ភ្នំពេញ ៖ ក្នុងវគ្គបណ្តុះបណ្តាល ស្តីពីការពង្រឹង និងអភិវឌ្ឍសមត្ថភាពដឹកនាំក្នុងអង្គភាព ប្រកបដោយសុខដុមនីយកម្ម នាព្រឹកថ្ងៃទី២៤ កក្កដា លោក កើត ឆែ អភិបាលរងរាជធានីភ្នំពេញ បានគូសបញ្ជាក់ថា ធ្វើជាអ្នកថ្នាក់ដឹកនាំ ជាមេគេ ត្រូវមានសមត្ថភាពក្នុងការគ្រប់គ្រង ដឹកនាំអង្គភាព និងមន្ត្រីជការក្រោមឱវាទ ជាមួយការសម្របសម្រួល ដោះស្រាយគ្រប់បញ្ហា ដោយភ្ជាប់គុណសម្បត្តិ៤យ៉ាង គឺឆន្ទៈម្ចាស់ការ ភក្តីភាព មនសិការវិជ្ជាជីវៈ និងវប្បធម៌សាធារណៈ។
![](https://dap-news.com/wp-content/uploads/2024/07/photo_2024-07-24_13-44-42-1024x700.jpg)
ក្នុងឱកាសនោះ លោក កើត ឆែ បានលើកឡើងថា វគ្គបណ្តុះបណ្តាលភាពជាអ្នកដឹកនាំនេះ បានធ្វើឡើងចំនួន២ដងរួចមកហើយ លើកទី១ នៅខែកក្កដា ឆ្នាំ២០២២ និងលើកទី២នៅខែសីហា ឆ្នាំ២០២៣។ វគ្គបណ្តុះបណ្តាលនេះ បានផ្តល់ជាទស្សនទាន ដ៏មានអត្ថន័យដែលជួយបណ្តុះស្មារតីទទួលខុសត្រូវ ការរៀបចំផែនការអនុវត្តការងារ និងបានជំរុញលើកទឹកចិត្ត ព្រមទាំងបង្ហាញពីគន្លឹះ ក្នុងការរៀបចំខ្លួនរបស់បុគ្គលិក-មន្ត្រីរាជការម្នាក់ៗឲ្យបំពេញការងារ ទទួលបានលទ្ធផលល្អប្រសើរ ប្រកបដោយគុណតម្លៃ ក្នុងអាជីពការងាររបស់ខ្លួន។
![](https://dap-news.com/wp-content/uploads/2024/07/photo_2024-07-24_13-44-47-1024x682.jpg)
![](https://dap-news.com/wp-content/uploads/2024/07/photo_2024-07-24_13-44-54-1024x682.jpg)
លោក កើត ឆែ បន្តទៀតថា នៅក្នុងស្ថាប័នរដ្ឋក្តី ឬស្ថាប័នឯកជនក្តី តែងតែមាននូវយន្តការគ្រប់គ្រងបុគ្គលិក ដើម្បីធានាបាននូវប្រសិទ្ធភាព គុណភាព និងប្រសិទ្ធផលការងារ។ នៅក្នុងវិស័យរដ្ឋបាលសាធារណៈ ការគ្រប់គ្រងបុគ្គលិក-មន្ត្រីរាជការ គឺត្រូវអនុលោមតាមច្បាប់ និងបទដ្ឋានគតិយុត្តនានាជាធរមាន ក្នុងនោះ ត្រូវអនុវត្តគោលការណ៍ «ឋានានុក្រម» ដែលមានន័យថា បុគ្គលិក-មន្ត្រីរាជការ ត្រូវស្ថិតនៅក្រោមការគ្រប់គ្រង និងទទួលនូវបទបញ្ជា ឬការណែនាំផ្សេងៗ ពីថ្នាក់ដឹកនាំរបស់ខ្លួន ហើយថ្នាក់ដឹកនាំ ត្រូវបែងចែកនូវភារកិច្ច និងការទទួលខុសត្រូវ ជូនបុគ្គលិក-មន្ត្រីរាជការ ក្រោមឱវាទ ទៅតាមសមត្ថភាព ចំណេះដឹង បទពិសោធន៍ និងឧបនិស្ស័យ នៃបុគ្គលិក-មន្ត្រីរាជការនីមួយៗ។
![](https://dap-news.com/wp-content/uploads/2024/07/photo_2024-07-24_13-47-30-1024x682.jpg)
