ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា សម្តេចមិនរំពឹង១០ទៅ៣០ឆ្នាំខាងមុខ ប្រទេសកម្ពុជាត្រូវគ្របដណ្តប់ដោយក្រុមហ៊ុនធំៗនោះទេ ខណៈដែលមូលដ្ឋានគ្រឹះនៃសេដ្ឋកិច្ច គឺជាក្រុមហ៊ុនមីក្រូ SME ដែលត្រូវលើកស្ទួយ ។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នាថ្ងៃទី២១ ខែកុម្ភៈនេះសម្តេចធិបតី ហ៊ុន ម៉ាណែត មានប្រសាសន៍ថា “គ្រឹះសេដ្ឋកិច្ចរបស់យើង រចនាសម្ព័ន្ធសេដ្ឋកិច្ចរបស់យើង ពឹងផ្អែកទៅលើវិស័យឯកជនច្រើន ដែលជាកម្លាំងស្នូល ហើយក្នុងវិស័យឯកជននោះ គឺជាសហគ្រាសនេះហើយ ហើយសហគ្រាសប្រភេទណានៅកម្ពុជា ខ្ញុំគិតថា ហើយយើងត្រូវទទួលស្គាល់ថា មីក្រូ SME នេះឯង គឺជាមូលដ្ឋានគ្រឹះ នៃសេដ្ឋកិច្ចរបស់យើង” ។
ជាមួយគ្នានេះ សម្តេចធិបតី បានលើកឡើងថា “នៅប្រទេសអ្នកមាន ប្រទេស OECD បើតាមមើលទិន្ន័យ ៩៥% នៃក្រុមហ៊ុនទាំងអស់នៅប្រទេសនោះ គឺជា SME នេះឯង ។ SME បានន័យថា ក្រុមតូច មធ្យម ដែលមានបុគ្គលិក ២៥០នាក់ចុះ អីចឹង៩៥%នៅប្រទេសអ្នកមាន គឺក្រុមប្រភេទនេះ សម្រាប់នៅកម្ពុជាយើង បើតាមទិន្ន័យដែលស្តង់ដារ ដែលមានចុងក្រោយ ២០១៨ គឺ៩៩ជាងភាគរយ គឺក្រុមហ៊ុនប្រភេទនេះ ហើយខ្ញុំមិនរំពឹងថា ទៅមុខ ១០ទៅ២០-៣០ឆ្នាំទៀត ប្រទេសយើង គ្របដណ្តប់ដោយក្រុមហ៊ុនធំនោះទេ បើមិនចឹងមានតែ៣-៤ក្រុមហ៊ុនអស់មួយប្រទេសហើយ ។ ចឹងក្រុមហ៊ុនមីក្រូ SME នេះនៅតែជាមូលដ្ឋាន ដែលយើងត្រូវលើកស្ទួយ” ។
សម្តេចបានគូសបញ្ជាក់ថា “គោលនយោបាយ ពាក់ព័ន្ធទៅនឹងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលឈ្មោះនេះ គឺបានបញ្ជាក់រួចទៅហើយ គឺពាក់ព័ន្ធទៅនឹងកិច្ចការងារនេះ ។ ចឹងការដាក់ចេញផែនការរបស់យើង នៅក្នុងការបង្កើតការងារ ត្រូវធ្វើយ៉ាងណា ឲ្យមូលដ្ឋានសេដ្ឋកិច្ចយើងរឹងមាំ មូលដ្ឋានសេដ្ឋកិច្ច គឺវិស័យឯកជន ហើយវិស័យឯកជនរឹងមាំបាន ត្រូវមើលនៅក្នុងផ្នែកទាំងនោះ ពិតណាស់ក្រុមហ៊ុនធំៗ គឺយើងទាក់ទាញមក ប៉ុន្តែកុំភ្លេចនៅក្រុមហ៊ុនតូចៗ SME ឬមួយក្រុមហ៊ុនមីក្រូ ដែល១០នាក់តូចជាងហ្នឹង”។
សម្តេចធិបតី ក៏បញ្ជាក់ថា គោលនយោបាយដែលបានដាក់ចេញមកនេះ ជាពិសេសពាក់ព័ន្ធជាមួយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍តែម្តង គឺត្រូវជំរុញលើកទឹកចិត្ត ធ្វើយ៉ាងណា ឲ្យ SME នេះដើរ៕
