ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិនៃកម្ពុជា បានសម្តែងការសោកស្ដាយជាខ្លាំង ចំពោះការដាក់ទណ្ឌកម្មនាពេលថ្មីៗនេះ ដោយក្រសួងរតនាគារសហរដ្ឋអាមេរិក ទៅលើពាណិជ្ជករដ៏លេចធ្លោ លោក លី យ៉ុងផាត់ និងក្រុមហ៊ុន L.Y.P. គ្រុប ខូអិលធីឌី រួមជាមួយនឹងអាជីវកម្មពាក់ព័ន្ធចំនួនបួន។ ទណ្ឌកម្មដែលបានប្រកាសនៅថ្ងៃទី១២ ខែកញ្ញា ឆ្នាំ ២០២៤ ផ្តើមចេញពីការចោទប្រកាន់លើការងារបង្ខំក្នុងសកម្មភាពឆបោកតាមអនឡាញ។
នៅក្នុងសេចក្តីថ្លែងការណ៍ផ្លូវការនោះ ក្រសួងការបរទេសកម្ពុជា បានថ្កោលទោស សកម្មភាពរបស់សហរដ្ឋអាមេរិក ថាជាសកម្មភាពនយោបាយ និងធ្វើឱ្យប៉ះពាល់ដល់ស្មារតី នៃកិច្ចសហប្រតិបត្តិការទ្វេភាគី និងការជឿទុកចិត្តគ្នា ទៅវិញទៅមក។ ក្តីបារម្ភនេះមានការភ្ញាក់ផ្អើល ជាពិសេសក្នុងអំឡុងពេលទស្សនកិច្ច របស់រដ្ឋមន្ត្រីក្រសួងការពារជាតិ សហរដ្ឋអាមេរិក លោក ឡយ ជេ អូស្ទីន (Lloyd J. Austin III) មកកាន់ប្រទេសកម្ពុជាក្នុងខែមិថុនា ដែលការពង្រឹងភាពជាដៃគូរវាងប្រទេសទាំងពីរគឺជាប្រធានបទសំខាន់នៃការពិភាក្សា។
ក្រសួងការបរទេសកម្ពុជាបានលើកឡើងពីការរួមចំណែកយ៉ាងច្រើនរបស់លោក លី យ៉ុងផាត់ ក្នុងការអភិវឌ្ឍន៍សេដ្ឋកិច្ចសង្គមរបស់ប្រទេស ដោយសង្កត់ធ្ងន់លើតួនាទីសំខាន់របស់លោកក្នុងការអភិវឌ្ឍន៍ហេដ្ឋារចនាសម្ព័ន្ធ ការបង្កើតការងារ និងការកាត់បន្ថយភាពក្រីក្រតាមរយៈ L.Y.P. គ្រុប។ សេចក្តីថ្លែងការណ៍បានអះអាងថា «តួនាទីរបស់លោក លីយ៉ុងផាត់ ក្នុងការអភិវឌ្ឍសេដ្ឋកិច្ច-សង្គមកម្ពុជា អស់រយៈពេលជាច្រើនទសវត្សរ៍កន្លងមក ត្រូវបានទទួលស្គាល់យ៉ាងទំលំទូលាយ»។
លើសពីនេះ ក្រសួងបានយកបញ្ហារបស់រដ្ឋាភិបាលសហរដ្ឋអាមេរិកអំពីការប្រើប្រាស់របាយការណ៍ការជួញដូរមនុស្សយកមកធ្វើជាមូលដ្ឋាននៃសកម្មភាពដាក់ទណ្ឌកម្មនោះ គឺជារឿងគួរឱ្យសោកស្តាយនិងនាំឱ្យយល់ខុស។ រដ្ឋាភិបាលកម្ពុជាអះអាងថា របាយការណ៍នេះមិនបានបង្ហាញនូវរូមភាពដែលមានតុល្យភាព និងសុក្រឹតអំពីការប្តេជ្ញាចិត្តរបស់កម្ពុជាលើការគោរពសិទ្ធិមនុស្ស ការអនុវត្តច្បាប់ និងការប្រយុទ្ធប្រឆាំងនឹងការជួញដូរមនុស្ស និងពលកម្មដោយបង្ខំ។
