ភ្នំពេញ ៖ ក្រសួងកិច្ចការនារី និងក្រុមហ៊ុន ខេមប្រ៊ូវ បានសហការគ្នារៀបចំពិធីអបអរសាទរ ទិវាអន្តរជាតិនារី ៨ មីនា ឆ្នាំ២០២៤ ក្រោមប្រធានបទ «ការជំរុញបរិយាបន្ននៅកន្លែងការងារ» ដែលពិធីនេះរៀបចំឡើងនៅរោងភាពយន្ត Major Cineplex ក្នុងផ្សារទំនើបអ៊ីអន៣ រាជធានីភ្នំពេញ។
លោកស្រី ហ៊ូ និរមិត្តា រដ្ឋលេខាធិការក្រសួងកិច្ចការនារី ថ្លែងថា ក្នុងឆ្នាំ២០២៤នេះ រាជរដ្ឋាភិបាលនឹងប្រារព្វពិធីអបអរសាទរខួបទី១១៣ ទិវាអន្តរជាតិនារី ៨មីនា ក្រោមមូលបទ «ស្រ្តី និងក្មេងស្រីក្នុងបរិវត្តកម្មឌីជីថល» ក្នុងគោលបំណងរំលេចអំពីសក្តានុពល និងភាពចាំបាច់នៃការលើកកម្ពស់ការចូលរួម និងភាពជាតំណាងរបស់ស្រ្តី និងក្មេងស្រីក្នុងវិស័យឌីជីថល។ លោកជំទាវរដ្ឋលេខាធិការបន្ថែមថា កិច្ចសហការ និងភាពជាដៃគូរបស់វិស័យឯកជន ក្នុងការលើកកម្ពស់ស្ថានភាព និងតួនាទីស្រ្តី គឺជាកិច្ចការចំបាច់ និងជួយជំរុញពន្លឿនការឈានទៅសម្រេចគោលដៅ បានឆាប់ជាងមុន។
ជាមួយគ្នានេះ លោកស្រីរដ្ឋលេខាធិការ ក៏បានលើកទឹកចិត្តឱ្យស្រ្តី បន្តពង្រឹងភាពអង់អាច របស់ខ្លួន ដើម្បីទទួលយកអត្ថប្រយោជន៍ ពីបរិយាបន្ននៅកន្លែង ការងារ និងជាគុណតម្លៃសម្រាប់ខ្លួនឯង គ្រួសារ និងក្រុមហ៊ុនរបស់ខ្លួន ព្រមទាំងជាភាពជាគំរូដល់ស្រ្តី និងក្មេងស្រីផ្សេងៗទៀត។
លោក វ្ល៉ាឌីមៀរ វ៉ាវ៉ា អគ្គនាយកគ្រប់គ្រងក្រុមហ៊ុន ខេមប្រ៊ូវ មានប្រសាសន៍ថា ស្របតាមគោលបំណង ជាសកលរបស់ក្រុមហ៊ុន «អភិវឌ្ឍឲ្យកាន់តែប្រសើរ ទាំងថ្ងៃនេះ និងថ្ងៃស្អែក» និងដោយទទួលស្គាល់ពីសារៈសំខាន់នៃពិពិធភាព សមធម៌ និងបរិយាបន្ន (Diversity, Equity & Inclusion ‘DE&I’) នៅក្នុងអាជីវកម្ម សេដ្ឋកិច្ច និងសង្គម ក្រុមហ៊ុន ខេមប្រ៊ូវ ដែលជាបុត្រសម្ព័ន្ធមួយ របស់ក្រុមហ៊ុន Carlsberg Group បានដាក់ចេញ នូវយុទ្ធសាស្រ្តជាសកលជាមួយនឹងផែនការ សកម្មភាពជាក់លាក់ ដើម្បីបញ្ជ្រាបការយល់ដឹង លើកកម្ពស់ និងជំរុញ DE&I នៅទីកន្លែងការងារ ក្រោមរបៀបវារៈដែលមានឈ្មោះថា «WELCOME YOU»។
លោកអគ្គនាយកបន្តថា របៀបវារៈ DE&I នេះ ត្រូវបានដាក់បញ្ចូលទៅក្នុងយុទ្ធសាស្រ្តអាជីវកម្មអាទិភាពរបស់ក្រុមហ៊ុន ហើយយើងត្រូវធានាឲ្យបានថា សហសេវិករបស់យើងម្នាក់ៗ ទទួលស្គាល់ និងមានអារម្មណ៍ថា ពួកគេត្រូវបានរាប់បញ្ចូល ទទួលបានឱកាស និងការអភិវឌ្ឍដូចៗគ្នាប្រកបដោយសមធម៌។ លោកអគ្គនាយកបន្ថែមថា យើងក៏មានការប្តេជ្ញាខ្ពស់ ចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តី និងក្មេងស្រីនៅគ្រប់វិស័យ ជាពិសេសសេដ្ឋកិច្ច និងក្នុងបរិវត្តកម្មឌីជីថល។
ជាសក្ខីកម្ម និងនិមិត្តរូប នៃការប្តេជ្ញាចំពោះរបៀបវារៈ DE&I ខេមប្រ៊ូវ តែងតែប្រារព្ធទិវាអន្តរជាតិនារី ៨មីនា ជារៀងរាល់ឆ្នាំ ក៏ដូចជាដើម្បីសម្តែង ការគោរពកោតសរសើរ និងអរគុណ ដល់សហសេវិកទាំងអស់ ដែលបានចូលរួមយ៉ាងសកម្ម ក្នុងការនាំយកនូវសមិទ្ធផលលើ DE&I ហើយពួកគាត់ជាចរន្តផ្សាភ្ជាប់ អាជីវកម្មរបស់យើង ទៅក្នុងសហគមន៍ដែលយើងមានប្រតិបត្តិការ និងជាកម្លាំងជំរុញកំណើនអាជីវកម្មប្រកបដោយនវានុវត្តន៍ និងនិរន្តរភាព ៕
