ភ្នំពេញ ៖ លោកសាស្ត្រាចារ្យ ឈាង រ៉ា រដ្ឋមន្ត្រី ក្រសួងសុខាភិបាល នៅថ្ងៃ៥ មេសានេះ បានអញ្ជើញ ក្នុងពិធីសម្ពោធដាក់ឱ្យដំណើរការ កម្មវិធីសហប្រតិបត្តិការអូស្ត្រាលី-កម្ពុជា ដើម្បីការផ្តល់សេវាប្រកបដោយនិរន្តរភាព និងសមធម៌ ដំណាក់កាលទី២ (ACCESS 2) នៅសណ្ឋាគារសូហ្វីតែល ភ្នំពេញភូគីត្រា ។
ក្នុងពិធីនេះក៏មានការអញ្ជើញ ចូលរួមពីលោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សា សកម្មភាពជនពិការ និងលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី
គម្រោងកិច្ចសហប្រតិបត្តិការ អូស្ត្រាលី-កម្ពុជា ដើម្បីសេវាសមធម៌ និងនិរន្តរភាព ដំណាក់កាលទី២ ឆ្នាំ២០២៣-២០២៨ នេះនឹងត្រូវអនុវត្ត ដោយក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា និង ក្រសួងកិច្ចការនារី ដោយផ្តោតលើការបង្កើន លទ្ធភាពទទួលបានសេវា ប្រកបដោយគុណភាព និង បរិយាបន្នសម្រាប់ជនមានពិការភាព និងជនរងគ្រោះ ដោយអំពើហិង្សាទាក់ទងនឹងយេនឌ័រនៅកម្ពុជា ក្រោមការឧបត្ថមថវិកា ពីរដ្ឋាភិបាល និងប្រជាជនអូស្ត្រាលី ។ កម្មវិធី ACCESS ២ នឹងបន្តគាំទ្រទាំងរាជរដ្ឋាភិបាលកម្ពុជា ទាំងស្ថាប័នថ្នាក់ជាតិ និងថ្នាក់ក្រោមជាតិ និងអង្គការសង្គមស៊ីវិល រួមមានអង្គការ មិនមែនរដ្ឋាភិបាល អង្គការតំណាងជនមានពិការភាព ស្ត្រី និងក្រុមជនជាតិដើមភាគតិច ដើម្បីអនុវត្តផែនការ សកម្មភាពជាតិ ទប់ស្កាត់អំពើហិង្សាលើស្ត្រី និង National Development Strategic Plan (NDSP) របស់រាជរដ្ឋាភិបាលកម្ពុជា ប្រកបដោយប្រសិទ្ធភាព និងធានាថា ជនមានពិការភាព ជនជាតិដើមភាគតិច និងស្ត្រីដែលរងគ្រោះដោយអំពើហិង្សាផ្នែកយេនឌ័រ ទទួលបានសេវា ដែលពួកគេត្រូវការ កាន់តែប្រសើរឡើង។
ក្នុងពិធីនេះ ក៏មានការចុះហត្ថលេខាលើ អនុស្សរណៈនៃការយោគយល់គ្នា រវាងរដ្ឋាភិបាលអូស្ត្រាលី តំណាងដោយលោកJustin Whyatt ឯកអគ្គរដ្ឋទូតអូស្ត្រាលី ប្រចាំកម្ពុជា ជាមួយភាគីកម្ពុជា តំណាងដោយលោកសាស្ត្រាចារ្យ ឈាង រ៉ា លោក ជា សុមេធី និងលោកស្រីអ៊ឹង កន្ថាផាវី លើគម្រោងកិច្ចសហប្រតិបត្តិការអូស្ត្រាលី-កម្ពុជា ដើម្បីសេវាសមធម៌ និងនិរន្តរភាព ដំណាក់កាលទី២ ឆ្នាំ ២០២៣-២០២៨ ។
សាស្ត្រាចារ្យរដ្ឋមន្ត្រី បានថ្លែងអំណរគុណ ដល់ស្ថានទូតអូស្រ្តាលី ដែលបានផ្តល់កិច្ច សហប្រតិបត្តិការគាំទ្រ រាជរដ្ឋាភិបាលកម្ពុជា ជាពិសេសការ រួមចំណែកគាំទ្រ ដល់ការអភិវឌ្ឍន៍ ប្រព័ន្ធសុខាភិបាល ឲ្យកាន់តែមានភាពធន់ ស៊ីជម្រៅ និងគ្រប់ជ្រុងជ្រោយ ព្រមទាំងបោះជំហាន ខិតទៅសម្រេចបានការ គ្របដណ្តប់សុខភាពជាសកល (UHC) និងការសម្រេចបាននូវគោលដៅអភិវឌ្ឍន៍ ប្រកបដោយចីរភាពកម្ពុជា (C-SDGs) ដែលធានាថាគ្មាននរណាម្នាក់ ត្រូវបានទុកចោល ដោយមិនបានទទួលសេវាថែទាំសុខភាព ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអណត្តិទី៧ ៕
