ភ្នំពេញ ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនៅថ្ងៃពុធ ទី៣ ខែកក្កដា ឆ្នាំ២០២៤នេះ បានជួបពិភាក្សាការងារជាមួយលោក Tetsuya Watanabe ប្រធានវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា(ERIA) និងគណៈប្រតិភូនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។
![](https://dap-news.com/wp-content/uploads/2024/07/photo_2024-07-04_06-57-44-1024x683.jpg)
ក្នុងនោះ លោករដ្ឋមន្ត្រី បានគូសបញ្ជាក់ ទៅកាន់គណៈប្រធានវិទ្យាស្ថាន ERIA អំពីសក្តានុពល នៃការបណ្តុះបណ្តាលជំនាញវិជ្ជាជីៈ និងបច្ចេកទេស ដែលរាជរដ្ឋាភិបាលអាណត្តិទី៧ បានដាក់ចេញ នូវផែនការថ្នាក់ជាតិ ក្នុងការបំពាក់បំប៉នជំនាញដល់យុវជន និងប្រជាពលរដ្ឋ ឱ្យមានជំនាញច្បាស់លាស់ ដើម្បីបម្រើទៅតាមតម្រូវការទីផ្សារ ដែលជាគន្លឹះក្នុងការបន្តទាក់ទាញការវិនិយោគបន្ថែមមកកម្ពុជា។
![](https://dap-news.com/wp-content/uploads/2024/07/photo_2024-07-04_06-57-47-1024x682.jpg)
ជាមួយគ្នានេះ លោករដ្ឋមន្ត្រី បានចែករំលែកដល់សមភាគីស្តីពីចក្ខុវិស័យ នៃផែនការ៥ឆ្នាំរបស់ក្រសួងជាពិសេសលើការបណ្តុះបណ្តាលជំនាញបច្ចេកទេស និងវិជ្ជាជីវៈដែលជាផែនការ អាទិភាពមួយរបស់រាជរដ្ឋាភិបាលកម្ពុជា ក្នុងការផ្តល់ជំនាញដល់ប្រជាពលរដ្ឋខ្មែរ និងក្រុមយុវជន។
![](https://dap-news.com/wp-content/uploads/2024/07/photo_2024-07-04_06-57-51-1024x683.jpg)
ទន្ទឹមនឹងនេះ លោក Tetsuya Watanabe បានទទួលស្គាល់ពីតួនាទី យ៉ាងសំខាន់របស់ក្រសួងការងារ និង បណ្តុះបណ្តាលវិជ្ជាជីវៈ លើការបណ្តុះបណ្តាល ជំនាញ យល់យុវជន និងប្រជាពលរដ្ឋ ដែលជាកម្លាំងដ៏សំខាន់ក្នុងទីផ្សារការងារ ។
បន្ថែមពីនេះ លោករដ្ឋមន្ត្រី បានគូសបញ្ជាក់ពីការយកចិត្តទុកដាក់ របស់រាជរដ្ឋាភិបាល លើការបណ្តុះបណ្តាលជំនាញបច្ចេកទេសវិជ្ជាជីវៈ ដែលជាគន្លឹះមួយដ៏សំខាន់ក្នុងការប្រែក្លាយសេដ្ឋកិច្ចកម្ពុជាឱ្យក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេស ដែលមានចំណូលខ្ពស់នៅឆ្នាំ២០៥០។
![](https://dap-news.com/wp-content/uploads/2024/07/photo_2024-07-04_06-57-54-1024x682.jpg)
យ៉ាងណាក៏ដោយ លោករដ្ឋមន្ត្រី ក៏បានស្នើឱ្យវិទ្យាស្ថាន ស្រាវជ្រាវសេដ្ឋកិច្ចអាស៊ាន និងអាស៊ីបូព៌ាជួយជំរុញ និងផ្សព្វផ្សាយឱ្យអ្នកវិនិយោគ ក្នុងតំបន់និងអន្តរជាតិងាកមកចាប់អារម្មណ៍ នៅកម្ពុជាដែលកំពុងមានសក្តានុពល លើកកម្លាំងពលកម្មនិងភាពអនុគ្រោះជាច្រើន៕
![](https://dap-news.com/wp-content/uploads/2024/07/photo_2024-07-04_06-57-57-1024x682.jpg)
![](https://dap-news.com/wp-content/uploads/2024/07/photo_2024-07-04_06-58-02-1024x682.jpg)
![](https://dap-news.com/wp-content/uploads/2024/07/photo_2024-07-04_06-58-06-1024x683.jpg)
![](https://dap-news.com/wp-content/uploads/2024/07/photo_2024-07-04_06-58-09-1024x682.jpg)
![](https://dap-news.com/wp-content/uploads/2024/07/photo_2024-07-04_06-58-13-1024x683.jpg)
![](https://dap-news.com/wp-content/uploads/2024/07/photo_2024-07-04_06-58-17-1024x683.jpg)
![](https://dap-news.com/wp-content/uploads/2020/08/1-1.png)