លោក នេត្រ ភក្ត្រា អនុញ្ញាតឲ្យប្រធានមូលនិធិ គីណាល់ ចូលជួបសម្តែងការគួសម ដើម្បីពិភាក្សាការងារ និងជូនអំណោយសប្បុរសធម៌

ភ្នំពេញ៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នាព្រឹកថ្ងៃទី២០ ខែកុម្ភៈ ឆ្នាំ២០២៤ បានអនុញ្ញាតឱ្យលោកឧកញ៉ាឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយកសហគ្រាសផលិត ឱសថប៉េប៉េអឹម និងក្រុមការងារ ចូលជួបសម្តែងការគួសម និងជូនអំណោយសប្បុរសធម៌ រួមមានថ្នាំប្រភេទសេរ៉ូ (ក្អកស្ងួត) , ក្រែមសម្រាប់លាបបំបាត់មុន, វីតាមីនចម្រុះ (គ្រាប់), ប្រភេទសេរ៉ូ (ក្ដៅខ្លួន – រលាកបំពង់ក), ថ្នាំគ្រាប់ ជួយឲ្យញ៉ាំបាយបាន, មួយប្រអប់ មានបួនមុខ: ថ្នាំក្អក-ផ្កាសាយ- ក្តៅខ្លួន និងរាក ជូនក្រសួងព័ត៌មាន នៅទីស្ដីការក្រសួង រាជធានីភ្នំពេញ។

ក្នុងឱកាសនោះ លោករដ្ឋមន្ត្រី នេត្រ ភក្ត្រា បានថ្លែង អំណរគុណ ចំពោះលោកឧកញ៉ាឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយក សហគ្រាសផលិតឱសថប៉េប៉េអឹម ដែលបានផ្តល់អំណោយ ជាឱសថដើម្បីចែកជូន ដល់បងប្អូនមន្ត្រី នៃក្រសួងព័ត៌មាន និងមួយចំណែក សម្រាប់ចែកជូនបងប្អូន ប្រជាពលរដ្ឋនៅតាមទីជនបទ ក្នុងមូលដ្ឋានខេត្តក្រចេះ។ នេះបើយោងតាមការចុះផ្សាយ របស់គេហទំព័រក្រសួងព័ត៌មាន ។ 

សូមបញ្ជាក់ថា លោក នេត្រ ភក្ត្រា រដ្ឋមន្ត្រីក្រសួងព័ត៌មានត្រូវបានរាជរដ្ឋាភិបាល ចាត់តាំងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តក្រចេះ៕