បរទេស៖ អាជ្ញាធរបាននិយាយថា ក្រុមអ្នកជួយសង្គ្រោះ កំពុងស្វែងរកមនុស្សប្រាំពីរនាក់ បន្ទាប់ពីការបាក់ស្ពាន ដ៏សំខាន់មួយនៅក្នុងទីក្រុង Baltimore រដ្ឋ Maryland ភាគខាងកើត សហរដ្ឋអាមេរិក ។
យោងតាមសារព័ត៌មាន VOA ចេញផ្សាយនៅថ្ងៃទី២៦ ខែមីនា ឆ្នាំ២០២៤ បានឱ្យដឹងថា វីដេអូបង្ហាញពីស្ពាន Francis Scott Key បានបាក់ធ្លាក់ចូលទៅក្នុងទឹក នៃទន្លេ Patapsco បន្ទាប់ពីកប៉ាល់ដឹកកុងតឺន័រ ដែលមានទង់ជាតិសិង្ហបុរីឈ្មោះ Dali បានបុកជាមួយសសរស្ពាន នៅប្រហែលម៉ោង 05:30 UTC ម៉ោង 1:30 នាទីព្រឹក ម៉ោងក្នុងស្រុកថ្ងៃអង្គារ។
អាជ្ញាធរបាននិយាយថា រថយន្តជាច្រើនគ្រឿង បាននៅលើស្ពាន នៅពេលដែលការបាក់នេះកើតឡើង។ លោក James Wallace ប្រធានផ្នែកពន្លត់អគ្គីភ័យ នៃទីក្រុង Baltimore បានប្រាប់ក្រុម អ្នកយកព័ត៌មាន ក្នុងអំឡុងពេលនៃការធ្វើសន្និសីទ សារព័ត៌មានរយៈពេលប៉ុន្មានម៉ោង បន្ទាប់ពីគ្រោះមហន្តរាយ ដែលមនុស្សពីរនាក់ត្រូវបានទាញចេញពីទឹក។ ម្នាក់ត្រូវបានគេដឹកទៅមណ្ឌលរបួសក្នុងសភាពធ្ងន់ធ្ងរ ចំណែកម្នាក់ទៀតមិនមានរបួសនោះទេ។
អ្នកមុជទឹកកំពុងដោះស្រាយ ជាមួយនឹងសីតុណ្ហភាព ទឹកដែលត្រជាក់ដល់ឆ្អឹងប្រហែល ៩អង្សាសេ នៅពេលពួកគេស្វែង រកជនរងគ្រោះដែលអាចកើតមានផ្សេងទៀត។
អភិបាលក្រុង Baltimore លោក Brandon Scott បានហៅការបុក របស់កប៉ាល់ ជាមួយស្ពាននេះថា “សោកនាដកម្ម ដែលមិន នឹកស្មានដល់” ។ ស្នងការប៉ូលីស Baltimore លោក Richard Worley បាននិយាយថា មិនមាន “ការចង្អុលបង្ហាញ” ការប៉ះទង្គិចគ្នាដោយចេតនានោះទេ ៕
ប្រែសម្រួលៈ ណៃ តុលា
