ក្រុមហ៊ុនចិន ចាប់អារម្មណ៍វិនិយោគ លើវិស័យឧស្សាហកម្មយានយន្ត និងគ្រឿងបន្លាស់នៅកម្ពុជា

ភ្នំពេញ ៖ ក្រុមហ៊ុនយក្សក្នុងវិស័យឧស្សាហកម្មផលិតរថយន្ត Chery Holding Group Co., Ltd. រ​បស់ប្រទេសចិន បានបង្ហាញចំណាប់អារម្មណ៍ ក្នុងការវិនិយោគលើវិស័យមួយចំនួន នៅកម្ពុជាពិសេសវិស័យឧស្សាហកម្មយានយន្ត និងគ្រឿងបន្លាស់។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃទី៩ សីហានេះ បានអនុញ្ញាតឲ្យលោក Xu Hui អគ្គនាយករងគ្រប់គ្រងទូទៅ ក្រុមហ៊ុន Chery Holding Group Co., Ltd. ចូលជួបសម្ដែងការគួរសម និងពិភាក្សាការងារនៅវិមានសន្តិភាព។ ក្នុងជំនួបក្រុមហ៊ុនបានចាប់អារម្មណ៍ លើការវិនិយោគលើវិស័យមួយចំនួននៅកម្ពុជា ពិសេសវិស័យឧស្សាហកម្មយានយន្ត និងគ្រឿងបន្លាស់ដែលនឹងចូលរួម ចំណែកលើកកម្ពស់សេដ្ឋកិច្ច បង្កើតឱកាសការងារ និងផ្តល់ជំនាញ​ដល់យុវជនកម្ពុជា ជាច្រើនកន្លែង។

សូមរំលឹកថា ក្រុមហ៊ុន Chery Holding Group ជាក្រុមហ៊ុនយក្សក្នុងវិស័យឧស្សាហកម្មផលិតរថយន្ត ដោយប្រើប្រាស់បច្ចេកវិទ្យាខ្ពស់របស់ប្រទេសចិន ដែលត្រូវបានបង្កើតឡើងក្នុងឆ្នាំ១៩៩៧៕