ភ្នំពេញ ៖ លោកបណ្ឌិត គៀត ច័ន្ទថារិទ្ធ រដ្ឋលេខាធិការ ក្រសួងមហាផ្ទៃ បានជំរុញអគ្គនាយករដ្ឋាន អន្តោប្រវេសន៍ បន្តខិតខំចាត់វិធានការស្រាវជ្រាវ ស៊ើបអង្កត ស្វែងរកមុខសញ្ញាជនបរទេស ដែលលួចជ្រៀតចូលមកស្នាក់នៅខុសច្បាប់ និងប្រព្រឹត្តបទល្មើសនានា។
ការលើកឡើងរបស់ លោកបណ្ឌិត គៀត ច័ន្ទថារិទ្ធ នាឱកាសអញ្ជើញជាអធិបតីបិទ សន្និបាតបូកសរុបលទ្ធផល ការងារឆ្នាំ២០២៤ និងលើកទិសដៅការងារឆ្នាំ២០២៥ របស់អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដោយមានការអញ្ជើញចូលរួមពី ឯកឧត្តម ឧត្ដមសេនីយ៍ឯក សុខ វាសនា អគ្គនាយក ព្រមទាំងថ្នាក់ដឹកនាំ នៃអគ្គនាយកដ្ឋាន អន្តោប្រវេសន៍ នាថ្ងៃទី២៨ ខែធ្នូ ឆ្នាំ២០២៤ នៅទីស្ដីការក្រសួងមហាផ្ទៃ។
លោក រដ្ឋលេខាធិការ បានប្រសាសន៍ ជំរុញឲ្យអគ្គនាយករដ្ឋានអន្តោប្រវេសន៍ បន្តត្រួតពិនិត្យឲ្យបានហ្មត់ចត់ បន្ថែមទៀតចំពោះការចេញ-ចូលរបស់ជនបរទេស, ត្រូវបង្កើនការគ្រប់គ្រងនៃការស្នាក់នៅរបស់ជនបរទេស រួមទាំងចុះត្រួតពិនិត្យឲ្យបានគ្រប់រោងចក្រសហគ្រាស់ដែលមាន ជនបរទេសស្នាក់នៅ ដើម្បីថែរក្សាសន្តិសុខជាតិ និងការអនុវត្តច្បាប់ស្តីពីអន្តោប្រវេសន៍។
លោក រដ្ឋលេខាធិការ បានលើកឡើងថា ចាប់ពីពេលនេះទៅត្រូវ បន្តយកចិត្តទុកដាក់ ក្នុងការគ្រប់គ្រងការ ចេញ-ចូលរបស់ជនបរទេសឱ្យ បានហ្មត់ចត់ និងមានប្រសិទ្ធភាពថែមទៀត ទាំងការលើកកម្ពស់សមត្ថភាព គ្រប់គ្រងនៅតាមច្រកទ្វារគ្រប់ប្រភេទ និងការបង្ការទប់ស្កាត់មិន ឱ្យមានការជ្រៀតចូលខុសច្បាប់ សំដៅធានាឆ្លើយតបបានទាំងសំណូមពរ នៃការថែរក្សាសន្តិសុខជាតិ និងការអនុវត្តច្បាប់ ស្តីពីអន្តោប្រវេសន៍។
លោក រដ្ឋលេខាធិការ គូសបញ្ជាក់ថា «ត្រូវបន្តខិតខំចាត់វិធានការ ស្រាវជ្រាវស៊ើបអង្កត ស្វែងរកមុខសញ្ញាជន បរទេសដែលលួចជ្រៀតចូលមកស្នាក់នៅខុសច្បាប់ និងប្រព្រឹត្តបទល្មើសនានា ដោយបង្កើនកិច្ចសហការ ផ្លាស់ប្តូរព័ត៌មានជាមួយ សមត្ថកិច្ចបរទេសជាមិត្ត ដើម្បីទទួលបានព័ត៌មានទាក់ទងមុខសញ្ញានានា និងត្រូវមានវិធានការគ្រប់គ្រង ជនបរទេសឱ្យបានម៉ត់ចត់ ធ្វើយ៉ាងណាឱ្យបរិយាកាសសន្តិសុខ សណ្តាប់ធ្នាប់ និងសុវត្ថិភាពសង្គមមានភាពល្អប្រសើរ ដើម្បីបម្រើដល់ គោលនយោបាយទេសចរណ៍ និងទាក់ទាញវិនិយោគិន បរទេសចូលមកក្នុងប្រទេសកម្ពុជា កាន់តែច្រើនឡើងបន្ថែមទៀត»៕
