ភ្នំពេញ ៖ លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ក្រសួង មិនទាន់កំណត់ណាមួយឡេីយ ដែលអនុញ្ញាតឱ្យសិស្សប្រឡងជាប់ សញ្ញាបត្រមធ្យមសិក្សាទុតិយភូមិ (បាក់ឌុប) បាននិទ្ទេស A, B, C ចូលធ្វើជាគ្រូបង្រៀន ដោយស្វ័យប្រវត្តិនោះទេ។
ក្នុងសន្និសីទសារព័ត៌មាន ស្តីពីដំណើរការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ០៦ វិច្ឆិកា ២០២៣ នៅទីស្តីការក្រសួងអប់រំ យុវជន និងកីឡា នារសៀលថ្ងៃទី២៧ ខែតុលា ឆ្នាំ២០២៣ ឧបនាយករដ្ឋមន្ត្រី ហង់ជួន ណារ៉ុន បានឱ្យដឹងថា ក្រសួងអប់រំ មានបំណងចង់ឱ្យសិស្សពូកែ និងជាប់និទ្ទេសល្អ ចូលធ្វើការងារជាគ្រូបង្រៀន ។
លោក ឧបនាយករដ្ឋមន្ត្រី គូសបញ្ជាក់ថា “ដោយឡែកការកំណត់ថាឱ្យសិស្សជាប់និទ្ទេស A, B, C ជាប់ដោយស្វ័យប្រវត្តិ (ជាប់គ្រូ) យេីងមិនទាន់មានការសម្រេច ណាមួយនៅឡើយទេ ។ ជាគោលការណ៍ របស់រាជរដ្ឋាភិបាល គឺចង់ឱ្យមានការប្រឡង ដើម្បីឱ្យសិស្សបានបង្ហាញ ពីសមត្ថភាពខ្លួនឯង” ។
លោក ឧបនាយករដ្ឋមន្ត្រី បន្ដថា “ព្រោះជូនកាលគាត់ប្រឡងបាក់ឌុបគាត់ រៀងធ្លាក់ពិន្ទុបន្តិច ហើយប្រសិនបើគាត់ខំប្រឹងរៀនបន្ត ពេលទៅប្រឡងគ្រូ អាចនឹងបានពិន្ទុល្អជាង ដោយសារតែការប្រឡងគ្រូខុស ពីការប្រឡងសញ្ញាបត្រ មធ្យមសិក្សាទុតិយភូមិ ដោយការប្រឡងសញ្ញាបត្រ មធ្យមសិក្សាទុតិយភូមិ អាចមាននិទ្ទេស A, B, C ច្រើន ប៉ុន្តែការប្រឡងចូលគ្រូ គឺប្រឡងតាមបែបប្រណាំងប្រជែង មានន័យថា អ្នកណាបានពិន្ទុខ្ពស់ជាងនឹងជាប់”។
លោក ឧបនាយករដ្ឋមន្ត្រី បន្ថែមថា គោលបំណងរក្សាឱ្យបាននូវសន្តិសុខ សុវត្ថិភាព សណ្តាប់ធ្នាប់ និងរបៀប រៀបរយតាមមណ្ឌលប្រឡង និងធានាឲ្យបានសុខភាព សម្រាប់គណៈមេប្រយោគ គណៈកម្មការនានា និងបេក្ខជន ក្រសួងអប់រំ យុវជន និងកីឡា បន្តពង្រឹងកិច្ចសហការយ៉ាងស្អិតល្មួត ជាមួយក្រសួង ស្ថាប័នចំនួន៦ រួមមាន៖ ក្រសួង មហាផ្ទៃ ក្រសួងសុខាភិបាល កងរាជអាវុធហត្ថលើផ្ទៃប្រទេស អង្គភាពប្រឆាំងអំពើពុករលួយ អគ្គិសនីកម្ពុជា និងសហភាពសហព័ន្ធយុវជនកម្ពុជា ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង០៦ វិច្ឆិកា ២០២៣ មានបេក្ខជនចុះឈ្មោះ ប្រឡងសរុបចំនួន១៣៧,៤១២នាក់ (ស្រី៧៣,២៧៨នាក់ ក្នុងនោះបេក្ខជនថ្នាក់វិទ្យាសាស្ត្រ មានចំនួន ៤១,៣៧៩នាក់ (ស្រី២៤,៧៨៩នាក់) បេក្ខជនថ្នាក់វិទ្យាសាស្ត្រ សង្គមមានចំនួន ៩៦,០៣៣នាក់ (ស្រី៤៨,៤៨៩ នាក់) ។ បេក្ខជនត្រូវបានរៀបចំចំនួន២៥នាក់ ក្នុងមួយបន្ទប់ ទៅតាមមណ្ឌលសំណេរនីមួយៗ តាមរាជធានី ខេត្ត លើកលែងតែបន្ទប់ចុងក្រោយ និងបន្ទប់ដែលមានបេក្ខជន មកពីវិទ្យាល័យអប់រំពិសេស៕
