ភ្នំពេញ៖ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានលើកឡើងថា យុទ្ធនាការ «កម្ពុជាស្អាត ខ្មែរធ្វើបាន» ជាកម្មវិធីសំអាតភពដែនដី ហើយការសម្អាតភពផែនដី គឺសំអាតផ្ទះរបស់ខ្លួនឯង។
ការលើកឡើងរបស់ លោករដ្ឋមន្ដ្រី អ៊ាង សុផល្លែត នាឱកាសអញ្ជើញចូលរួមរើសសំរាម សម្អាតអនាម័យបរិស្ថាន ក្នុងទិវាសម្អាតពិភពលោកនៅកម្ពុជា ក្រោមប្រធានបទ «កម្ពុជាស្អាត ខ្មែរធ្វើបាន» នៅតាមដងទន្លេសាប រាជធានីភ្នំពេញ រួមជាមួយ លោក ឃួង ស្រេង អភិបាលរាជធានីភ្នំពេញ និងឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ព្រមទាំងតំណាងទីភ្នាក់ងារសហប្រតិបត្តិការអន្តរជាតិកូរ៉ (KOICA) មន្រ្តីរាជការ បុគ្គលិកនៃវិស័យជន ដៃគូអភិវឌ្ឃន៍ និងប្រជាពលរដ្ឋ ជាច្រើននាក់ នាថ្ងៃទី២១ ខែសីហា ឆ្នាំ២០២៤នេះ។
លោករដ្ឋមន្ដ្រី បានថ្លែងថា «កម្ពុជាស្អាត ខ្មែរធ្វើបាន ជាកម្មវិធីសម្អាតពិភពដែនដី ហើយការសម្អាតភពផែនដី ដូចយើងសំអាតផ្ទះយើងអញ្ចឹងដែរ។ បរិស្ថានជាជីវិតរបស់យើង បរិស្ថានមិនល្អ ខ្យល់អាកាសមិនល្អ វានឹងធ្វើឱ្យជីវិតយើងមិនល្អទៅតាមហ្នឹងដែរ» ។
លោករដ្ឋមន្ដ្រី បានបញ្ជាក់ផងដែរថា សុខភាពបរិស្ថានមាន៣ គឺទី១៖ បរិស្ថានលើមេឃ, ទី២៖ បរិស្ថានលើដី និងទី៣៖ បរិស្ថានក្នុងទឹក។ ក្រសួងបរិស្ថាន បាននឹងកំពុងទប់ស្កាត់ជាតិពុលនៅក្នុងបរិស្ថានទាំង៣នេះ។ ចំពោះភាពស្អាតទី១ បរិស្ថានលើមេឃ គឺខ្យល់នៅកម្ពុជា មិនមានជាតិពុលទេ តាមរយៈការត្រួតពិនិត្យ ជាប្រចាំថ្ងៃរបស់ក្រសួងបរិស្ថាន។ ទី២៖ ភាពស្អាត បរិស្ថានលើដី យើងបានផ្សព្វផ្សាយពីផលប៉ះពាល់ដល់បរិស្ថាន ជាមួយនឹងការប្តេជ្ញាចិត្តធ្វើឱ្យបរិស្ថានល្អប្រសើរឡើង។ ដូចជាការលុបបំបាត់ការប្រើប្រាស់ថង់ប្លាស្ទិក យើងមានអ្នកបេ្តជ្ញាចិត្ត ដោយមានអ្នកចូលរួមលុបបំបាត់ ប្រមាណជាង ៩លាន ៥សែននាក់។ លោកបណ្ឌិត អ៊ាង សុផល្លែត បានសម្តែងនូវការជឿជាក់ថា នៅឆ្នាំ២០២៥ នឹងគ្មានថង់ប្លាស្ទិក ហោះតាមផ្លូវទៀតទេ។ ទី៣៖ បរិស្ថានក្នុងទឹក ក្រសួងបរិស្ថាន បាននិងកំពុងយកចិត្តទុកដាក់ ដោយដាក់ឧបករណ៍តាមដានពីគុណភាពទឹក ធ្វើយ៉ាងណាឱ្យប្រភពទឹកមានបរិស្ថានល្អ។ ចំពោះការ ការជំរុញ ជុំវិញបញ្ហានេះដែរ ក្រសួងបរិស្ថានជំរុញឱ្យរោងចក្រសហគ្រាសបំពាក់ឧបករណ៍ស្វ័យត្រួតពិនិត្យគុណភាពឹក ដើម្បីធានាថាទឹកបញ្ចេញមកក្រៅរបស់រោងចក្រសហគ្រាស ស្អាត មិនបំពុលប្រភពទឹកធម្មជាតិ និងសុខភាពប្រជាពលរដ្ឋ។
លោក ឃួង ស្រេង បានលើកឡើងថា បរិមាណសំរាម សំណល់រឹង នៅរាជធានីភ្នំពេញ បានកើតទឿងជាលំដាប់ ដោយប្រៀបធៀបឆ្នាំ២០០៩ និងបច្ចុប្បន្ននេះ បានកើនឡើងរហូត ៣ដង ពោលគឺនៅក្នុងឆ្នាំ២០០៩ បរិមាណសំរាម មានប្រមាណជាង ១០០០តោន ក្នុងមួយថ្ងែ តែនៅក្នុងឆ្នាំ២០២៤នេះ បរិមាណសំរាម មានប្រមាណ ៣៥០០តោន ក្នុងមួយថ្ងៃ។ នេះដោយសារកំណើនប្រជាពលរដ្ឋចូលមករាជធានីភ្នំពេញ ជាមួយនិងកំណើនសេដ្ឋកិច្ចផងដែរ៕