សេចក្តីថ្លែងការណ៍បានកត់សម្គាល់ថា «កម្ពុជាសម្រេចបាននូវវឌ្ឍនភាពសំខាន់ៗជាច្រើន ក្នុងការដោះស្រាយបញ្ហាទាំងនេះ ដោយកិច្ចសហការជាមួយដៃគូអន្តរជាតិ រួមទាំងសហរដ្ឋអាមេរិកផងដែរ»។
ដោយគូសបញ្ជាក់ អំពីជំហរសកម្មរបស់ប្រទេសប្រឆាំងនឹង សកម្មភាពឧក្រិដ្ឋកម្មឆ្លងព្រំដែនដ៏ស្មុគស្មាញនោះ ក្រសួងការបរទេស និងសហប្រតិបត្តិការអន្តរជាតិ បានចាត់ទុកការអះអាង ដែលថាកម្ពុជាបានបង្ហាញពីភាពព្រងើយកណ្តើយ ឬការធ្វេសប្រហែសក្នុងការអនុវត្តច្បាប់ ជាការយល់ខុសយ៉ាងធ្ងន់ធ្ងរ ដល់កិច្ចខិតខំប្រឹងប្រែង និងសមិទ្ធផលនានារបស់កម្ពុជាក្នុងការដោះស្រាយបញ្ហាប្រឈម ឧក្រិដ្ឋកម្មឆ្លងដែនដ៏ស្មុគស្មាញនេះ។
ទោះបីជាមានភាពតានតឹង ជុំវិញការដាក់ទណ្ឌកម្មក៏ដោយ កម្ពុជាបានរំលឹកឡើងវិញ នូវការបើកចំហរបស់ខ្លួន ចំពោះកិច្ចសហប្រតិបត្តិការអន្តរជាតិ រួមទាំងជាមួយសហរដ្ឋអាមេរិកផងដែរ ដើម្បីដោះស្រាយបញ្ហាប្រឈមជាសកល។ យ៉ាងណាក៏ដោយក្រសួងបានសង្កត់ធ្ងន់ថា កិច្ចខិតខំប្រឹងប្រែងសហប្រតិបត្តិការទាំងនេះត្រូវតែបង្កើតឡើងនៅលើការសន្ទនា ផលប្រយោជន៍ទៅវិញទៅមក ការគោរពអធិបតេយ្យភាព និងស្មារតីនៃភាពជាដៃគូពិតប្រាកដ។
ក្រសួងការបរទេស និងសហប្រតិបត្តិការអន្តរជាតិបានព្រមានថា ទណ្ឌកម្មឯកតោភាគី ធ្វើឱ្យប៉ះពាល់ដល់ច្បាប់អន្តរជាតិ និងបទដ្ឋានជាមូលដ្ឋានគ្រប់គ្រងទំនាក់ទំនងរវាងរដ្ឋនិងរដ្ឋ ជាពិសេសគោលការណ៍សមភាពអធិបតេយ្យ និងមិនជ្រៀតជ្រែកគ្នាទៅវិញទៅមក។
សេចក្តីថ្លែងការណ៍នេះគូសបញ្ជាក់ពីការប៉ះទង្គិចគ្នាឥតឈប់ឈររវាងកម្ពុជា និងសហរដ្ឋអាមេរិកទាក់ទងនឹងសិទ្ធិមនុស្ស និងអភិបាលកិច្ច ដែលបំភ្លឺពីសក្ដានុពលដ៏ស្មុគស្មាញនៃទំនាក់ទំនងទ្វេភាគីរបស់ពួកគេ៕
