ភ្នំពេញ៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម និងសហការី នៅថ្ងៃទី២៨ ខែកក្កដា ឆ្នាំ២០២៤ បានបន្តបេសកកម្មចុះសិក្សាស្វែងយល់ អំពីសហគមន៍បន្លែសុវត្ថិភាពសរីរាង្គ ទួលត្រពាំងស្រស់បំព្រង ស្ថិតនៅឃុំគោគគង់លិច ស្រុកកញ្ចៀច ខេត្តព្រៃវែង ដែលទទួលបានការឧបត្ថម្ភគាំទ្រពីក្រសួងកសិកម្ម រុក្ខាប្រមាញ់និងនេសាទ និងគម្រោងជំរុញទីផ្សារសម្រាប់កសិកម្មខ្នាតតូច(AIMS)។
សហគមន៍នេះ មានសមាជិក៨៣គ្រួសារ ប្រកបមុខរបរដាំដុះបន្លែសុវត្ថិភាពសរីរាង្គ នៅទីវាល និងក្នុងផ្ទះសំណាញ់ ដោយក្នុង១ថ្ងៃអាចផលិតបន្លែសុវត្ថិភាពបានពី ១ តោនកន្លះ ទៅ១០តោនទៅតាមរដូវ ជាប្រភេទបន្លែស្លឹក និងបន្លែផ្លែ (រដូវវស្សាផលិតបានតិចដោយសារភ្លៀង)។
ទន្ទឹមនឹងនេះ សហគមន៍ក៏ជួបបញ្ហាប្រឈមផងដែរដូចជា បញ្ហាប្រែប្រួលអាកាសធាតុ បញ្ហាទីផ្សារមិនមានស្ថិរភាព ដោយអាស្រ័យលើឈ្មួញកណ្តាលជាអ្នកកំណត់តម្លៃ មួយវិញទៀតក្រុមហ៊ុនដែលបានចុះកិច្ចសន្យាទិញមានការលំបាកក្នុងការទូទាត់ប្រាក់។
ទន្ទឹមនេះ លោកបណ្ឌិតបានចុះជួបកសិករ កំពុងធ្វើដីដាំបន្លែស្ពែចង្កឹះដោយផ្ទាល់ ហើយតាមការសាកសួរ ការដាំស្ពៃនៅខែនេះ គឺខូចជាច្រើនដង ហើយលោកបណ្ឌិតបានណែនាំ កសិករដាំដំណាំឆ្លាស់វិញ ដូចជាបន្លែផ្លែ ឬផ្កាខាត់ណាវិញ ដែលអាចទទួលបានផលច្រើន។ ក្នុងឱកាសនោះ លោកបណ្ឌិតបានឧបត្ថម្ភថវិកាមួយចំនួន ដល់សហគមន៍ផងដែរ។
បន្ទាប់មក លោកបណ្ឌិត និងក្រុមការងារបានបន្តចុះពិនិត្យស្តុកស្រូវអង្ករ និងសកម្មភាពប្រមូលទិញស្រូវរបស់រោងម៉ាស៊ីនកិនស្រូវវិញជាង នៅស្រុកត្បូងឃ្មុំ ខេត្តត្បូងឃ្មុំ ដែលរោងម៉ាស៊ីននេះទទួលបាបហិរញ្ញប្បទាន ពិសេសរបស់រាជរដ្ឋាភិបាល តាមរយៈធនាគារអភិវឌ្ឍន៍ជនបទនិងកសិកម្ម។ រោងម៉ាស៊ីនប្រមូលទិញស្រូវ ពីកសិករបានប្រមាណ ៨០តោន ក្នុងតម្លៃចន្លោះពី១០១០ ទៅ១០៧០ រៀលក្នុង១គីឡូក្រាម ជាប្រភេទស្រូវ OM 5451 ៕
