ភ្នំពេញ ៖ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងថា យុវជនតបស្នងគុណ ឪពុក-ម្តាយ តាមរយៈការចេះរកលុយ ជាជាងសុំលុយពី ឪពុក-ម្តាយ។
![](https://dap-news.com/wp-content/uploads/2024/05/photo_2024-05-29_16-27-01-1024x682.jpg)
ការលើកឡើងរបស់ លោករដ្ឋមន្រ្តីបរិស្ថាន ធ្វើឡើងនៅចំពោះមុខសិស្សនិស្សិត នៃសកលវិទ្យាល័យភូមិន្ទភ្នំពេញប្រមាណជាង ២,០០០នាក់ ក្នុងពិធីផ្តល់បាឋកថាស្តីពី «យុទ្ធសាស្រ្តចក្រាវិស័យបរិស្ថាន» នាថ្ងៃ២៩ ឧសភា ។
![](https://dap-news.com/wp-content/uploads/2024/05/photo_2024-05-29_16-26-50-1024x682.jpg)
លោករដ្ឋមន្រ្តីគូសបញ្ជាក់ថា «ក្នុងនាមជាកូនម្នាក់ យើងមិនគួរណាសុំលុយពីឪពុកម្តាយនោះទេ»។ ក្នុងឃ្លាដែលជាន័យប្រៀបធៀបនេះ គឺលោករដ្ឋមន្រ្តី ចង់បង្រៀនឲ្យយុវជនខ្មែរ ដែលមានចំណេះ ជំនាញ និងសមត្ថភាព ចូលរួមចំណែកក្នុងកិច្ចការពារបរិស្ថាន ឆ្លើយតបនឹងការប្រែប្រួលអាកាសធាតុ ដែលជាបញ្ហាសកល តាមរយៈការរៀបចំឲ្យមានគម្រោងអភិវឌ្ឍន៍នានា ដើម្បីកៀរគរ ថវិកាពីអន្តរជាតិ មកជួយអភិវឌ្ឍ និងលើកស្ទួយជីវភាព របស់ប្រជាពលរដ្ឋខ្មែរ ជាជាងនៅរង់ចាំតែសុំលុយរដ្ឋ យកទៅប្រើប្រាស់។
![](https://dap-news.com/wp-content/uploads/2024/05/photo_2024-05-29_16-26-30-1024x682.jpg)
ចំពោះក្រសួងបរិស្ថានវិញ នឹងគាំទ្រយ៉ាងពេញទំហឹង លើគម្រោងអភិវឌ្ឍ និងគម្រោងវិនិយោគទាំងឡាយណា ដែលឆ្លើយតបនឹងបញ្ហាបរិស្ថាន ហើយជាគម្រោងដែលច្នៃប្រឌិតចេញពីគំនិតរបស់យុវជនខ្មែរ។
![](https://dap-news.com/wp-content/uploads/2024/05/photo_2024-05-29_16-26-34-1024x682.jpg)
ជាមួយគ្នានេះ លោករដ្ឋមន្រ្តី ក៏បានលើកយកឧទាហរណ៍ជាក់ស្តែង ដែលយុវជនខ្មែរមួយ ក្រុមជាសិស្សនិស្សិត ចេះច្នៃកាកអំពៅ យកទៅធ្វើជាចានក្រដាស់ប្រើប្រាស់ជំនួសឲ្យប្លាស្ទិកបាន ។ នេះហើយជាគំនិតច្នៃប្រឌិតរបស់កូនខ្មែរ ដែលអាចស្រូបទាញការវិនិយោគ គម្រោងអភិវឌ្ឍនានាពីអន្តរជាតិ មកជួយដល់ប្រជាពលរដ្ឋខ្មែរ នៅតាមសហគមន៍ជនបទ ជាពិសេសប្រជាសហគមន៍ នៅតាមតំបន់ការពារធម្មជាតិ ដែលនេះជាទង្វើ និងជាបទពិសោធន៍ល្អ របស់ប្រទេសអភិវឌ្ឍន៍ ដែលមានប្រជាពលរដ្ឋចេះជួយរកប្រាក់ចំណូលជូនប្រទេស ហើយមិនរង់ចាំតែ ការជួយពីរដ្ឋនោះឡើយ ៕
![](https://dap-news.com/wp-content/uploads/2024/05/photo_2024-05-29_16-26-40-1024x682.jpg)
![](https://dap-news.com/wp-content/uploads/2024/05/photo_2024-05-29_16-26-44-1024x682.jpg)
![](https://dap-news.com/wp-content/uploads/2020/08/1-1.png)