jpg)
សូមបញ្ជាក់ថា គិតមកដល់ពេលបច្ចុប្បន្ននេះធនាគារ ADB បានធ្វើការវិនិយោគជាបន្តបន្ទាប់ តាមរយៈក្រសួងសេដ្ឋកិច្ច និងហិរញ្ញវត្ថុ ដើម្បីធ្វើទំនើបកម្មលើហេដ្ឋារចនាសម្ព័ន្ធ គ្រប់គ្រងវិស័យធនធានទឹក និងឧតុនិយម ចាប់ពីខ្នាតមធ្យមដល់ខ្នាតធំ ក្នុងនោះគម្រោងកំពុងដំណើរការមានចំនួន២គឺ ទី១- គម្រោងកែលម្អវិស័យធារាសាស្រ្តកសិកម្ម (IAIP) និងទី២-គម្រោងខ្សែច្រវ៉ាក់ផលិតកម្ម ប្រកបដោយភាតរបរិស្ថាន(CFACVS)។ ដោយឡែកគម្រោងដែលកំពុងសិក្សាមានចំនួន២គឺ ទី១-គម្រោងគ្រប់គ្រងធនធានទឹកចម្រុះ (IWRM) និងទី២-គម្រោងធារាសាស្រ្តធន់អាកាសធាតុ និងកសិកម្មដែលមានភាពធន់ និងមាននិរន្តរភាព (CAISAR)៕
![](https://dap-news.com/wp-content/uploads/2020/08/1-1.png)