ភ្នំពេញ ៖ សង្គមស៊ីវិលចាត់ទុក ដំណើរទស្សនកិច្ច របស់ប្រធានព្រឹទ្ធសភាកម្ពុជា ទៅប្រទេសចិន ជាឱកាសមាស កំណត់ទិសដៅថ្មី ក្រោយពីទទួលបាននូវសមិទ្ធផល ពេញ១ឆ្នាំ២០២៤ ជាឆ្នាំផ្លាស់ប្តូរ ប្រជាជននិងប្រជាជនកម្ពុជា-ចិន ។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី២ ខែធ្នូ បានដឹកនាំគណៈប្រតិភូជាន់ខ្ពស់កម្ពុជា អញ្ជើញបំពេញទស្សនកិច្ចមិត្តភាពផ្លូវការ នៅសាធារណរដ្ឋប្រជាមានិតចិន ចាប់ពីថ្ងៃ ទី២ ដល់ថ្ងៃទី៤ ខែធ្នូ ឆ្នាំ២០២៤ តបតាមការអញ្ជើញ របស់គណបក្សកុម្មុយនីស្តចិន។
លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជាចិន បានប្រាប់ នៅថ្ងៃទី២ ខែធ្នូ ថា «ក្នុងនាមជាអ្នកសិក្សាស្រាវជ្រាវមួយរូប ខ្ញុំបាទយល់ថា ក្រោយពីទទួលបាន នូវសមិទ្ធផលពេញ១ឆ្នាំ២០២៤ នៃឆ្នាំផ្លាស់ប្តូរប្រជាជន និងប្រជាជន កម្ពុជា-ចិន ដំណើរទស្សនកិច្ចនេះ ជាឱកាសមាសដែលថ្នាក់ដឹកនាំ នៃគណបក្ស កាន់អំណាច របស់ប្រទេសយើងទាំងពីរ បានជួបពិភាក្សាគ្នា ដើម្បីកំណត់ទិសដៅសម្រាប់ឆ្នាំថ្មី២០២៥ និងផែនការរយៈពេលវែង នៃកិច្ចសហប្រតិបត្តិការដ៏រឹងមាំ នៃប្រទេសយើងទាំងពីរ ស្របពេលដែលប្រទេសយើងទាំងពីរ បាននិងកំពុងបង្កើនការកសាងសហគមន៍ ជោគវាសនារួមក្នុងយុគសម័យថ្មី ដែលមានការអភិវឌ្ឍប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់»។
នៅក្នុងឱកាសទស្សនកិច្ចនេះ សម្តេចតេជោ ហ៊ុន សែន នឹងមានជំនួបទ្វេភាគី ជាមួយ ឯកឧត្តម ប្រធានរដ្ឋចិន, ឯកឧត្តម ប្រធានគណៈកម្មាធិការជាតិ នៃសភាប្រឹក្សានយោបាយ នៃប្រជាជនចិន និងឯកឧត្តម ប្រធានគណៈកម្មាធិការ អចិន្ត្រៃយ៍នៃសភាតំណាងប្រជាជនចិន ។
សមាសភាពគណៈប្រតិភូអមដំណើរ សម្តេចតេជោ ហ៊ុន សែន ក្នុងទស្សនកិច្ចរួមមាន សម្តេចពិជ័យសេនា ទៀ បាញ់ ឧត្តមក្រុមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្ស ប្រជាជនកម្ពុជា, ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំង មន្ត្រីថ្នាក់ដឹកនាំសំខាន់ៗ នៃស្ថាប័ននីតិប្បញ្ញត្តិ និងរាជរដ្ឋាភិបាល មួយចំនួនទៀត ៕
