ភ្នំពេញ ៖ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅតែបន្តស្វាគមន៍ នូវកិច្ចសហប្រតិបត្តិការ ពីគ្រប់ភាគីពាក់ព័ន្ធ សំដៅធ្វើយ៉ាងណាលើកកម្ពស់ គុណភាពបរិស្ថានកម្ពុជា ដើម្បីជាមោទកភាពកម្ពុជា លើឆាកអន្តរជាតិ។
ក្នុងឱកាសអញ្ជើញជាអធិបតី ក្នុងពិធីចុះអនុស្សរណៈនៃការយោគយល់គ្នា ស្តីពី «កិច្ចសហប្រតិបត្តិការលើវិស័យបរិស្ថាន» រវាងក្រសួងបរិស្ថាន និងក្រុមហ៊ុន JTI នៅថ្ងៃទី២៧ មិថុនា នាទីស្តីការក្រសួង លោករដ្ឋមន្ដ្រី អ៊ាង សុផល្លែតគូសបញ្ជាក់ថា «ការសម្រេចបានជោគជ័យ ក្នុងការអនុវត្តយុទ្ធសាស្រ្ត ចក្រាវិស័យបរិស្ថាន របស់ក្រសួងបរិស្ថាន គឺមិនអាចខ្វះបានពីការ ចូលរួមពីស្ថាប័នពាក់ព័ន្ធ គ្រប់លំដាក់ថ្នាក់ ប្រជាពលរដ្ឋ ដៃគូអភិវឌ្ឍន៍ និងវិស័យឯកជន បាននោះទេ និងដើម្បីសម្រេច បានភាពជោគជ័យជាបន្តបន្ទាប់ទៀត ក្រសួងបរិស្ថាន នៅតែបន្តស្វាគមន៍នូវកិច្ចសហប្រតិបត្តិការ ពីគ្រប់ភាគីពាក់ព័ន្ធ សំដៅធ្វើយ៉ាងណាលើកកម្ពស់គុណភាពបរិស្ថានកម្ពុជា ដើម្បីជាមោទកភាពកម្ពុជា លើឆាកអន្តរជាតិ»។
រដ្ឋមន្រ្តីមានប្រសាសន៍បន្ថែមថា ការចុះអនុស្សរណៈនៃការយោគយល់គ្នាស្តីពី «កិច្ចសហប្រតិបត្តិការ លើវិស័យបរិស្ថាន» រវាងក្រសួងបរិស្ថាន និង ក្រុមហ៊ុន JTI បានបង្ហាញ ឲ្យកាន់តែច្បាស់អំពីការ ចូលរួមពីវិស័យឯកជន ក្នុងការលើកកម្ពស់ គុណភាព បរិស្ថានកម្ពុជា និងចូលរួមចំណែក ជាមួយក្រសួង បរិស្ថាន ក្នុងការអនុវត្តយុទ្ធសាស្រ្ត ចក្រាវិស័យបរិស្ថាន ឲ្យទទួលបានជោគជ័យបន្ថែមទៀត។
ក្រុមហ៊ុន JTI ជាក្រុមហ៊ុនឯកជនមួយ ដែបានដកថវិកាចំណេញប្រចាំឆ្នាំរបស់ខ្លួនមួយចំនួន សម្រាប់ជួយសហគមន៍ នៅតាមជនបទ ដោយផ្តោតលើគោលដៅចំនួន៣ គឺ៖ ១.កាត់បន្ថយវិសមភាព ២.កិច្ចការពារបរិស្ថាន និង៣.ជួយសហគមន៍ នៅក្នុងតំបន់ងាយរងគ្រោះ និងគ្រោះមហន្តរាយ ។ ក្នុងឱកាសនេះផងដែរ ក្រុមហ៊ុនបាននាំមកនូវ រឺម៉កម៉ូតូកង់បី ចំនួន៣៣ គ្រឿង ប្រគល់ជូនក្រសួងបរិស្ថាន សម្រាប់បែងចែក ជូនដល់រដ្ឋបាលថ្នាក់ក្រោមជាតិ ដើម្បីចូលរួមគាំទ្រសកម្មភាពប្រមូល សម្អាតសំរាម សំដៅឱ្យកម្ពុជាមានភាពស្អាត និងស្រស់បំព្រង។
សូមបញ្ជាក់ថា ក្នុងគោលដៅ យុទ្ធសាស្រ្តទី១ «ភាពស្អាត» របស់យុទ្ធសាស្រ្តចក្រាវិស័យ បរិស្ថាន ក្រសួងបានដាក់ ចេញយុទ្ធនាការ កាត់បន្ថយការប្រើប្រាស់ ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ចាប់ពីថ្ងៃទី១ ខែកញ្ញា ឆ្នាំ២០២៣ មកដល់ពេលនេះ មានអ្នកចូលរួមប្រមាណជាង ៨,៥លាននាក់ ដែលស្មើនឹងជាងពាក់កណ្តាល នៃចំនួនប្រជាពលរដ្ឋ សរុបទូទាំងប្រទេស ដែលបានចូលរួមកាត់បន្ថយ ការប្រើប្រាស់ថង់ប្លាស្ទិកក្នុង ១ថ្ងៃ ប្រមាណជាង ៣០លានថង់។ នេះជាជោគជ័យមួយដែលលើសពីការរំពឹងទុក។ បច្ចុប្បន្ននេះ ក៏នៅមានសាលារៀន រោងចក្រ សហគ្រាស ក្រុមហ៊ុនឯកជន និងវត្តអារាមនានា បានកំពុងចូលរួមនៅក្នុងយុទ្ធនាការនេះជាបន្តបន្ទាប់។
យុទ្ធនាការ «កម្ពុជាស្អាត ខ្មែរធ្វើបាន» ចាប់ពីថ្ងៃទី១៥ ខែឧសភា ឆ្នាំ២០២៤ គឺជាយុទ្ធនាការបំផុសឲ្យសិស្សានុសិស្ស ប្រជាពលរដ្ឋចេញរើសសំរាម សម្អាតបរិវេណផ្ទះ សាលារៀន វត្តអារាម ទីសាធារណៈ រយៈពេល១៥នាទី នៅរៀងរាល់ថ្ងៃសៅរ៍ ដើម្បីបំផុសផ្នត់គំនិតស្អាត ចលនាធ្វើឲ្យមូលដ្ឋាន ស្អាត ឱ្យកម្ពុជាស្អាត ទាំងក្នុងប្រទេសនិង ស្អាតលើឆាកអន្តរជាតិ៕
