កំពង់ស្ពឺ ៖ មនុស្សម្នាក់បានស្លាប់ភ្លាមៗ នៅកន្លែងកើតហេតុ និងច្រើននាក់ផ្សេងទៀត បានរងរបួសធ្ងន់ស្រាល គ្រាដែលរថយន្តចំនួន៣គ្រឿង បានបុកប៉ះបន្តគ្នា នៅលើកំណាត់ផ្លូវល្បឿនលឿន ស្ថិតក្នុងភូមិសាស្ត្រ ស្រុកសំរោងទង ខេត្តកំពង់ស្ពឺ ចំណុច K20+300 ទិសដៅពីភ្នំពេញទៅព្រះសីហនុ កាលពីថ្ងៃទី១៥ ខែធ្នូ ឆ្នាំ២០២៤ ។
សមត្ថកិច្ចមូលដ្ឋាន បានឱ្យដឹងថា ករណីគ្រោះថ្នាក់ដ៏រន្ធត់នេះ គឺផ្តើមឡើងពីរថយន្តមួយគ្រឿងម៉ាក តូយ៉ូតា prius ពណ៌ក្រហម ផ្លាកលេខភ្នំពេញ 2BA-2806 បើកបរដោយឈ្មោះ TSANG HINGCHUNG (សាំង ហ៊ីងឈុង) ភេទប្រុស អាយុ៥៥ឆ្នាំ ជាជនជាតិចិន ស្នាក់នៅភូមិឃ្មួញ សង្កាត់សែនសុខ ខណ្ឌសែនសុខ រាជធានីភ្នំពេញ ។ រថយន្តនេះ បានបើកបរ ពីទិសខាងកើតទៅ ទិសខាងលិច លុះមកដល់ចំ ណុចកើតហេតុបានបុកប៉ះ រថយន្តផ្នែកពី ក្រោយម៉ាកHyundai ពណ៌ខៀវ ផ្លាកលេខ ឃ4370-ភព2 (មានដឹកបន្ទះក្ដា)អ្នកបើកបរឈ្មោះ ឌិន ប៊ុនថុន ភេទប្រុស អាយុ៣៨ឆ្នាំ រស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ អ្នករួមដំណើរជាមួយ១នាក់ឈ្មោះ សុខ កុសល់ ភេទប្រុស អាយុ៣៩ឆ្នាំ រស់នៅភូមិស្តៅស្រលែង ឃុំដីឥដ្ឋ ស្រុកកៀនស្វាយ ខេត្តកណ្តាល ដែលកំពុង បើកបរស្របទិសគ្នា បណ្ដាលឱ្យក្រឡាប់ ធ្លាក់ក្តារាយប៉ាយពេញផ្លូវ ។ គ្រានោះក៏មានរថយន្ដ១គ្រឿងទៀត ម៉ាកMaserdasពណ៌ស ផ្លាកលេខភ្នំពេញ 2BP-7869 អ្នកបើកបរឈ្មោះ LI WEN BING (លី វ៉េនពីង) ភេទប្រុស អាយុ៣២ឆ្នាំ ស្នាក់នៅភូមិ២ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ក្នុងទិសដៅស្របដូចគ្នា ក្នុងល្បឿនលឿន បានកិននិងប៉ះជាមួយបន្ទះក្តាដែលធ្លាក់រាយប៉ាយលើផ្លូវ បណ្ដាលឱ្យក្រឡាប់ជាច្រើនជុំខូចខាតរថយន្តធ្ងន់ធ្ងរ ។
នៅកន្លែងកើតហេតុ លោកវរសេនីយ៍ឯក ឃុត សុផល អធិការ នៃអធិការដ្ឋាននគរបាល ស្រុកសំរោងទង បានបញ្ជាក់ថា ហេតុការណ៍ខាងលេី បានបណ្ដាលឱ្យឈ្មោះ ឌិន ប៊ុនថុន អ្នកបើកបររថយន្តហ៊ីយ៉ាន់ដាយ ស្លាប់នៅនិងកន្លែង និងអ្នករួមដំណើរឈ្មោះ សុខ កុសល់ រងរបួសធ្ងន់ ចំណែកឯបុរស២នាក់ ជាជនជាតិចិន ដែលបើកបររថយន្តprius និងរថយន្តmaserdes រងរបួសស្រាល ។ ដោយឡែកក្នុងហេតុការណ៍ បុកប៉ះបន្តគ្នានេះដែរ គឺរថយន្តទាំងបីគ្រឿងយ៉ូតា prius - Hyundai និងMaserdas រងការខូចខាតធ្ងន់ធ្ងរដូចគ្នា បច្ចុប្បន្នវត្ថុតាងរថយន្ដ ទាំង៣គ្រឿង សមត្ថកិច្ចនគរបាលបានយករក្សាទុកនៅស្នាក់ការបញ្ជរកំពង់ស្ពឺ ខាងកើត K26 រង់ចាំនីតិវិធី ដំណោះស្រាយបន្ដ ៕
ដោយ៖សុខសុភ័ណ្ឌ រូបថតសមត្ថកិច្ច
