ភ្នំពេញ ៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួង សុខាភិបាល បានលើកទឹកចិត្ត គណៈកម្មាធិការ កាកបាទក្រហមអន្តរជាតិ (ICRC) ប្រចាំកម្ពុជា បន្តកិច្ចសហប្រតិបត្តិការ ដែលមានស្រាប់ជាមួយ ក្រសួងសុខាភិបាល ដើម្បីរួមចំណែកជាមួយ រាជរដ្ឋាភិបាលកម្ពុជា ឈានទៅសម្រេចបាន នូវការគ្របដណ្តប់សុខភាព ជាសកល ស្របតាមផែនការយុទ្ធសាស្រ្ត បញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។
![](https://dap-news.com/wp-content/uploads/2023/12/photo_2023-12-07_10-03-36-1024x682.jpg)
នេះជាការលើកឡើង របស់លោករដ្ឋមន្រ្តី ក្នុងជំនួបជាមួយ លោកស្រី Dena Fisher ប្រធានបេសកកម្ម គណៈកម្មាធិការកាកបាទក្រហម អន្តរជាតិប្រចាំកម្ពុជា (ICRC) និង ក្រុមការងារ នាថ្ងៃ៦ ធ្នូ។
![](https://dap-news.com/wp-content/uploads/2023/12/photo_2023-12-07_10-03-40-1024x682.jpg)
បើតាមសាស្ត្រាចារ្យរដ្ឋមន្ត្រី គណៈកម្មាធិការកាកបាទក្រហម អន្តរជាតិ បានសហការគាំទ្រ និងរួមចំណែកលើកកំពស់ សេវាសុខាភិបាលនៅកម្ពុជា ដែលបានផ្តល់ សេវាថែទាំ សុខភាពដល់ជនជាប់ឃុំ និងពង្រឹងទំនាក់ទំនង ជាមួយប្រព័ន្ធសេវា ថែទាំសុខភាពសាធារណៈ។
![](https://dap-news.com/wp-content/uploads/2023/12/photo_2023-12-07_10-03-46-1024x702.jpg)
សាស្ត្រាចារ្យរដ្ឋមន្ត្រី បានកោតសសើរចំពោះគម្រោងពីរ ដែលក្រសួងសុខាភិបាល នឹងបន្តគាំទ្រសហការជាមួយ ICRC និងបានថ្លែងអំណរគុណICRC ដែលបានរួម ចំណែកជាមួយក្រសួង សុខាភិបាល ឆ្លើយតប និងទប់ស្កាត់ការឆ្លងរាតត្បាត នៃកូវីដ-១៩ នៅតាមពន្ធនាគារ បានយ៉ាងមាន ប្រសិទ្ធភាព និងទាន់ពេលវេលាបំផុត។
![](https://dap-news.com/wp-content/uploads/2023/12/photo_2023-12-07_10-03-50-1024x698.jpg)
សាស្ត្រាចារ្យរដ្ឋមន្ត្រី បានថ្លែងអំណរគុណប្រជាជន និងរដ្ឋាភិបាលបារាំង ជាពិសេសតាមរយៈឯកអគ្គរដ្ឋទូត ដែលបានបញ្ជាក់ជំហរគាំទ្រ រួមចំណែកកិច្ចខិតខំប្រឹងប្រែង របស់ក្រសួងសុខាភិបាល ក្នុងការលើកកម្ពស់សុខុមាលភាព របស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់ សុខភាពជាសកល ស្របតាមយុទ្ធសាស្រ្ត បញ្ចកោណ នៃរាជរដ្ឋាភិបាល ។
![](https://dap-news.com/wp-content/uploads/2023/12/photo_2023-12-07_10-03-55-1024x682.jpg)
ជាការឆ្លើយតប លោកស្រី Dena Fisher បានបញ្ជាក់ជំហរយ៉ាងមុតមាំរបស់គណៈកម្មាធិការ កាកបាទក្រហមអន្តរជាតិ ក្នុងការបន្តកិច្ចសហប្រតិបត្តិការជាមួយក្រសួងសុខាភិបាល ។
![](https://dap-news.com/wp-content/uploads/2023/12/photo_2023-12-07_10-03-59-1024x709.jpg)
លោកស្រីក៏លើកឡើងអំពីវឌ្ឍនភាពកិច្ច សហប្រតិបត្តិការជាមួយ ភាគីកម្ពុជា ជាពិសេសគម្រោងជំនួយ កម្មវិធីស្តារលទ្ធភាពពលកម្ម កាយសម្បទា ដែលបានអនុវត្តក្នុងខេត្តបាត់ដំបង ខេត្តកំពង់ស្ពឺ និងខេត្តមួយចំនួន និងកម្មវិធីសុខភាពពន្ធនាគារ ៕
![](https://dap-news.com/wp-content/uploads/2023/12/photo_2023-12-07_10-04-04-1024x574.jpg)
![](https://dap-news.com/wp-content/uploads/2020/08/1-1.png)