កំពង់ស្ពឺ៖ សង្ឃក្លែងបន្លំខ្លួនចូលមកបិណ្ឌបាតថ្ងៃឆ្លងឆ្នាំថ្មី ១៤នាក់ ត្រូវសមត្ថកិច្ចឃាត់ខ្លួនភ្លាមៗ នៅក្នុងវត្តត្រពាំងព្នៅ ស្ថិតនៅភូមិស្នួល ឃុំអមលាំង ស្រុកថ្ពង ខេត្តកំពង់ស្ពឺ កាលពីព្រឹកថៃ្ងទី ១៨ មេសា ២០២៤ ។
លោកវរសេនីយ៍ឯក ហ៊ុន សុខហុន អធិការដ្ឋាននគរបាលស្រុកថ្ពង បានឲ្យដឹងថា ជនក្លែងបន្លំខ្លួនជាសង្ឃគ្រងស្បង់ចិវរចំនួន១៤ នាក់ បន្លំខ្លួនចូលក្នុងពិធីសាសនាបិណ្ឌបាត ថ្ងៃឆ្លងចូលឆ្នាំ ក្នុងវត្តត្រពាំងព្នៅ ក្រោយបិណ្ឌបាតរួច ក្រុមជនក្លែងបន្លំបានគេចឡេីងរបង និងលូនក្រោមខ្សែលួសរបង មូលហេតុមិនហ៊ានចេញតាមច្រកក្លោងទ្វារខាងមុខព្រោះមានសមត្ថកិច្ចនៅចាំទីនោះ។
ដោយឃេីញសកម្មភាពបែបនេះសមត្ថកិច្ចមានការសង្ស័យបាននាំគ្នាទៅមេីលស្រាប់តែក្រុមសង្ឃទាំងនោះបាននាំគ្នារត់តែម្ដង រីឯបក្ខពួកដែលជាអ្នកដឹកជញ្ជូនមកបេីករថយន្ដគេចខ្លួន និងរត់ចោលម៉ូតូកង់បី Passapp មួយគ្រឿង ដែលមានស្លាកលេខ ភ្នំពេញ 1KE-2876 (ឃាត់បាន) ។
ក្រោយឃាត់ខ្លួននិងមានកិច្ចសហការពីការិយាល័យធម្មការស្រុក និងព្រះអនុគុណស្រុក បាននាំយកក្រុមសង្ឃក្លែងទាំងនោះមកដល់ វត្តត្រពាំងត្រោកដើម្បីសាកសួរពាក់ព័ន្ធករណីខាងលេី ។
ក្រោយសាកសួរក្រុមសង្ឃក្លែងបន្លំទាំង ១៤នាក់ បានទទួលស្គាល់ថា ពួកគេមិនមែនជាសង្ឍនោះទេ សមត្ថកិច្ចបានបន្ដធ្វេីតេស្ដរកសារធាតុញៀន ជាលទ្ធផលបានរកឃេីញវិជ្ជមាន ៩នាក់ អវិជ្ជមាន ៥នាក់។
បន្ទាប់ពីសាកសួរបំភ្លឺ ជនសង្ស័យទាំង ១៤នាក់ ត្រូវបានកសាងសំណុំរឿងបញ្ជូនមកផែនការងារសន្ដិសុខ ដេីម្បីបន្ដនីតិវិធី៕
