ភ្នំពេញ ៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងដំណើរបេសកកម្មគោះទ្វារវិនិយោគក្នុងប្រទេសអេស្ប៉ាញ បានទទួលជួបពិភាក្សាការងារ ជាមួយបណ្ដាក្រុមហ៊ុនធំៗ របស់អេស្ប៉ាញ ដើម្បីបញ្ច្រៀបបន្ថែមទៀតអំពីបេសកកម្ម និងការត្រៀមខ្លួន របស់ក្រុមប្រឹក្សាអភិវឌ្ឍន៍កម្ពុជា ក្នុងការសម្របសម្រួលកិច្ចការងារ របស់វិនិយោគិន ដើម្បីធានានូវជោគជ័យភាព របស់បណ្ដាក្រុមហ៊ុន ដែលសម្រេចចិត្តដាក់ទុនវិនិយោគនៅកម្ពុជា ។
![](https://dap-news.com/wp-content/uploads/2024/06/photo_2024-06-11_14-57-24-1024x682.jpg)
បណ្ដាក្រុមហ៊ុន ដែលលោកឧបនាយករដ្ឋមន្ត្រី ទទួលជួបពិភាក្សាការងារ ដូចជា៖
១. ក្រុមហ៊ុន INSUD PHARMA ដែលជាក្រុមហ៊ុនឱសថ ល្បីល្បាញមួយមានជំនាញ ក្នុងការស្រាវជ្រាវ ការអភិវឌ្ឍ និងការផលិតថ្នាំ ដែលមានគុណភាពខ្ពស់ និងបច្ចុប្បន្នមានប្រតិបត្តិការ នៅប្រមាណជាង ៤០ប្រទេសរួចមកហើយ។
២. ក្រុមហ៊ុន CENTUNION គឺជាក្រុមហ៊ុនវិស្វកម្ម និងសំណង់ ដែលមានឯកទេសក្នុងការរចនា និងប្រតិបត្តិការគម្រោងឧស្សាហកម្មនៅទូទាំងពិភពលោក ជាមួយនឹងបទពិសោធន៍ប្រមាណ៦០ឆ្នាំ លើគម្រោងដែលបានបញ្ចប់រួចរាល់ជាង៣០០ នៅ៥០ប្រទេសរួមមានតំបន់អាស៊ីអាគ្នេយ៍ផងដែរ។
![](https://dap-news.com/wp-content/uploads/2024/06/photo_2024-06-11_14-57-32-1024x682.jpg)
៣. ក្រុមហ៊ុន MELIA GROUP មានប្រតិបត្តិការអាជីវកម្មសណ្ឋាគារឈានមុខគេលំដាប់ពិភពលោក ជាមួយសណ្ឋាគារចំនួនជាង៣៨០ នៅក្នុងប្រទេសចំនួន៤០។ MELIA Hotels International កំពុងស្វែងរកដៃ គូសហការនៅកម្ពុជា ដើម្បីពង្រីកសណ្ឋាគារ និងទេសចរណ៍ ក្នុងប្រទេសផងដែរ។
៤. ក្រុមហ៊ុន MOLECOR គឺជាក្រុមហ៊ុនដែលមានឯកទេសក្នុងការផលិតបំពង់ PVC-O ដែលមានគុណភាពខ្ពស់។ បច្ចុប្បន្ននេះ ផលិតផលរបស់ក្រុមហ៊ុន MOLECOR ត្រូវបានប្រើប្រាស់នៅក្នុងប្រទេសជាង២៥រួចមកហើយ។
![](https://dap-news.com/wp-content/uploads/2024/06/photo_2024-06-11_14-57-36-1024x682.jpg)
៥. ក្រុមហ៊ុន CAF គឺជាក្រុមហ៊ុនដែលមានវត្តមាន នៅប្រមាណ៤០ប្រទេសរួចមកហើយ ក្នុងការផ្តល់ជូននូវផលិតផល និងសេវាកម្មជាច្រើនក្នុងដំណោះស្រាយផ្លូវដែក រួមមានរថភ្លើងល្បឿនលឿន និងការថែទាំជាដើម។
![](https://dap-news.com/wp-content/uploads/2024/06/photo_2024-06-11_14-57-40-1024x682.jpg)
៦. ក្រុមហ៊ុន BIORIZON BIOTECH គឺជាក្រុមហ៊ុនដែលមានមុខសញ្ញាផ្តោតលើជីវបច្ចេកវិទ្យា សម្រាប់វិស័យកសិកម្ម។
៧. ក្រុមហ៊ុន EDUCTRADE គឺជាក្រុមហ៊ុនដែលមានបទពិសោធន៍ជាង៤០ឆ្នាំ ក្នុងគម្រោងជាច្រើន លើវិស័យសុខាភិបាល ការអប់រំ ធនធានទឹកនិងថាមពល នៅប្រមាណ៤០ប្រទេសទូទាំងពិភពលោក។
៨. ក្រុមហ៊ុន TALGO ជាក្រុមហ៊ុន ដែលមានឯកទេសក្នុងការរចនា ផលិត និងថែទាំរថភ្លើង ដែលក្រុមហ៊ុននេះ បានដាក់សាកល្បងប្រើប្រាស់ផ្លូវរថភ្លើងដំបូង របស់ខ្លួនតាំងពីឆ្នាំ១៩៤១។
![](https://dap-news.com/wp-content/uploads/2024/06/photo_2024-06-11_14-57-43-1024x682.jpg)
ក្នុងដំណើរទៅអេស្ប៉ាញនេះ គណៈប្រតិភូកម្ពុជាអញ្ជើញអមដំណើរ លោកឧបនាយករដ្ឋមន្ត្រី មានសមាសភាពមកពីក្រសួង-ស្ថាប័នពាក់ព័ន្ធ, សភាពាណិជ្ជកម្មកម្ពុជា, សមាគមឧកញ៉ា, និងវិស័យឯកជនកម្ពុជា ក៏បានអញ្ជើញជួបពិភាក្សាការងារ (Business-to-Business_B2B) ជាមួយតំណាងក្រុមហ៊ុនប្រមាណជាង ៣០ផ្សេងទៀតរបស់អេស្ប៉ាញផងដែរ៕
![](https://dap-news.com/wp-content/uploads/2020/08/1-1.png)