ភ្នំពេញ៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម និងសហការី នៅថ្ងៃទី២៨ ខែកក្កដា ឆ្នាំ២០២៤ បានចុះជួបសំណេះសំណាល និងសិក្សាស្វែងយល់អំពីសហគមន៍បាភ្នំមានជ័យ ស្ថិតនៅស្រុកបាភ្នំ ខេត្តព្រៃវៃង។
សហគមន៍បាភ្នំមានជ័យ គឺជាសហគមន៍ផលិតស្រូវពូជធំមួយនៅក្នុងស្រុកបាភ្នំដែលមានសមត្ថភាពផលិតស្រូវពូជ (សុទ្ធល្អ) បានប្រមាណ ៥០០ តោន ក្នុង១ឆ្នាំ និងមានផ្ទៃស្រែចំនួន ៨៥ ហិកតា និងមានសមាជិកចំនួន ២៣៣ គ្រួសារ។
ក្នុងឆ្នាំ២០២៤នេះ សហគមន៍ មានគ្រោងពង្រីកផ្ទៃដីផលិតស្រូវពូជឲ្យបាន១៤៥ ហិកតាដែលអាចផលិតពូជបាន១ដងទៅ៣ដងក្នុង១ឆ្នាំ និងមានផែនការផលិតពូជស្រូវសុទ្ធឲ្យបាន៧៥០តោន សម្រាប់ផ្គត់ផ្គង់ដល់កសិករនៅក្នុងខេត្តព្រៃវែង និងខេត្តផ្សេងៗទៀត ដូចជាកំពង់ធំ ស្វាយរៀង សៀមរាប កំពង់ឆ្នាំង ពោធិ៍សាត់ បាត់ដំបង។ ពូជស្រូវដែលសហគមន៍ផលិតត្រូវបានកសិករទទួលស្គាល់ថាល្អជាងពូជ នាំចូលដែលមិនមានប្រភពច្បាស់លាស់។ ទន្ទឹមនឹងនេះ សហគមន៍ក៏ជួបបញ្ហាប្រឈមមួយចំនួន ដូចជា រុយសបំផ្លាញ ការប្រែប្រួលអាកាសធាតុ និងបញ្ហាកង្វះទុន។
តាមសំណូមពររបស់ សហគមន៍ពាក់ព័ន្ធនឹងបញ្ហាកង្វះទុន លោកបណ្ឌិតបានណែនាំឲ្យរៀបចំ ឯកសារឲ្យបានច្បាស់លាស់ ដើម្បីធនាគារ ARDB ពិនិត្យលទ្ធភាពក្នុងការផ្តល់ឥណទានបន្ថែម ព្រមទាំងស្នើដល់សហគមន៍និងកសិករឲ្យប្រើប្រាស់ APP របស់ ARDB ក្នុងការទូទាត់ និងផ្ទេរប្រាក់ ដែលងាយស្រួសជាងការប្រើប្រាស់សាច់ប្រាក់សុទ្ធ។
បន្ទាប់មកនៅរសៀលថ្ងៃដដែល លោកបណ្ឌិត និងសហការីក៏បានបន្តចុះពិនិត្យស្តុកស្រូវអង្កររបស់រោងម៉ាស៊ីនកិនស្រូវឈុនធំ និងរោងម៉ាស៊ីនកិនស្រូវឈិតប៊ុនថន នៅស្រុកស្វាយអន្ទរ ខេត្តព្រៃវែង ដែលរោងម៉ាស៊ីនកិនស្រូវទាំង២នេះ ទទួលបានហិរញ្ញប្បទានពិសេសរបស់រាជរដ្ឋាភិបាល ក្រោមគម្រោងរក្សាស្ថិរភាពថ្លៃ រក្សាសន្តិសុខស្បៀង និងប្រព័ន្ធពូជសុទ្ធតាមរយៈធនាគារ ARDB ។
ក្នុងឱកាសនោះ លោកបណ្ឌិតបានស្នើដល់ ម្ចាស់រោងម៉ាស៊ីនទាំង២ ធ្វើការប្រមូលទិញស្រូវពីកសិករឲ្យអស់លទ្ធភាពតាមតម្លៃសមស្រប នៅរដូវប្រមូលផលខាងមុខ ដោយចៀសវាងការបង្អាប់តម្លៃ ៕
