ភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់ថា ត្រូវធ្វើយ៉ាងណាកុំឲ្យផែទាំង៤រួមមាន ៖ ព្រះសីហនុ កោះកុង កែប កំពត ទៅជាផែប្រកួតប្រជែងគ្នាឯង ប៉ុន្តែត្រូវធ្វើឲ្យផែទាំង៤ ទៅជាផែដែលរួមកម្លាំងគ្នា ដើម្បីប្រជែងជាមួយផែប្រទេសជិតខាងវិញ។
ក្នុងពិធីសំណេះសំណាលជាមួយកម្មករ ក្នុងតំបន់សេដ្ឋកិច្ចពិសេសនៅខេត្តព្រះសីហនុ នាថ្ងៃ៧ វិច្ឆិកា សម្ដេចធិបតី ហ៊ុន ម៉ាណែត មានប្រសាសន៍ថា «ត្រូវរៀបចំគិតគូរឲ្យហើយ ត្រូវធ្វើយ៉ាងណាកុំឲ្យផែទាំង៤នេះ ទៅជាផែដែលប្រកួតប្រជែងគ្នា តែទៅជាផែដែលរួមកម្លាំងគ្នា ដើម្បីប្រជែងជាមួយផែប្រទេសជិតខាង យើងត្រូវយកខេត្ត ៤របស់យើងផ្គុំគ្នា ប្រកួតជាមួយប្រទេសផ្សេងៗ ត្រូវគិតគូរជាកញ្ចប់ ជាមាត្រដ្ឋាន» ។
សម្ដេចធិបតីគូសបញ្ជាក់ថា “បើយើងគិតតែពីខេត្តព្រះសីហនុ ហើយយកខេត្តបីទៀត ជាគូប្រជែងជាមួយខេត្តព្រះសីហនុ គឺយើងអត់យកសក្ដានុពលបានទេ គឺយើងត្រូវយកខេត្ត៤ផ្គុំគ្នា ដើម្បីប្រជែងជាមួយប្រទេសផ្សេងៗ” ។
សម្ដេចធិបតីបន្ថែមថា ត្រូវបែងចែកឲ្យបានច្បាស់ ផែមួយណាត្រូវដាក់ទិសដៅអភិវឌ្ឍន៍អ្វី ដើម្បីបម្រើអ្វីខ្លះ ។
សម្ដេចក៏បានណែនាំឲ្យរៀបចំ និងពិនិត្យគិតគូរអំពីកំពង់សមុទ្រដែលកំពុងមានចំនួន៤ ក្នុងនោះខេត្តព្រះសីហនុ មួយ, ខេត្តកំពត ពីរ និងខេត្តកោះកុងមួយ ដោយត្រូវធ្វើយ៉ាងណាឲ្យប្រទាក់ក្រឡាគ្នា តែមិនប្រកួតប្រជែងគ្នានោះទេ គឺប្រកួតប្រជែងជាមួយប្រទេសជិតខាង។ សម្ដេចថា ត្រូវបែងចែកគ្នាឲ្យច្បាស់ថា កំពង់ផែណាសម្រាប់ទេសចរណ៍ និងកំពង់ផែណាសម្រាប់ទំនិញ ៕
