ភ្នំពេញ ៖ កាលពីថ្ងៃទី១០ ខែមេសា ឆ្នាំ២០២៤ រដ្ឋាករទឹកស្វយ័តក្រុងភ្នំពេញ (PPWSA) និងក្រុមហ៊ុន Vinci Construction Grands Projets (VCGP) បានចុះហត្ថលេខាលើកិច្ចសន្យាតម្លៃ ១០៣,៣ លានដុល្លារសម្រាប់ការរចនា និងការសាងសង់រោងចក្រផលិតទឹកស្អាតទី៣នៅបាក់ខែង។
គម្រោងនេះឆ្លើយតបទៅនឹងផែនការមេទីបីកែសម្រួលថ្មីរបស់ PPWSA (២០២២-២០៣០) ដែលប៉ាន់ស្មានទុកមុនថា នៅរាជធានីភ្នំពេញនឹងមានតម្រូវការទឹកស្អាត១,៤លានម៉ែត្រគូបក្នុងមួយថ្ងៃនៅឆ្នាំ២០៣០។ កិច្ចសន្យានេះធ្វើឡើងក្នុងក្របខ័ណ្ឌនៃគម្រោង “បាក់ខែងដំណាក់កាលទី៣” ដែលត្រូវបានចុះហត្ថលេខាកាលពីខែមករា ឆ្នាំ២០២៤ រវាងទីភ្នាក់ងារបារាំងសម្រាប់ការអភិវឌ្ឍ(AFD) និងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ។ ដំណាក់កាលទាំងបីរួមបញ្ចូលគ្នានឹងធ្វើឲ្យស្ថានីយ៍ប្រព្រឹត្តិកម្មទឹកស្អាតបាក់ខែងក្លាយទៅជារោងចក្រធំជាងគេរបស់ PPWSA និងធំបំផុតមួយនៅក្នុងតំបន់ ដែលអាចផលិតទឹកស្អាតបាន៦០០០ ០០០ម៉ែត្រគីបក្នុងមួយថ្ងៃ។
កិច្ចសន្យានេះ នឹងអនុញ្ញាតឲ្យមានការសាងសង់ស្ថានីយ៍បូមទឹកឆៅថ្មីមួយ ស្ថានីយ៍ប្រព្រឹត្តិកម្មទឹកស្អាតថ្មីមួយ ព្រមទាំងតបណ្តាញបំពង់មេ និងបំពាក់ឧបករណ៍បន្ថែមចាំបាច់ផ្សេងៗទៀត។ ការសាងសង់គ្រោងចាប់ផ្តើមនៅឆមាសទីពីរនៃឆ្នាំ២០២៤ ហើយគ្រោងបញ្ចប់នៅឆ្នាំ២០២៧។ គម្រោងនេះនឹងរួមចំណែកជួយដល់ការទទួលបានទឹកស្អាតជាសកលសម្រាប់ប្រជាជននៅរាជធានីភ្នំពេញ និងតំបន់ជុំវិញ។
ពិធីចុះហត្ថលេខាខាងលើបានប្រព្រឹត្តទៅក្រោមវត្តមានរបស់ លោក ស៊ឹម ស៊ីថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាភិបាលនៃរដ្ឋាករទឹកស្វយ័តក្រុងភ្នំពេញ លោក Jacques PELLET ឯកអគ្គរដ្ឋទូតបារាំងប្រចាំកម្ពុជា លោក Igor Driesmans ឯកអគ្គរដ្ឋទូតនៃគណៈប្រតិភូសហភាពអឺរ៉ុបប្រចាំនៅកម្ពុជា លោក ឡុង ណារ៉ូ អគ្គនាយក PPWSA ព្រមទាំងតំណាងក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម និងទីភ្នាក់ងារ AFD ។
“គម្រោងនេះបង្ហាញពីកិច្ចសហប្រតិបត្តិការប្រកបដោយទំនុកចិត្តយូរអង្វែងរវាងប្រទេសបារាំង និងកម្ពុជា ដោយរួមបញ្ចូលគ្នានូវជំនាញរបស់ក្រុមហ៊ុនបារាំង និងការប្តេជ្ញាចិត្តរបស់ AFD ។ វាក៏បង្ហាញពីការប្តេជ្ញាចិត្តរបស់ក្រុមអ៊ឺរ៉ុបនៅក្នុងប្រទេសកម្ពុជានៅក្នុងក្របខ័ណ្ឌនៃយុទ្ធសាស្ត្រច្រកទ្វារសកល (Global Gateway)” នេះគឺជាប្រសាសន៍របស់ឯកអគ្គរដ្ឋទូតបារាំងនៅក្នុងពិធីខាងលើ។
ក្នុងក្របខ័ណ្ឌនៃភាពជាដៃគូរបស់ខ្លួនជាមួយកម្ពុជា ប្រទេសបារាំងបានដើរតួនាទីយ៉ាងសំខាន់ក្នុងការរួមចំណែកលើកកម្ពស់ការទទួលបានទឹកស្អាត និងអនាម័យសម្រាប់ប្រជាជនទាំងអស់ និងធានានូវការគ្រប់គ្រងធនធានទឹកប្រកបដោយនិរន្តរភាព ស្របតាមគោលដៅនៃការអភិវឌ្ឍន៍ប្រកបដោយចីរភាព៕
