ភ្នំពេញ ៖ នៅព្រឹកថ្ងៃទី៣០ ខែវិច្ឆិកា ឆ្នាំ២០២៣នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមប្រឹក្សា គណៈកម្មការទន្លេមេគង្គ ឆ្នាំ២០២៣ អមដំណើរដោយថ្នាក់ដឹកនាំគណៈកម្មាធិការជាតិ ទន្លេមេគង្គកម្ពុជា បានអញ្ជើញពិនិត្យមជ្ឈមណ្ឌលគ្រប់គ្រងទឹកជំនន់ និងភាពរាំងស្ងួត ថ្នាក់តំបន់ របស់គណៈកម្មការទន្លេមេគង្គ (MRC)។
![](https://dap-news.com/wp-content/uploads/2023/11/405279428_665178279127850_2344737586701167144_n-819x1024.jpg)
ជាកិច្ចស្វាគមន៍ លោករដ្ឋមន្ត្រី បានថ្លែងអំណរគុណ ចំពោះការរៀបចំទទួលបដិសណ្ឋារកិច្ចយ៉ាងកក់ក្តៅ ពីសំណាក់លោកបណ្ឌិត អានូឡាក់ គិទីគួន នាយកប្រតិបត្តិ និងមន្រ្តីលេខាធិការដ្ឋាន គណៈកម្មការទន្លេមេគង្គ រួមជាមួយថ្នាក់ដឹកនាំ និងមន្ត្រីអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា មន្ត្រីនាយកដ្ឋានពាក់ព័ន្ធ នៃក្រសួងធនធានទឹក និងឧតុនិយម ជាច្រើនរូបទៀត ។
![](https://dap-news.com/wp-content/uploads/2023/11/405320155_665179719127706_3121373810133448742_n-820x1024.jpg)
ក្នុងនាមប្រធានក្រុមប្រឹក្សា គណៈកម្មការទន្លេមេគង្គ ឆ្នាំ២០២៣ ឯកឧត្តមរដ្ឋមន្ត្រីបានវាយតម្លៃខ្ពស់ ចំពោះកិច្ចខិតប្រឹងប្រែង របស់លេខាធិការដ្ឋាន គណៈកម្មការទន្លេមេគង្គ ដែលបានសហការ យ៉ាងល្អ ជាមួយប្រទេសជាសមាជិក អនុវត្តនូវបេសកកម្មរបស់គណៈកម្មការទន្លេមេគង្គ សម្រេចបានសមិទ្ធផល និងវឌ្ឍនភាព គួរឱ្យកត់សម្គាល់ ដើម្បីការគ្រប់គ្រង និងអភិវឌ្ឍន៍អាងទន្លេមេគង្គប្រកបដោយចីរភាព ជាពិសេសកិច្ចខិតខំប្រឹងប្រែងរួមគ្នា ជាមួយប្រទេស តាមដងទន្លេដោះស្រាយហានិភ័យ និងផលប៉ះពាល់នៃគ្រោះទឹកជំនន់ និងភាពរាំងស្ងួត ដែលជាក្តីបារម្ភខ្លាំងសម្រាប់ប្រទេសជាសមាជិក និងប្រជាជនក្នុងអាងទន្លេ។
![](https://dap-news.com/wp-content/uploads/2023/11/399298591_665180125794332_871057808485759487_n-1024x719.jpg)
លោករដ្ឋមន្ត្រី បានលើកឡើងថា ការប្រែប្រួលរបបជលសាស្រ្ត គ្រោះទឹកជំនន់ និងភាពរាំងស្ងួតក្នុងអាងទន្លេមេគង្គ នាពេលកន្លងមក និងក្នុងពេលបច្ចុប្បន្ន ជាចំណុចសំខាន់ ដែលត្រូវរួមគ្នាយកចិត្តទុកដាក់ ដោយពង្រឹងការពិនិត្យតាមដានឱ្យបានដិតដល់ និងត្រូវជូនដំណឹងដល់ប្រទេសតាមដងទន្លេជាប្រចាំ ទាន់ពេលវេលា តាមរយៈអភិក្រម និងនវានុវត្តន៍ផ្នែកបច្ចេកវិទ្យា ដែលតភ្ជាប់គ្នាកាន់តែប្រសើរ រវាងលេខាធិការដ្ឋានគណៈកម្មការទន្លេមេគង្គ និងប្រទេសជាសមាជិក ។
