ភ្នំពេញ៖ នាយឧត្តមសេនីយ៍ ឈុំ សុជាតិ រដ្ឋលេខាធិការ និងជាអ្នកនាំពាក្យ ក្រសួងការពារជាតិ បានឲ្យដឹងថា ដោយសារកត្តាអាកាសធាតុ នៅតំបន់ជួរភ្នំក្រវាញ ហាក់មានភាពល្អប្រសើរឡើងវិញ និងអំណោយផល តាំងពីថ្ងៃ២១ដល់២២ កក្កដា ជាហេតុធ្វើឲ្យលោកមានក្តីសង្ឃឹមថា នឹងទទួលបានដំណឹង អំពីឧទ្ធម្ភាគចក្របាត់ខ្លួន ក្នុងពេលដ៏ខ្លី ខាងមុខ ។
![](https://dap-news.com/wp-content/uploads/2024/07/photo_2024-07-22_13-32-14-1024x682.jpg)
តាមរយៈបណ្ដាញសង្គមហ្វេសប៊ុក នាថ្ងៃ២២ កក្កដានេះ នាយឧត្តមសេនីយ៍ ឈុំ សុជាតិ បានលើកឡើងថា អាកាសធាតុនៅតំបន់ជួរភ្នំក្រវាញ ហាក់មានភាព ល្អប្រសើរឡើងវិញ ដែលកំពុងអំណោយផល ដល់ការរុករកឧទ្ធម្ភាគចក្រ ដែលបានបាត់ដំណឹង កាលពីថ្ងៃទី១២ កក្កដា ។
![](https://dap-news.com/wp-content/uploads/2024/07/photo_2024-07-22_13-32-19-1024x768.jpg)
លោកថា «នៅថ្ងៃនេះ កងកម្លាំងចម្រុះ បានបន្តធ្វើសកម្មភាពរុករកដោយស្វាហាប់ ទាំងថ្មើរជើង និងពីលើដែនអាកាស ក្នុងនោះមានកម្លាំងមួយចំនួន បានសម្រូតខ្សែចុះពីឧទ្ធម្ភាគចក្រ នៅតាមចំណុចដែលមានការសង្ស័យ ដែលយើងសង្ឃឹមថា នឹងទទួលបានដំណឹងអំពីឧទ្ធម្ភាគចក្រក្នុងពេលដ៏ខ្លី ខាងមុខនេះ» ។
![](https://dap-news.com/wp-content/uploads/2024/07/photo_2024-07-22_13-32-22-1024x768.jpg)
ជាមួយគ្នានេះ នាយឧត្តមសេនីយ៍ ឈុំ សុជាតិ បានថ្លែងអំណរគុណដល់កងកម្លាំងទាំងអស់ ដែលបានខិតខំយ៉ាងសកម្មមិនខ្លាចនឿយហត់ ក្នុងការស្វែងរក ឧទ្ធម្ភាគចក្រ និងយោធិន២នាក់ ដែលបានបាត់ដំណឹង ក្នុងរយៈពេល១០ថ្ងៃមកនេះ ទោះបីជាមានបញ្ហាអាកាសធាតុ និងភូមិសាស្ត្រ លំបាកក៏ដោយ ។ លោកក៏ជូនពរកងកម្លាំងទាំងអស់ គ្នាមានសុវត្ថិភាព និងទទួលបានជោគជ័យ៕
![](https://dap-news.com/wp-content/uploads/2024/07/photo_2024-07-22_13-32-28-1024x768.jpg)
![](https://dap-news.com/wp-content/uploads/2020/08/1-1.png)