ពោធិ៍សាត់÷ពលរដ្ឋចំនួន ៥៦ គ្រួសារ ដែលរងផលប៉ះពាល់ ក្នុងការអនុវត្តគម្រោង អភិវឌ្ឍន៍ច្រាំងស្ទឹងពោធិ៍សាត់ ក្នុងភូមិសាស្ត្រឃុំវាល ស្រុកកណ្តៀង ចាប់ពីចំនុចផ្សារក្បាលហុង រហូតដល់ស្ពានអាកាសផ្លូវវៀង ក្រុងបាននឹងកំពុង ចាប់ផ្តើមរុះរើសំណង់ជាបណ្តើៗ ហើយដែលសំណង់ទាំងនោះ បានសាងសង់លើដី សាធារណះរបស់រដ្ឋ ក្រោយពួកគាត់ ទទួលយកដីឡូតិ៍លំនៅដ្ឋានថ្មី តាមរយះការចាប់ឆ្នោតដែលស្ថិតនៅភូមិបឹងយា ឃុំវាល ស្រុកកណ្ដៀង ខេត្តពោធិ៍សាត់។
ការរុះរើនេះត្រូវ បានធ្វើឡើងស្រប តាមសេចក្តី ជូនដំណឹង របស់រដ្ឋបាលស្រុកកណ្ដៀង ស្តីពីការរុះរើសំណង់ បណ្តោះអាសន្នលើដីចំណីផ្លូវកៅស៊ូលេខ ១០១ តាមបណ្តោយមាត់ស្ទឹងពោធិ៍សាត់ ត្រើយខាងលិចក្នុងមូលដ្ឋាន ភូមិក្បាលហុង ភូមិវាល ភូមិពោធិ៍ដំណាក់ និង ភូមិពោធិ៍កំបោរ ឃុំវាល ស្រុកកណ្ដៀង អោយបានត្រឹមថ្ងៃទី ១៩ ខែ ធ្នូ ឆ្នាំ ២០២៤ ។
សូមបញ្ជាក់ថា កាលពីថ្ងៃទី ៤-៥ ខែ ធ្នូ ឆ្នាំ ២០២៤ ប្រជាពលរដ្ឋប្រភេទ “ក” និង”ខ”សរុបចំនួន ៥៦ គ្រួសារបានមកចូល រួមចាប់ឆ្នោតទទួលយកដីឡូតិ៍លំនៅដ្ឋានថ្មីជាការដោះដូរគោលនយោបាយនៅទីតាំងដីឡូតិ៍ដែលស្ថិតនៅភូមិបឹងយា ឃុំវាល ស្រុកកណ្ដៀង ខេត្តពោធិ៍សាត់ ក្រោមអធិបតីភាពលោក ខូយ រីដា អភិបាលខេត្តពោធិ៍សាត់ ។
ការដោះដូរនេះ គឺដើម្បីយកដីសាធារណះ របស់រដ្ឋដែលពួកគាត់ បានកាន់កាប់ប្រើប្រាស់ អាស្រ័យផល មកធ្វើការអភិវឌ្ឍន៍ ជាច្រាំងស្ទឹង មានសួនច្បារ មានកន្លែងហាត់ប្រាណ មានកន្លែងស្រស់ស្រូបយកខ្យល់អាកាស មានដាក់ទូរទស្សន៍ LED នឹងអាចរៀបចំកន្លែងលក់ដូរ អោយមានសោភ័ណ្ឌភាព សណ្តាប់ធ្នាប់ របៀបរៀបរយ បូករួមទាំងអនាម័យបរិស្ថានផងដែរ។
សម្រាប់ទីតាំងដីថ្មីដែលត្រូវដោះដូរជូនពួកគាត់ទាំង ៥៦ គ្រួសារនោះ ត្រូវបានរដ្ឋបាលខេត្តពោធិ៍សាត់ រៀបចំអោយមានផ្លូវ ទឹក ភ្លើង និង ប្រព័ន្ធលូគ្រប់គ្រាន់ ជាពិសេសមានប្លង់កម្មសិទ្ធិស្របច្បាប់តកូនតចៅ និង នៅក្បែរទីប្រជុំទៀតផង៕