លោករដ្ឋមន្ត្រីបញ្ជាក់ថា ការប្រែប្រួលទាំងនេះ បណ្តាលមកកំណើនតម្រូវការទឹក ស្បៀង និងថាមពល សន្ទុះនៃការអភិវឌ្ឍលឿន និងការប្រែប្រួលអាកាសធាតុ ដែលបាននិងកំពុងដាក់សម្ពាធខ្លាំងឡើង មកលើធនធានក្នុងអាង និងនិរន្តរភាពទន្លេមេគង្គ។
![](https://dap-news.com/wp-content/uploads/2023/11/405197966_665180035794341_2872063069120294022_n-1024x683.jpg)
ជាមួយគ្នានេះ លោករដ្ឋមន្ត្រី បានគូសបញ្ជាក់ អំពីតួនាទីកាន់តែសំខាន់ របស់មជ្ឈមណ្ឌលគ្រប់គ្រងទឹកជំនន់ និងភាពរាំងស្ងួត ថ្នាក់តំបន់ ដែលបានបង្កើតឡើង ដោយគណៈកម្មការទន្លេមេគង្គ នៅក្នុងបរិបទ នៃការប្រែប្រួល ដែលចាំបាច់ត្រូវពង្រឹង និងបង្កើនសមត្ថភាព ប្រតិបត្តិការឱ្យបានប្រសើរឡើង ទាំងផ្នែកជំនាញ និងបច្ចេកវិទ្យា ព្រមទាំងរួមគ្នាយកចិត្តទុកដាក់បន្ថែមទៀត ក្នុងការលើកកម្ពស់ប្រសិទ្ធភាព ឱ្យកាន់តែប្រសើរ មានភាពប្រទាក់ក្រឡាគ្នាយ៉ាងជិតសិ្នទ្ធ រវាងការងារនៅថ្នាក់តំបន់ និងថ្នាក់ជាតិ។
![](https://dap-news.com/wp-content/uploads/2023/11/405216809_665179495794395_522172494992329151_n-1024x608.jpg)
លោករដ្ឋមន្ត្រី ក្នុងនាមប្រធានក្រុមប្រឹក្សា បានស្នើដល់លេខាធិការដ្ឋាន គណៈកម្មការទន្លេមេគង្គឱ្យបន្តផ្តោត ការយកចិត្តទុកដាក់លើកិច្ចការ អាទិភាពមួយចំនួនដូចជា៖ ទី១) ការធ្វើឱ្យប្រសើរការតភ្ជាប់រវាងថ្នាក់ជាតិ និងតំបន់ និងការបន្តអភិវឌ្ឍ សមត្ថភាពនៅថ្នាក់ជាតិ ដើម្បីរួមចំណែក ធ្វើឱ្យការពិនិត្យតាមដាន និងការគ្រប់គ្រងអាងទន្លេ មានលក្ខណៈកាន់តែប្រសើរ ទី២) ភាពជាដៃគូល្អ ដើម្បីការពិនិត្យតាមដាន អាងទន្លេបានកាន់តែប្រសើរ ទី៣) ការពិនិត្យកិច្ចប្រតិបត្តិការឡើងវិញ និងការបន្តធ្វើឱ្យកាន់តែប្រសើរ។
![](https://dap-news.com/wp-content/uploads/2023/11/405326293_665178619127816_8333057722931760656_n-1024x739.jpg)
ជាចុងក្រោយ លោករដ្ឋមន្ត្រី បានបង្ហាញនូវការជឿជាក់លើតួនាទីកាន់តែសំខាន់ និងមានលក្ខណៈបុរេសកម្មរបស់គណៈកម្មការទន្លេមេគង្គ និងមជ្ឈមណ្ឌលគ្រប់គ្រងទឹកជំនន់ និងភាពរាំងស្ងួតថ្នាក់តំបន់ក្នុងបរិបទ នៃការផ្លាស់ប្តូរឥតឈប់ឈរ និងបញ្ហាប្រឈមដែលកើតមានឡើង ដើម្បីជួយប្រទេសជាសមាជិក និងធ្វើការជាមួយបណ្តាប្រទេសតាមដងទន្លេមេគង្គទាំងអស់ រួមគ្នាដោះស្រាយហានិភ័យ និងផលប៉ះពាល់នៃគ្រោះទឹកជំនន់ នៅតាមប្រទេសនីមួយៗ និងក្នុងអាងឱ្យកាន់តែមានប្រសិទ្ធភាព និងទាន់ពេលវេលា ។
![](https://dap-news.com/wp-content/uploads/2023/11/405336271_665180052461006_1399146658120540549_n-1024x759.jpg)
