ពោធិ៍សាត់: លោកខូយ រីដា អភិបាលខេត្តពោធិ៍សាត់ និង ជាប្រធានគណ:បញ្ជាការឯកភាពរដ្ឋបាលខេត្ត នៅថ្ងៃទី ២០ ខែ មេសា ឆ្នាំ ២០២៤ បានដឹកនាំមន្ត្រី ក្រោមឱវាទចុះត្រួតពិនិត្យ និង សួរសុខទុក្ខកម្លាំងទាំង ១០ ក្រុមដែលកំពុងបំពេញ បេសកកម្មចុះបង្ក្រាប និង ទប់ស្កាត់បទល្មើស ធនធានធម្មជាតិ នៅស្រុកវាលវែង និង ស្រុកភ្នំក្រវាញ។
ក្នុងដំណើរចុះត្រួតពិនិត្យកម្លាំង ដែលកំពុងបំពេញបេសកកម្មទប់ស្កាត់ និង បង្ក្រាបបទល្មើស ធនធានធម្មជាតិ នៅស្រុកទាំងពីរខាងលើនេះ គឺដើម្បីលើកទឹកចិត្ត និង ចង់ដឹងអំពីសុខ ទុក្ខ ការរស់នៅ ការហូបចុក ព្រមទាំងឧបត្ថម្ភនូវសម្ភារះ ថវិកាបន្ថែមជូនដល់កងកម្លាំងប្រចាំការ និង ឈរជើងនៅគ្រប់គោលដៅនីមួយៗ។
មានប្រសាសន៍នាឱកាសនោះ អភិបាលខេត្តបានកោតសរសើរ និង វាយតម្លៃខ្ពស់ដល់កម្លាំងចម្រុះ នៃ អនុគណះកម្មការទាំង ១០ ក្រុមដែលបាន និង កំពុងឈរជើងបំពេញបេសកកម្មចុះទប់ស្កាត់ និង បង្ក្រាបបទល្មើសធនធានធម្មជាតិ នៅក្នុងភូមិសាស្ត្រស្រុកវាលវែង និង ស្រុកភ្នំក្រវាញ បានយ៉ាងសកម្មនៅគ្រប់គោលដៅទាំងអស់។លោកសូមអោយបន្ត នូវ កិច្ចការងារនេះបន្ថែមទៀត និង ធ្វើអោយបានល្អ ម៉ត់ចត់ និង ទទួលខុស ត្រូវខ្ពស់ និង ទទួលបានជោគជ័យ ជូនរាជរដ្ឋាភិបាលកម្ពុជា និង ប្រជាពលរដ្ឋដែលស្រលាញ់ នូវសម្បត្តិធនធានធម្មជាតិរបស់យើង។
គួរបញ្ជាក់ថា ចាប់ពីថ្ងៃទី ៦ ខែ មិនា ដល់ថ្ងៃទី ៣១ ខែ មិនា ឆ្នាំ ២០២៤ គណះបញ្ជាការឯកភាព រដ្ឋបាលខេត្តពោធិ៍សាត់ បានបញ្ជូនកម្លាំងចម្រុះចុះប្រតិបត្តិការទប់ស្កាត់ និង បង្ក្រាបបទល្មើសធនធានធម្មជាតិ ដែលកំពុងកើតមានយ៉ាងក្តៅគគុកនៅក្នុងស្រុកវាលវែង និង ស្រុកភ្នំក្រវាញ នៃ ភូមិសាស្ត្រខេត្តពោធិ៍សាត់ ដោយឃ្លុំដីទុក ជាសម្បត្តិរដ្ឋបានប្រមាណ ៣៩,៥០៧ ហិចតា កសាងផែនទីជូនក្រសួងបរិស្ថាន ដើម្បីកំណត់ភូមិសាស្រ្តស្តារ ព្រៃឈើឡើងវិញ ឃុំខ្លួនជនល្មើសចំនួន ១៤ នាក់ និង អប់រំចំនួន ៥១ នាក់ ព្រមទាំងស្រាវជ្រាវសាវតាជាតិ ដើម្បីកំណត់មុខសញ្ញាបន្ថែមទៀត៕
