ភ្នំពេញ៖ លោកបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម (ARDB) និងសហការី នៅព្រឹកថ្ងៃទី៦ ខែកក្កដា ឆ្នាំ២០២៤នេះ បានចូលរួមទស្សនាការប្រកួតកីឡាបាល់ទាត់ ដណ្តើមពានរង្វាន់ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ វគ្គដណ្តើមលេខ៣ និងលេខ៤ រវាងក្រុមកីឡាយុវជនឃុំសន្លុង ប្រកួតជាមួយក្រុមកីឡាយុវជនឃុំកោះចូរ៉ាម នៅទីលានបាល់ទាត់ នៃវិទ្យាល័យចំណេះទូទៅ និងបច្ចេកទេស សម្តេចអគ្គមហាសេនាបតីតេជោ ហ៊ុន សែន រ៉ូតាខ្សាច់កណ្ដាល ដើម្បីលើកទឹកចិត្តដល់ប្អូនៗកីឡាករ។
ការប្រកួតនេះ ត្រូវបានធ្វើឡើង នៅស្រុកខ្សាច់កណ្តាល ខេត្តកណ្តាល ។ ដោយឡែកចំពោះលទ្ធផលនៃការប្រកួតព្រឹកនេះ បានទៅលើក្រុមកីឡាយុវជនឃុំកោះចូរ៉ាម ៣ ទល់នឹង ១ (គ្រាប់បាល់ប៉េណាំងទី) ។ ការប្រកួតនៅព្រឹកនេះ គឺមានការចូលរួមទស្សនា យ៉ាងច្រើនកុះករ ពីសំណាក់យុវជន សិស្សានុសិស្ស និងបងប្អូនប្រជាពលរដ្ឋ ប្រកបដោយភាពសប្បាយរីករាយយ៉ាងខ្លាំង។
សូមជម្រាបថា នៅព្រឹកថ្ងៃអាទិត្យ ទី៧ ខែកក្កដា ឆ្នាំ២០២៤ ស្អែកនេះ គឺជាការប្រកួតវគ្គផ្តាច់ព្រ័ត្រ ដណ្តើមលេខ ១ និង លេខ ២ រវាងក្រុមកីឡាយុវជនឃុំវិហារសួគ៌ និងឃុំពុកឫស្សី និងបិទវគ្គប្រកួត ព្រមទាំងផ្តល់រង្វាន់ជ័យលាភី។
សូមរំលឹកថា ការរៀបចំឱ្យកម្មវិធីប្រកួតកី ឡាយុវជនជារៀងរាល់ឆ្នាំនេះ គឺជាការគិតគូរយកចិត្តទុកដាក់ដ៏ខ្ពង់ខ្ពស់ របស់លោកអគ្គបណ្ឌិតសភាចារ្យ ឧបនាយករដ្ឋមន្រ្តី ក្នុងគោលបំណង (១)លើកកម្ពស់វិស័យកីឡា ឱ្យកាន់តែមានការីកចម្រើន, (២)បង្កើតឱ្យមានកម្មវិធីសប្បាយរីករាយ និង(៣)ផ្តល់ឱកាសឱ្យយុវជនក្នុងមូលដ្ឋាន បានជួបជុំស្គាល់គ្នា បង្កើតសាមគ្គីភាព មិត្តភាព រវាងយុវជនក្នុងឃុំជាមួយគ្នា និងយុវជនមកពីឃុំផ្សេងគ្នា និងជាពិសេសបំផុសស្មារតីយុវជន ឱ្យចូលចិត្តលេងកីឡា ពីព្រោះ ការលេងកីឡានាំមកនូវសុខភាពល្អ ជួយដល់យុវជនចៀសឆ្ងាយពីគ្រឿងញៀន ល្បែងស៊ីសង និងអំពើអបាយមុខគ្រប់ប្រភេទ, និង(៤)ផ្តល់ឱកាសដល់យុវជនធ្វើការអភិវឌ្ឍខ្លួន និងពង្រឹងសមត្ថភាពទាំងកាយសម្បទា រួមទាំងចំណេះដឹងជំនាញ ដើម្បីក្លាយជាទំពាំងដ៏មានសក្តានុពល សម្រាប់បន្តវេន ចូលរួមចំណែកក្នុងការអភិវឌ្ឍជាតិ ឱ្យកាន់តែរីកចម្រើន៕
