បរទេស៖ យោងតាមការចេញផ្សាយរបស់ RT ទីក្រុងមូស្គូបានបង្កើនចំនួន នៅក្នុងបញ្ជីហាមប្រាមការ ធ្វើដំណើររបស់ខ្លួន ហើយបានប្តេជ្ញាថា នឹងមានការឆ្លើយតបត្រឹមត្រូវចំពោះទង្វើ ដែលមិនរាក់ទាក់បន្ថែមទៀតពីទីក្រុងប្រ៊ូសែល បន្ទាប់ពីសហភាពអឺរ៉ុប បានប្រកាសពីការពង្រីកវិធានការរឹតបន្តឹង ឯកតោភាគីមកលើប្រទេសរបស់ខ្លួន។
នៅក្នុងកញ្ចប់ទណ្ឌកម្មទី ១៤របស់ខ្លួន ដែលបានបង្ហាញកាលពីថ្ងៃចន្ទ សហភាពអឺរ៉ុបបានចុះបញ្ជីខ្មៅ បុគ្គលចំនួន ៦៩បន្ថែមទៀត និងអង្គភាពចំនួន ៤៧ ក៏ដូចជាការដឹកជញ្ជូនឧស្ម័នធម្មជាតិរាវ (LNG) របស់រុស្ស៊ី និងប្រព័ន្ធទូទាត់ធនាគាររបស់រុស្ស៊ី។
ក្រសួងការបរទេសរុស្ស៊ី បាននិយាយនៅក្នុងសេចក្តីថ្លែងការណ៍មួយថា សកម្មភាពរបស់សហភាពអឺរ៉ុបគឺ ខុសច្បាប់តាមទស្សនៈផ្លូវច្បាប់អន្តរជាតិ ចាប់តាំងពីពួកគេត្រូវបានអនុវត្តដោយរំលង ក្រុមប្រឹក្សាសន្តិសុខអង្គការសហប្រជាជាតិ។
ជាការឆ្លើយតបទៅនឹងវិធានការ មិនរាក់ទាក់របស់សហភាពអឺរ៉ុប ទីក្រុងមូស្គូបាន ធ្វើការពង្រីកដ៏សំខាន់ នូវបញ្ជីឈ្មោះមនុស្សដែលត្រូវបាន ហាមឃាត់មិនឱ្យចូលទឹកដីរុស្ស៊ី ហើយដែលក្នុងនោះគេសង្កេតឃើញមានសមាជិកក្រុមប្រឹក្សាអឺរ៉ុប សមាជិកសភានៃប្រទេសសមាជិកសហភាពអឺរ៉ុប និងគណៈប្រតិភូជាតិប្រចាំសភាអឺរ៉ុបជាច្រើននាក់ ៕
ប្រែសម្រួល៖ ស៊ុន លី