គួរបញ្ជាក់ថា មជ្ឈមណ្ឌលគ្រប់គ្រង និងកាត់បន្ថយទឹកជំនន់តំបន់ បានបង្កើតឡើង ក្នុងឆ្នាំ២០០៦ និងបានប្តូរឈ្មោះ ជាមជ្ឈមណ្ឌលគ្រប់គ្រងទឹក ជំនន់និងភាពរាំងស្ងួត ថ្នាក់តំបន់ ក្នុងឆ្នាំ២០១៩ ។ មជ្ឈមណ្ឌលនេះមានភារកិច្ចពិនិត្យតាមដាន និងព្យាករណ៍ទឹកជំនន់ និងភាពរាំងស្ងួតប្រចាំថ្ងៃ ប្រចាំសប្តាហ៍ និងប្រចាំខែ ព្រមទាំងផ្តល់នូវការព្យាករ និងការជូនដំណឹងជាមុនឱ្យបានទាន់ពេលវេលា និងមានសុក្រឹត្យភាព ដើម្បីត្រៀមបង្ការជាមុន និងការឆ្លើយតប ចំពោះហានិភ័យ ដែលអាចកើតមានឡើងប្រកបដោយប្រសិទ្ធភាព ដល់ប្រទេសជាសមាជិកគណៈកម្មការទន្លេមេគង្គ មាន កម្ពុជា វៀតណាម ឡាវ ថៃ សម្រាប់ការគ្រប់គ្រងទឹកជំនន់ និងភាពរាំងស្ងួត និងការត្រៀមលក្ខណៈទុកជាមុន ៕
![](https://dap-news.com/wp-content/uploads/2023/11/405194958_665180055794339_3252309931060067019_n-1024x832.jpg)
![](https://dap-news.com/wp-content/uploads/2023/11/405201300_665178919127786_8912284822547558917_n-1024x805.jpg)
![](https://dap-news.com/wp-content/uploads/2023/11/405216831_665178829127795_4367168614308701800_n-1024x755.jpg)
![](https://dap-news.com/wp-content/uploads/2023/11/405234209_665180079127670_1122697435711870524_n-1024x819.jpg)
![](https://dap-news.com/wp-content/uploads/2023/11/405262328_665180119127666_3391427520341367012_n-1024x727.jpg)
![](https://dap-news.com/wp-content/uploads/2023/11/405269109_665178085794536_1732603132848382783_n-1024x683.jpg)
![](https://dap-news.com/wp-content/uploads/2023/11/405331203_665180072461004_3447822528797180126_n-1024x785.jpg)
![](https://dap-news.com/wp-content/uploads/2023/11/405335607_665178815794463_7934762939869937300_n-1024x735.jpg)
![](https://dap-news.com/wp-content/uploads/2023/11/405340564_665178522461159_9167569252108301051_n-1024x719.jpg)
![](https://dap-news.com/wp-content/uploads/2023/11/405363900_665179052461106_6540141808868543182_n-1024x819.jpg)
![](https://dap-news.com/wp-content/uploads/2023/11/405393914_665180005794344_7168695243648518854_n-1024x757.jpg)
![](https://dap-news.com/wp-content/uploads/2023/11/405394190_665177989127879_4490845874200523814_n-1-1024x620.jpg)
![](https://dap-news.com/wp-content/uploads/2020/08/1-1.png)