បរទេស៖ នាយករដ្ឋមន្ត្រីលោក Benjamin Netanyahu បានផ្តល់សញ្ញាថា អ៊ីស្រាអែលបានត្រៀមលក្ខណៈដើម្បីបន្តបទឈប់បាញ់បច្ចុប្បន្នជាមួយក្រុមហាម៉ាស ប៉ុន្តែលោកបានព្រមានថា ទីក្រុងហ្សេរុយសាឡឹមខាងលិចនឹងបន្តការវាយលុករបស់ខ្លួនឡើងវិញបន្ទាប់ពីបទឈប់បាញ់នេះបានបញ្ចប់។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែវិច្ឆិកា ឆ្នាំ២០២៣ បានឱ្យដឹងថា ទន្ទឹមនឹងនោះ ក្រុមប្រដាប់អាវុធប៉ាឡេស្ទីនក៏បានគាំទ្រគំនិតនៃការបន្តបទឈប់បាញ់រយៈពេលបួនថ្ងៃផងដែរ។
នៅក្នុងសេចក្តីថ្លែងការណ៍វីដេអូមួយដែលបានចេញផ្សាយកាលពីថ្ងៃអាទិត្យ លោក Netanyahu បាននិយាយថា លោកបានពិភាក្សាជាមួយប្រធានាធិបតីសហរដ្ឋអាមេរិក Joe Biden អំពីការដោះលែងចំណាប់ខ្មាំងដែលត្រូវបានឃុំខ្លួននៅក្នុង Gaza ដែលជាចំណុចសំខាន់នៅក្នុងកិច្ចព្រមព្រៀងនាពេលថ្មីៗនេះជាមួយក្រុមហាម៉ាស់។
លោកបានកត់សម្គាល់ថា អ៊ីស្រាអែលបាននាំចំណាប់ខ្មាំងមួយក្រុមផ្សេងទៀតមកពីក្របខណ្ឌប៉ាឡេស្ទីន។ លោកនាយករដ្ឋមន្ត្រីបានថ្លែងថា «ខ្ញុំរំជួលចិត្តចំពោះប្រជាជាតិទាំងមូលគឺនៅពេលដែលយើងឃើញក្រុមគ្រួសារបានជួបជុំគ្នាឡើងវិញ»។
លោក Netanyahu បានរំលឹកឡើងវិញថា អ៊ីស្រាអែលបានត្រៀមខ្លួនរួចជាស្រេចក្នុងការពន្យាពេលបទឈប់បាញ់ជាមួយក្រុមហាម៉ាស់ ដែលគ្រោងនឹងបញ្ចប់នៅយប់ថ្ងៃចន្ទ ក្នុងលក្ខខណ្ឌថា សម្រាប់រាល់ថ្ងៃនៃការបន្ធូរបន្ថយបន្ថែម ក្រុមហាម៉ាស់បានដោះលែងចំណាប់ខ្មាំងដប់នាក់ទៀត៕
