ភ្នំពេញ ៖ រដ្ឋសភាកម្ពុជា បានកំណត់យកថ្ងៃទី១ ខែមេសា ខាងមុខនេះ បើកសម័យប្រជុំរដ្ឋសភាលើកទី២ នីតិកាលទី៧ របស់ខ្លួន។
ការកំណត់ថ្ងៃប្រជុំនេះ បន្ទាប់ពីសម្តេច ឃួន សុដារី ប្រធានរដ្ឋសភាកម្ពុជា នៅព្រឹកថ្ងៃ២៧ មីនា បានអញ្ជើញដឹកនាំកិច្ចប្រជុំ គណៈកម្មាធិការអចិន្រ្តៃយ៍រដ្ឋសភា ដើម្បីអនុម័តរបៀបវារៈសំខាន់ៗមួយចំនួន ។
កិច្ចប្រជុំគណៈកម្មាធិការ អចិន្រ្តៃយ៍រដ្ឋសភា បានកំណត់កាលបរិច្ឆេទ បើកសម័យប្រជុំរដ្ឋសភាលើកទី២ នៅព្រឹកថ្ងៃ១ មេសា ដោយមានរបៀបវារៈចំនួនពីរ ៖ ទី១- ព្រះរាជសារ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ក្នុងឱកាសបើកសម័យប្រជុំរដ្ឋសភាលើកទី២ នីតិកាលទី៧។ ទី២-របាយការណ៍លទ្ធផលការងារ រដ្ឋសភាចន្លោះសម័យប្រជុំរដ្ឋសភាលើកទី១ និងលើកទី២ ពីថ្ងៃទី១ ខែមករា ដល់ថ្ងៃទី១១ មីនា ឆ្នាំ២០២៤ ។
សូមជម្រាបថា រដ្ឋសភាបើកសម័យប្រជុំ ជាសាមញ្ញពីរដងក្នុងមួយឆ្នាំ ហើយសម័យប្រជុំនីមួយៗ មានថិរវេលាយ៉ាងតិចបីខែ ។ នៅក្នុងចន្លោះសម័យប្រជុំ រដ្ឋសភានីមួយៗ រដ្ឋសភាបានបំពេញមុខងារ របស់ខ្លួនយ៉ាងសកម្ម រួមមាន ៖ មុខងារនីតិកម្ម (ការតាក់តែង និងអនុម័តច្បាប់) មុខងារតាមដានការអនុវត្តច្បាប់ និងគោលនយោបាយ និងមុខងារភាពជាតំណាង ជូនប្រទេសជាតិនិងប្រជាពលរដ្ឋ ស្របតាមរដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភា៕