លោកអភិបាលរងក៏បានគូសបញ្ជាក់ថា “ក្នុងនាមថ្នាក់ដឹកនាំ ត្រូវមានសមត្ថភាពក្នុងការគ្រប់គ្រង ដឹកនាំអង្គភាព និងមន្ត្រីជការក្រោមឱវាទ និងត្រូវសម្របសម្រួល ដោះស្រាយនូវគ្រប់បញ្ហាទាំងឡាយដែលកើតមានឡើងប្រចាំថ្ងៃ។ ដើម្បីមានគុណវុឌ្ឍទាំងអស់នេះ ថ្នាក់ដឹកនាំ មិនមែនគ្រាន់តែត្រូវអនុវត្តតាមច្បាប់ ឬបទបញ្ជាផ្ទៃក្នុងរបស់អង្គភាពនោះទេ ប៉ុន្តែថែមទាំងត្រូវស្វែងយល់អំពីចិត្តសាស្ត្រ និងវិធីសាស្ត្រក្នុងការដឹកនាំ និងបង្កើនផលិតភាពការងារដែលសុទ្ធសឹងជា «ជំនាញទន់» ដើម្បីធានាបានថា បុគ្គលិក-មន្ត្រីរាជការទាំងអស់បានយកអស់កម្លាំងកាយចិត្ត ក្នុងការបំពេញការងារ ជាប្រយោជន៍ដល់អង្គភាព និងលុះដោយគុណសម្បត្តិចំនួន៤យ៉ាង នោះគឺ (១) ឆន្ទៈម្ចាស់ការ (២) ភក្តីភាព (៣) មនសិការវិជ្ជាជីវៈ និង(៤) វប្បធម៌សាធារណៈ។ លើសពីនេះទៀត ថ្នាក់ដឹកនាំអង្គភាព ក៏ត្រូវជាអ្នកដែលរៀបចំផែនការការងារបានល្អិតល្អន់ និងចេះបែងចែកការងារជូនមន្ត្រីរាជការក្រោមឱវាទ ក៏ដូចជាមានយន្តការតាមដានការងារការលើកទឹកចិត្ត កែលម្អ សម្របសម្រួលរកវិធីទប់ស្កាត់ និងដោះស្រាយនូវរាល់បញ្ហានៅទីកន្លែងបំពេញការងារ ដើម្បីធានាបាននូវភាពសុខដុមនីយកម្ម ក្នុងទីកន្លែងបំពេញការងារ”។
![](https://dap-news.com/wp-content/uploads/2024/07/photo_2024-07-24_13-54-12-1024x682.jpg)
លោកកើត ឆែ បញ្ជាក់ថា “ដើម្បីក្លាយជាមេដឹកនាំ ឬ«មេគេ» យើងត្រូវមានគុណសម្បត្តិ យ៉ាងហោចណាស់៣ គឺ១- សមត្ថភាព (ទទួលបានការ បណ្តុះបណ្តាល និងមានចំណេះដឹង ក្នុងការស្វែងយល់អំពីការងារ និងមានភាពឈ្លាសវៃ, គំនិតផ្តួចផ្តើម និង នវានុវត្ត ដើម្បីសម្រេចការងារមួយ ប្រកបដោយគុណភាព និងប្រសិទ្ធផលខ្ពស់)។ ២- បទពិសោធន៍ការងារ (ធ្លាប់ឆ្លងកាត់ នូវបទពិសោធន៍ការងារទាំងល្អ ទាំងមិនល្អដែលបទ ពិសោធន៍ទាំងនេះ គឺជាទុន ដើម្បីបំពេញការងារទៅថ្ងៃមុខ) និង៣- សុខភាពល្អ (ត្រូវថែរក្សាសុខភាព, មានរបបហាត់ប្រាណទៀងទាត់ ដើម្បីឲ្យមានភាពរហ័សរហួន ការបំពេញការងារបានល្អ)” ៕
![](https://dap-news.com/wp-content/uploads/2024/07/photo_2024-07-24_13-54-08-1024x682.jpg)
![](https://dap-news.com/wp-content/uploads/2024/07/photo_2024-07-24_13-54-16-1024x682.jpg)
![](https://dap-news.com/wp-content/uploads/2024/07/photo_2024-07-24_13-54-19-1024x682.jpg)
![](https://dap-news.com/wp-content/uploads/2020/08/1-1.png)