ភ្នំពេញ៖ ក្រុមហ៊ុនកូរ៉េចំនួនពីរ បានចូលរួមដេញថ្លៃ គម្រោងសាងសង់ អគារមន្ទីរពេទ្យមួយ របស់ក្រសួងសុខាភិបាល និងគម្រោងទឹកស្អាត នៅទីក្រុងតាខ្មៅ អាចបង្ករជាហានិភ័យ សម្រាប់ការសាងសង់ នាពេលខាងមុខ។
បើតាមប្រភពច្បាស់ការមួយ ដោយសុំមិនបញ្ចេញឈ្មោះ បានឱ្យដឹងថា ក្រុមហ៊ុនកូរ៉េទាំងពីរនោះ រួមមាន៖
១/ ក្រុមហ៊ុន អ៊ីលស៊ុង កាយយ៉ុង (ILSUNG+KYERYONG) បានដេញថ្លៃទាប ចំពោះគម្រោងសាងសង់ អគារមន្ទីរពេទ្យមួយ របស់ក្រសួងសុខាភិបាល
២/ ក្រុមហ៊ុន អ៊ីលស៊ុង ផូសកូ (ILSUNG+POSCO) បានដេញថ្លៃទាប ចំពោះគម្រោងទឹកស្អាតនៅទីក្រុងតាខ្មៅ
ប្រភពខាងលើ បានបង្ហើបឱ្យដឹងទៀតថា ការដេញថ្លៃទាបរបស់ក្រុមហ៊ុនទាំងពីរ ដើម្បីយកឈ្នះ ហើយយកគម្រោង ដែលដេញបាននោះ ទៅធ្វើកម្ចីពីធនាគារ ។
ជាបទពិសោធន៍ ដែលក្រុមហ៊ុនកូរ៉េ ធ្លាប់ធ្វើកន្លងមកនោះ គម្រោងដែលដេញថ្លៃបាន នឹងយកទៅអោយក្រុមហ៊ុនខ្មែរដេញថ្លៃបន្ត ហើយបើក្រុមហ៊ុនខ្មែរណា (ពុំសូវចេះសរសេរគម្រោង) ហ៊ានដេញថ្លៃយកទៅសាងសង់បន្តនោះ វានឹងប្រឈម នូវហានិភ័យជាក់ជាពុំខាន ឧទាហរណ៍គម្រោងសាងសង់ផ្លូវជាតិលេខ៤៨ ដែលដេញថ្លៃបានដោយសម្ព័ន្ធក្រុមហ៊ុនកូរ៉េ ILSUNG & HANIL Joint Venture និងត្រួតពិនិត្យបច្ចេកទេស ដោយសម្ព័ន្ធក្រុមហ៊ុនទីប្រឹក្សាបច្ចេកទេស KCI & KECC Joint Venture ដែលបច្ចុប្បន្នកំពុងមានភាពយឺតយ៉ាវ ក្នុងការសាងសងព្រមទាំងរងការព្រមានពីក្រសួងសាធារណការនិងដឹកជញ្ជួន ជាដើម។
ប្រភពដដែលបញ្ជាក់ថា ក្រុមហ៊ុន អ៊ីលស៊ុង កាយយ៉ុង (ILSUNG+KYERYONG) និងក្រុមហ៊ុន អ៊ីលស៊ុង ផូសកូ (ILSUNG+POSCO) បានកំពុងប្រឈមនឹងការក្ស័យធន ទៅហើយ ព្រោះក្រុមហ៊ុនទាំងពីរនេះ មានជាប់ពាក់ព័ន្ធការខ្វះថវិកាបើកឱ្យបុគ្កលិក ធ្វើការសាងសង់ផ្លូវលេខ៣១២ តភ្ជាប់ពីស្ពានអ្នកលឿងទៅកាន់ព្រំដែនវៀតណាម ដែលជាគម្រោងដេញថ្លៃបាន ពីក្រុមហ៊ុន ILSUNG & HANIL Joint Venture របស់កូរ៉េ ផងដែរ។
មិនត្រឹមតែប៉ុណ្ណោះក្រុមហ៊ុនកូរ៉េទាំងពីរ ក៏ជាប់ពាក់ព័ន្ធទៅនឹងភាពមិនប្រក្រតីផ្សេងៗ ជាច្រើនទៀតផងដែរ ដូចជាគម្រោងសាងសង់ផ្លូវអភិវឌ្ឍន៍ជនបទ នៅក្នុងខេត្តកំពង់ស្ពឺជាដើម។
ជុំវិញករណីនេះ សាធារណៈមតិ ស្នើសុំឱ្យក្រសួងសុខាភិបាល និងស្ថាប័នពាក់ព័ន្ធទាំងអស់ ពិនិត្យមើលឡើងវិញ ចំពោះការដេញថ្លៃគម្រោងទាំងពីរខាងលើ ដើម្បីបញ្ចៀសនូវហានិភ័យ ណាមួយពីការហ៊ានដេញថ្លៃទាប របស់ក្រុមហ៊ុន អ៊ីលស៊ុង កាយយ៉ុង (ILSUNG+KYERYONG) និងក្រុមហ៊ុន អ៊ីលស៊ុង ផូសកូ (ILSUNG+POSCO)៕
