បរទេស៖ យោងតាមការវិភាគថ្មីមួយបានឱ្យដឹងថា ពលរដ្ឋអាមេរិករាប់លាននាក់អាចស្លាប់ដោយសារផលប៉ះពាល់កើតចេញពីការវាយប្រហាររបស់បរទេសមកលើទីតាំងមីស៊ីលនៅក្រោមដីរបស់សហរដ្ឋអាមេរិក។ តួលេខស្លាប់ពិតប្រាកដនឹងអាស្រ័យលើទិសដៅខ្យល់ និងសមត្ថភាពក្នុងការជ្រកកោននៅនឹងកន្លែង។
យោងតាមសារព័ត៌មាន Sputnik របស់រុស្ស៊ីចេញផ្សាយនៅថ្ងៃទី១៧ ខែវិច្ឆិកា ឆ្នាំ២០២៣ បានឱ្យដឹងថា អ្នកដែលស្វែងរកការអានសៀវភៅតាមមាត់អាងទឹកអាចរីករាយនឹងរបាយការណ៍ថ្មីៗនេះនៅក្នុងប្រព័ន្ធផ្សព្វផ្សាយរបស់សហរដ្ឋអាមេរិកដែលរៀបរាប់អំពីផលប៉ះពាល់ដ៏មហន្តរាយនៃការវាយប្រហារនុយក្លេអ៊ែរលើសហរដ្ឋអាមេរិក។
ការវិភាគដែលបានចេញផ្សាយនៅដើមសប្តាហ៍នេះ រៀបរាប់លម្អិតអំពីផលប៉ះពាល់ នៃការវាយប្រហារតាមបែបសម្មតិកម្មរបស់សត្រូវបរទេសមកលើទីតាំងមីស៊ីលនុយក្លេអ៊ែរនៅក្រោមដីរបស់សហរដ្ឋអាមេរិក។ មូលដ្ឋានមីស៊ីលក្រោមដីសរុបចំនួន៤៥០ទីតាំងនៅទូទាំងទ្វីបសហរដ្ឋអាមេរិក ត្រូវបានយោធាអាមេរិកលើកឡើងថា ជាការរារាំងដ៏មានឥទ្ធិពល ពេលដែលសត្រូវបរទេសនឹងបំផ្លាញធនធានសំខាន់ៗដែលប៉ុនប៉ងបំផ្លាញឃ្លាំងអាវុធនុយក្លេអ៊ែរដែលមានមូលដ្ឋានលើដីរបស់ប្រទេសនេះ។
ប្រសិនបើពួកគេនៅតែព្យាយាមធ្វើដូច្នេះ ការវាយប្រហារដោយជោគជ័យនឹងតម្រូវឱ្យមានការបំផ្ទុះនុយក្លេអ៊ែរនៅពីលើលេណដ្ឋាននីមួយៗក្នុងចំណោមលេណដ្ឋានក្រោមដីចំនួន ៤៥០ ។ ការបំផ្ទុះបែបនេះនឹងធ្វើឱ្យមីស៊ីលនៅក្រោមដី បង្កឱ្យមានការផ្ទុះដ៏ធំ និងផ្សែងដ៏ធំខ្មួលខ្មាញ់សម្បើម។ ភាពកខ្វក់ និងកំទេចកំទី នឹងត្រូវដឹកឆ្លងកាត់សហរដ្ឋអាមេរិក ជាច្រើននៅពេលក្រោយ។
ចំនួនពិតប្រាកដនៃការស្លាប់នឹងអាស្រ័យលើទិសដៅនៃខ្យល់នៅថ្ងៃនៃការវាយប្រហារ ក៏ដូចជាសមត្ថភាពរបស់ពលរដ្ឋអាមេរិកក្នុងការស្វែងរកកន្លែងលាក់ខ្លួន។ អ្នកជំនាញនិយាយថា មនុស្សនឹងត្រូវការជម្រកនៅនឹងកន្លែងយ៉ាងហោចណាស់ ៤ ថ្ងៃ ដើម្បីទទួលបានការការពារខ្លួនល្អបំផុតពីការធ្លាក់សារធាតុវិទ្យុសកម្ម។
របាយការណ៍នេះបានសន្និដ្ឋានថា ពលរដ្ឋអាមេរិកចន្លោះពី ៣៤០.០០០នាក់ ទៅ ៤,៦ លាននាក់នឹងស្លាប់នៅក្នុងការវាយប្រហារនេះ ជាមួយនឹងការស្លាប់ជាមធ្យម ១,៤ លាននាក់នៅក្នុងការក្លែងធ្វើរបស់អ្នកនិពន្ធ។ ប៉ុន្តែមនុស្សរាប់លាននាក់នឹងមានហានិភ័យដោយសារកាលៈទេសៈនៅក្រៅការគ្រប់គ្រងរបស់ពួកគេ។
មីស៊ីលនៅក្រោមដីរបស់សហរដ្ឋអាមេរិកតំណាងឱ្យផ្នែកមួយនៃអ្វីដែលគេហៅថា “នុយក្លេអ៊ែរបីជ្រុង” របស់ប្រទេស ដែលរួមមានសមត្ថភាពបាញ់នុយក្លេអ៊ែរចេញពីលើដី សមុទ្រ និងផ្លូវអាកាស។
ប្រទេសចំនួនប្រាំត្រូវបានគេគិតថាបច្ចុប្បន្នមានអាវុធនុយក្លេអ៊ែរបីជ្រុងគឺសហរដ្ឋអាមេរិក រុស្ស៊ី ចិន ឥណ្ឌា និងប៉ាគីស្ថាន។ ចំណែកប្រទេស អ៊ីស្រាអែលក៏ត្រូវបានគេសន្មតជាទូទៅថា នុយក្លេអ៊ែរបែបនេះដែរ ថ្វីបើលក្ខណៈនៃសមត្ថភាពនុយក្លេអ៊ែររបស់ប្រទេសនេះជាការសម្ងាត់របស់រដ្ឋក៏ដោយ។
បច្ចុប្បន្នបារាំងមានឃ្លាំងអាវុធនុយក្លេអ៊ែរធំជាងគេទីបួនរបស់ពិភពលោក ប៉ុន្តែប្រទេសអឺរ៉ុបខាងលិចលែងរក្សាសមត្ថភាពនុយក្លេអ៊ែរនៅលើដីទៀតហើយ៕ ប្រែសម្រួលៈ ណៃ តុលា
